الحلم: أنواعه وإزاي تفهمه وطريقة التحكم فيه

إزاي تفهم أحلامك؟

24 يونيو، 2021

الحلم ممكن يكون مسلي أو غريب أو مزعج، كلنا بنحلم حتى لو مش بنتفتكره في اليوم الجديد، لكن ليه بنحلم؟ وهل الصور والمشاهد اللي بنشوفها ليها معنى؟ تعالى نقولك..

تعريف الحلم؟

الأحلام هي صور أو أفكار أو مشاعر وقصص بتتكون في مخنا أثناء النوم، وممكن تعكس شعور بالسعادة أو الحزن أو الخوف
الباحثين قالوا إن الحلم عادة بيستمر من 5 دقايق لـ20 دقيقة
الأحلام الطويلة بتكون خلال فترة النهار
الدراسات قالت بعض الخصائص للحلم وبتشمل:

إنه بتكون بشكل لا إرادي
ممكن يكون المحتوى غير منطقي أو أحداثه غير متماسكة
بيتضمن أشخاص آخرين بيتفاعلوا مع الحالم
بيثير مشاعر قوية
بيتم دمج عناصر حياة اليقظة في المحتوى

أسباب الحلم

رغم استمرار أطباء علم الأعصاب وعلم النفس في إجراء تجارب لاكتشاف اللي بيدور في المخ أثناء النوم، وعدم الوصول لسبب قاطع، إلا إن الدراسات حددت بعض النظريات الافتراضية للسبب وراء حدوث الحلم زي:

بناء الذاكرة: من خلال الدراسات.. ارتبط الحلم بتقوية الذاكرة وده معناه إن الحلم بيخدم وظيفة معرفية مهمة لتقوية الذاكرة واسترجاع المعلومات
معالجة المشاعر: قد تكون القدرة على التعامل مع المشاعر والتدرب عليها في سياقات متخيلة مختلفة جزء من طريقة الدماغ لإدارة العواطف
التدبير العقلي: افترض بعض العلماء إن فترات الأحلام هي طريقة المخ لإزالة المعلومات الجزئية أو الخاطئة أو غير الضرورية
الإعادة الفورية: احتمالية إن محتوى الحلم يكون شكل من أشكال إعادة العرض الفوري اللي بيتم فيها مراجعة الأحداث الأخيرة وتحليلها
نشاط المخ العرضي: الرأي ده شايف أن الحلم هو مجرد نتيجة ثانوية للنوم ليس له هدف أو معنى أساسي

أنواع الحلم

مؤسسة النوم الأمريكية، قالت إن الإنسان بيحلم من 4 لـ6 مرات في الليلة، لكن بينساهم أول ما يصحى، يعني أكتر من 95% بيتم نسيانهم، خبراء علم النفس قسموا الأحلام لأنواع زي:

الأحلام الجليلة

هو الحلم اللي بتكون مدرك فيه إنك بتحلم
بيشكل معظم أحلامنا وغالبا بيحصل أثناء نوم حركة العين السريعة أو نقدر نوصفه بأنه حالة دماغية بين نوم حركة العين السريعة والاستيقاظ

أحلام اليقظة

هى الأحلام اللي بتكون بين اليقظة الكاملة وبداية النوم
غالبا بتحصل لما الإنسان يسيب خياله ويسرح لدرجة إنه ينفصل عن الواقع حواليه وعن الأشخاص والأحداث والزمن
بيبدأ المخ في خلق مستوى وعي منفصل تماما عن الواقع المحيط بالإنسان

أحلام اليقظة الكاذبة

بيشوف فيها الشخص نفسه كأنه صحي من نومه، وبدأ يمارس نشاطه المعتاد خلال اليوم، لحد نقطة محددة بيكتشف إنه كان نايم

الحلم المتكرر

هي أحلام بتتكرر باستمرار مع وقوع تغييرات بسيطة في أحداثها
علماء النفس فسروها إن غالبًا بيكون الشخص بيمر بمشكلة مش عارف يحلها أو موقف مزعج

الحلم التنبؤي

عبارة عن تحليلات عقلية لأحداث مر بها الشخص في مواقف مشابهة

الأحلام المتطورة

سلسلة أحلام بتكمل بعضها خلال ليالي متتالية

توقيت الحلم

في المتوسط، بيحلم معظم الناس لمدة ساعتين تقريبًا في الليلة
ممكن يكون في أي مرحلة من مراحل النوم، إلا إنه في معظم الوقت بيكون في مرحلة حركة العين السريعة (REM)
خلال مرحلة حركة العين السريعة بيزيد نشاط المخ بشكل كبير مقارنة بالمراحل التانية، وده بيساعد على تفسير الأنواع المميزة من الأحلام
عادة الأحلام أثناء نوم حركة العين السريعة بتكون واضحة أكتر وخيالية أو غريبة رغم إن ممكن يكون فيها حاجات من الواقع
على عكس أي مرحلة تانية من النوم بيكون الحلم متماسك أكتر وبيحتوي على أفكار وذكريات وبيتركز على وقت ومكان محددين
مرحلة النوم (حركة العين السريعة) بتحصل في غالبية الوقت خلال النص التاني من فترة النوم العادية وده معناه إن الحلم بيكون في الساعات اللي قبل الاستيقاظ

حقايق علمية مهمة عن الحلم

الأشخاص بيقضوا حوالي 6 سنين من عمرهم بيحلموا
البالغين والأطفال بيحلموا لمدة ساعتين كل ليلة على الأقل
12% من الأشخاص خلال التجارب قالوا إنهم بيحلموا بالأبيض والأسود
خلال تجربة.. اتطلب من أشخاص اختيار ألوان بتتوافق مع أحلامهم.. وكانت ألوان الباستيل الناعمة هي الأكتر اختيارا
غالبية الأحلام بتكون مرئية بشكل أساسي مع صوت وحركة أقل
الأحلام عند الأطفال في الغالب بتدور حول: الحيوانات أو الوحوش/ الاعتداءات الجسدية/ السقوط/ المطاردة
معظم أحلامنا مرتبطة بأفكار أو أحداث من اليوم أو اليومين السابقين
ممكن تحلم بوجوه أشخاص قابلتها صدفة سواء في الشارع أو في التلفزيون
الأبحاث اكتشفت بعض الاختلافات بين محتوى الأحلام عند الرجال والنساء
نتايج الدراسات قالت إن أحلام الرجال بتكون عدوانية زي حمل الأسلحة أو فيها نشاط بدني زي الجري
أما أحلام النساء فيها محادثات بشكل أكبر وبتكون أطول وفيها عدد كبير من الشخصيات
الانتصاب الصباحي (والمعروف علميا بانتفاخ القضيب الليلي) ملوش علاقة بالأحلام الجنسية
الرجال بيحلموا بممارسة الجنس مع شركاء متعددين ضعف النساء
الدراسات قالت إن 4% من أحلام الرجال والنساء بتدور حول الجنس
النوم على البطن ارتبط بالأحلام الجنسية/ اللي بتدور عن السباحة أو الحبس
الدراسات قالت إن الكوابيس ممكن تساعدك في التعامل بشكل أفضل مع الخوف من الواقع
لأنها بتعزز قدرة العقل على الاستجابة لمخاطر الحياة الواقعية والتجارب المخية
الأحلام بتحسن الإبداع وحل المشكلات بسبب ارتفاع نشاط المخ في الأجزاء الخلفية
المكفوفين عندهم تجارب بصرية في أحلامهم لأن لديهم نفس النشاط الكهربائي في المخ زي الأشخاص الطبيعيين
لكنهم ميقدروش وصف التجربة وتصور الشعور.. أما لو كانوا اتولدوا مبصرين فالأحلام بتكون عن الذكريات
الحيوانات بتحلم زي البشر

الفرق بين الحلم والكابوس

في علم النوم، الكابوس هو حلم سيئ بيدفع الشخص إنه يصحى
بيختلف التعريف ده عن الاستخدام الشائع اللي بيدل على أي حلم مخيف أو مزعج
الأحلام السيئة طبيعية لكن الكوابيس وخاصة لو متكررة ممكن تتداخل مع نوم الشخص وتسبب ضعف التفكير وتقلب المزاج أثناء النهار
حوالي 50% من الكبار بيحلموا بالكوابيس
السيدات بتحلم بالكوابيس أكتر من الرجال
ما يقرب من 1% من الكبار بيحلموا بنفس الكابوس بشكل متكرر وغالبًا بيحتاجوا لمساعدة نفسية
الأبحاث قالت إن الأشخاص بيحلموا بالكوابيس في التلت الأخير من الليل
غالبا بيكون سببها: التوتر والصراع والخوف/ التعرض لصدمة/ المشاكل العاطفية/ بعض الأدوية أو تعاطي المخدرات/ بعض الأمراض الجسدية والنفسية زي الاكتئاب
المشاعر السلبية بتترجم في أحلام سيئة خاصة بعد فقدان شخص عزيز أو خلال أعراض اضطراب ما بعد الصدمة
الارتباك والاشمئزاز والحزن والشعور بالذنب من أسباب الكوابيس أكتر من الخوف

موضوعات الأحلام والكوابيس

عالم النفس الشهير فرويد قال إن الأحلام هي نافذة على عقلنا الباطن وأنها بتكشف رغبات اللاوعي والأفكار والدوافع عند كل شخص
اختلفت الآراء عن معاني الأحلام، وبعض الخبراء قالوا إن الأحلام ملهاش علاقة بمشاعرنا أو أفكارنا الحقيقية، وإنها مجرد قصص غريبة لا تتعلق بالحياة الطبيعية
رغم رفض الخبراء الاعتماد على الكتب أو “قواميس الأحلام” اللي بتحدد معنى محدد لصورة أو رمز حلم معين، لكن اعتمد بعضهم معاني للموضوعات المتكررة زي:

الموت ورؤية الموتى:

بتعبر عن إحساس الاشتياق ورغبتهم في رجوعه
إلا إنها في الكوابيس بتعبر عن خوف الشخص من المجهول
الكوابيس المتعلقة بالموت بتدل على خوف الحالم من فكرة التعرض لمرض أو حادث مميت أو الفقد

سقوط الأسنان

الأسنان بتستخدم للقطم والمضغ والعض وتمزيق شيء
فقدها بيعكس الخوف من العجز أو فقد لثروة أو ممتلكات أو أشخاص
الأسنان مرتبطة كمان بالمظهر فسقوطها بيدل على عدم الثقة بالنفس

المطاردة

بتدل على هروب الشخص من مشكلة أو حدث ما
اللي بيطاردك في الحلم بيمثل جانب من حياتك زي الغيرة أو الخوف أو الغضب أو القلق

فشل العثور على الحمام

بتدل على صعوبة التعبير عن احتياجك في موقف معين
بيمثل احتياجات الآخرين أولوية عن احتياجاتك

التعري في مكان عام

بيدل على عدم قدرتك إيجاد نفسك أو شعورك بالذنب والخطأ
لو بتحاول ستر نفسك بيدل على خوف داخلي من معرفة الناس لأمور وأفكار بتخفيها

التأخير

لو متأخر على معاد طيارة/ اجتماع/ أي حدث مهم بيدل على خوف وقلق شديد
الخوف ده بيكون مرتبط بتخيب آمال أشخاص بيثقوا فيه أو الإحساس بعدم القدرة على تحمل الأعباء
التأخر على الامتحان بتعكس انعدام الثقة وعدم القدرة على التقدم إلى المرحلة التالية في الحياة

السقوط

النوع ده من أكتر الكوابيس المنتشرة
السقوط من مكان عالي بيدل على عدم الأمان والقلق بشأن موقف
بيعكس الإحساس بعدم تحكم الشخص في حياته

عدم السيطرة على العربية

بتعكس إحساس بالخروج عن المسار الصحيح للحياة

الجروح والإصابات المختلفة

بتدل على شعور الحالم بالنقص أو الأذى من شخص أو حدث ما

الحبس

بتدل على وقوع الشخص في مشاكل كبيرة وحلها صعب زي ضائقة مالية أو مشكلة في الشغل أو علاقة عاطفة

الكوارث الطبيعية

بتدل على مشاعر سلبية شديدة زي القلق والغضب والخوف يخفيها الشخص داخله

طريقة التحكم بأحلامك

اكتب تفاصيل الحلم اللي عايز تحلم بيه في ورقة قبل النوم وممكن تستخدم الرسم/ الحكي عشان تتخيل الصورة كاملة
تجنب مشاهدة التلفزيون/ السوشيال ميديا قبل النوم
لما تصحى.. اكتب تفاصيل الحلم اللي حلمت بيه حتى لو كان مختلف لأن الطريقة دي هتدرب عقلك مع الوقت
اكتب النقاط المشابهة/ المتقاربة بين الحلمين بالتفصيل مهما كانت بسيطة
اقرا تفاصيل الحلم أكتر من مرة قبل النوم عشان تقدر تحتفظ بيها في عقلك
مدد جسمك وغمض عينك وفكر في تفاصيل الحلم اللي قريتها وتخيل الصوت/ الصورة العامة/ الحالة المزاجية المصاحبة للحلم
تخيل الحلم بنفس الترتيب اللي كتبته بيه وردده لنفسك وحاول تسترخي تماما
لو أدركت إنك بتحلم وإنت نايم.. تجنب الحماس الزايد لأنك قادر تتحكم فيه وركز في تفاصيله
اعمل اختبار التحقق من الواقع لما تصحى زي إنك تبص على الساعة مرتين عشان تتأكد إنك شوفت نفس الوقت في المرتين
لأن ده هيساعدك تفرق بين الحلم والواقع.. لو في الحلم هتشوف رقم غير منطقي على الساعة/ حيوان غريب/ مكان غير منطقي
وده هيسمح بتخزين الأحلام وتفاصيلها في ذاكرتك بشكل أعمق وتقدر تتحكم فيها
مهم تركز وتقوي إدراكك وتقلل العاطفة أثناء الحلم عشان تتجنب الاستيقاظ منه

الوسوم