المحتويات
المكرونة من أشهر الأكلات الإيطالية في العالم، وبتسبب زيادة الوزن لأن مكونها الأساسي النشويات، لكن في طرق مختلفة لأكلها بطريقة صحية في حدود السعرات الحرارية اليومية المسموح بيها.
وصفات صحية للمكرونة
مكرونة بالسلمون
المكونات
- 100 جرام مكرونة
- قطعتين سلمون متبلين بالملح والفلفل الأسود والليمون وممكن تستبدله بالتونا
- معلقتين كبار كزبرة متقطعة
- معلقتين كبار شبت متقطع
- بسلة
- معلقة زبدة أو زيت زيتون
- نص بصلة قطع صغيرة
الطريقة
- سخن الفرن ودخل السلمون متبل في صينية على ورقة زبدة
- سيبه من 15- 20 دقيقة
- خرجه في طبق عشان حرارته تقل وبعدين قطعه صغير
- اسلقها وممكن تضيف البسلة في آخر دقيقتين قبل تصفيتها أو تسويها في طاسة منفصلة
- سخن الزبدة أو الزيت في طاسة وشوح البصل لمدة 5 دقايق
- ضيف الشبت والكزبرة دقيقة وبعدين ضيف المكرونة والسلمون والبسلة وضيف الملح والفلفل
مكرونة الفراخ والسبانخ
المكونات
- 100- 200 جرام مكرونة
- حبتين توم مفرومين
- 2 كوب سبانخ
- معلقتين زيت زيتون
- ملح وفلفل
- نص بصلة مفرومة
- جبنة مبشورة
- صدور فراخ مشوية ومتقطعة شرايح
- بشر نص ليمونة
- صوص بيستو أو ريحان
الطريقة
- اسلقها وبعدين صفيها
- افرم التوم وبشر الليمون والسبانخ والجبنة مع بعض وضيف لهم الملح والفلفل
- في طاسة غير لاصقة.. حط المكرونة والخليط اللي فرمته وبعدين ضيف شرايح الفراخ
- اتأكد من الملح والفلفل وممكن تزين الطبق بطماطم شيري أو شرايح زيتون
بالخضار
المكونات
- 100 جرام فيتوتشيني أو سباجيتي
- معلقة زبدة
- معلقة زيت زيتون
- شرايح فلفل ألوان
- شرايح بصلة
- حبتين كوسة متقطعين شرايح
- ملح وفلفل أسود
- كوب جبنة موتزاريلا
- ريحان طازة
الطريقة
- سخن الزبدة والزيت في طاسة وشوح البصل والفلفل الألوان فيها على نار متوسطة
- تبلهم بالملح والفلفل وبعدين ضيف الكوسة وسيبهم 10 دقايق
- اسلقها وضيفها للخضار واحفظ نص كوب من مياه سلقها لو احتجت لزيادة الصوص
- ضيف المكرونة للخضار وقلبهم كويس وتبلهم بالبهارات اللي تحبها
- زينها بالريحان والموتزاريلا
سكيني ألفريدو
المكونات
- 100 جرام مكرونة ألفريدو أو لينجويني
- معلقة كبيرة زيت زيتون
- 3 حبات توم مفرومين
- معلقتين كبار دقيق
- كوب شوربة
- 4/3 كوب حليب
- جبنة بارميزان مبشورة
- معلقتين كبار زبادي يوناني
- ملح وفلفل أسود وبابريكا أو شطة
- بقدونس طازة متقطع
الطريقة
- اسلقها مع حفظ نص كوب من مياه سلقها قبل تصفيتها
- سخن الزيت في طاسة على نار متوسطة وشوح التوم فيه دقيقة
- ضيف الدقيق وقلبه كويس لحد ما لونه يبقى دهبي
- ضيف الشوربة تدريجيا مع التقليب المستمر
- أول ما يغلي.. ضيف الحليب وقلبه كويس وسيبه 3 دقايق لحد ما قوامه يتقل
- اطفي النار وضيف الملح والفلفل والبابريكا وممكن تضيف الزبادي لو حسيت إنه محتاج وبعدين ضيف المكرونة
- لو الصوص تقيل.. خففه بمياه سلق المكرونة وزين الطبق بالجبنة والبقدونس
طريقة تقليل السعرات الحرارية في المكرونة
- الدراسات أثبتت إن أكلها باردة صحية أكتر لأنها أقل في السعرات الحرارية، فتسخينها بعد ما تبرد أكتر صحية لجسمك عن أكلها وهي لسه مطبوخة
- الكربوهيدرات زيها زي الرز بيعلوا نسبة السكر في الدم وبالتالي الجسم بيفرز نسبة كبيرة من الأنسولين لخفضه وده بيسبب الجوع السريع بعد الأكل أو مشاكل صحية زي مرض السكر
- لكن أكلها لما تبرد بيحولها لنشويات مقاومة والجسم بيهضمها على شكل ألياف وده بيسبب ارتفاع آمن وتدريجي وبسيط في مستويات السكر في الدم
- الدراسات أثبتت إن تسخينها بعد ما تبرد بيقلل ارتفاع السكر في الدم بحوالي 50% وجسمك بيمتص كمية أقل من سعراتها الحرارية وبتحفز البكتيريا النافعة في المعدة
