اختراق إنستجرام هيعرض بياناتك الشخصية وصورك لخطر الاستغلال أو الابتزاز، وعموما بننصح بحماية حساب إنستجرام وواتساب بالتحديد نظرا لأن الأول موقع متخصص في مشاركة وتبادل الصور وبالتالي صورك الشخصية موجودة عليه، والتاني هو الموقع الأبرز للمحادثات.
في النقط الجاية هتلاقي خطوات بسيطة هتمكنك من حماية حسابك على إنستجرام من الاختراق وتسريب البيانات.
باسوورد قوي لحماية إنستجرام من الاختراق
- اعمل باسوورد قوي مكون من 8 أشكال بين الحروف والأرقام وعلامات الترقيم
- غيره من مرة لمرتين كل سنة
- تجنب اختيار باسوورد قريب منك أو ليه علاقة بحاجة في حياتك وسهل توقعه
- تجنب استخدام نفس الباسوورد لأكتر من حساب في مواقع مختلفة
التحقق بخطوتين
- فعل خاصية التحقق بخطوتين (Two-Factor Authentication) اللي هتبعت لك رسالة لو حد حاول يدخل على حسابك
- دوس على (Profile) وبعدين (Settings)
- اختار (Two-Factor Authentication) وفعل خاصية الـ(Security Code)
- دخل رقم موبايلك ودوس (Add Number)
- أو ممكن تستخدم تطبيق تاني عشان يبعتلك نوتيفيكيشن على الموبايل لو حد حاول يدخل على حسابك
- نزل تطبيق (Google Authenticator) من (App Store) أو (Google Play) وبعدين اتبع نفس الخطوات
- اختار (Authentication App) بدل (Phone Number)
إيميل آمن
- استخدم إيميل آمن وبتستخدمه لتسجيل دخولك على إنستجرام
- افتح إنستجرام من الكمبيوتر واختار (ٍSettings) وبعدين (Authorized Apps)
- اتأكد من تطبيقات الـ(Third-party) اللي إنت سامح باستخدامها
- لو لقيت تطبيق غريب.. دوس على (Revoke Access) واتأكد إن الحسابات اللي عاملها أو عاملالك فولو موثوق فيها من خلال فتح الحساب
- دوس على التلت نقاط أعلى الشاشة واختار (About This Account)
- هتظهرلك معلومات عن الحساب ممكن تتأكد منها
الأجهزة الغريبة
- تجنب فتح أي لينك اتبعت لك من أي شخص غير لما تسأله الأول حتى لو بتثق فيه لأن ممكن يكون حسابه مخترق
- تجنب اختيار (Remember me) لو بتدخل على حسابك من جهاز غريب
- اتأكد إنك سجلت خروج من حسابك لو بتستخدم جهاز جديد
