تربية
حدوتة قبل النوم.. فوائدها للطفل وإزاي تحكيها بطريقة شيقة
إزاي تحكي حدوتة قبل النوم بطريقة شيقة؟
المحتويات
حدوتة قبل النوم بتنمي مهارات طفلك اللغوية وبتحسن مداركه وبيستفيد منها دروس في الحياة ممكن تبقى مفتاح تعلّمه لمهارة جديدة، بجانب إنها بتبني لغة تواصل بينكم وبتساعدك تلاقي أرضية مشتركة معاه وتفهم أكتر ميوله واهتماماته، بس مهم تعرف الطريقة المناسبة اللي تحكي بيها عشان تجذب انتباه طفلك.
فوائد حدوتة قبل النوم على طفلك
- بتنمي المهارات اللغوية لطفلك وبتساعده يكتسب كلمات أكتر ويفهم معاني الأشياء
- بيتعلم مهارات مختلفة وبيستفيد خبرات في الحياة نتيجة المواقف اللي بيمر بيها أبطال القصة
- الدراسات بتقول إن قراءة القصص بتنشط مناطق في أدمغة الأطفال مرتبطة بالخيال ورسم الصور الذهنية
- بتزيد مهارات التعاطف عندهم خصوصًا لو بطل/ بطلة القصة بيمروا بظروف مشابهة لظروف الطفل الاجتماعية والنفسية
- تجربة أكدت إن الأطفال اللي أهلهم بيحكوا لهم حدوتة قبل النوم يوميًا بتزيد عندهم مهارة فهم مصطلحات ومباديء ممكن تبقى أكبر من قدرتهم على الاستيعاب
- أسئلة طفلك هتساعده يفهم العالم من حواليه أكتر ويكتسب معارف جديدة سواء في العلوم أو الأدب حسب ميوله
- دراسة في المجلة الأمريكية لطب الأطفال بتقول إنها بتساعدهم على تطوير مهارات القراءة والكتابة خصوصًا في سن من 3 لـ 5 سنين
- التجربة بتقول إن استمرار عادة قراءة حدوتة قبل النوم بيساعد على نمو عادات الالتزام بالقراءة خصوصًا قبل النوم عند طفلك
- بيقل تأثير محفزات تانية زي الألعاب الإلكترونية وأفلام الرسوم المتحركة وبينشط الخيال اللي هيشجعه على استكمال القصة أو رسم معادل بصري ليها عن طريق الصور
حكي حدوتة قبل النوم لطفلك بطريقة شيقة
- اختار قصة مناسبة لسنّه عشان يقدر يستوعبها صح
- خلي نبرة صوتك متنوعة بين العالي والمنخفض وخليك باصص على طفلك وركّز في عينيه
- حاول تحكي بأداء تمثيلي قدر المستطاع سواء بتغيير نبرة صوتك أو بحركة إيدك أو تعبيرات وجهك عشان تضمن إنه منتبه ليك
- اسأل طفلك وقت السرد عشان تجذب انتباهه وتتأكد إنه مركز في القصة
- حاول توقّف سرد عند نقطة معينة فيها أحداث منتظرة وشيقة واطلب منّه تخيل النتيجة أو الحدث اللي بعده
- مثلًا لو بطل القصة محبوس وفيه خطر محتمل عليه سواء حيوان مفترس أو لص لازم تفكر مع طفلك وتشجعه على التوقع السليم
- الأحسن تكافئه عشان يحس بقيمة توقعه أو حتى لو سألته في نص القصة عن تفصيلة مهمة قولتها في البداية
- اعرف إنك بالطريقة دي ممكن تشد انتباه وتركيزه أكتر وفي نفس الوقت هتنمي قدرته على التركيز في التفاصيل وربطهم ببعض لتكوين صورة كاملة
- خلي القصص مختلفة ومتنوعة عن بعضها وحاول تختار القصص اللي ليها أفلام بتعتبر معادل بصري ليها عشان تتفرجوا عليها مع بعض
تشجيع طفلك على القراءة
- لما بيوصل الطفل لمرحلة إنه بيعرف يقرأ لوحده مهم تشجعه على القراءة عن طريق قراءته للقصص بنفسه
- مع الوقت هيتعلق بالقراءة وهيزيد نضجه وهتقل رغبته في قراءة القصص على حساب كتب تانية في العلوم والأدب
- هتتوسع مداركه وهيقدر يبني شخصيته من سن صغير
- الأحسن تقرأ حواديت قبل النوم من وهو في سن صغير وخلي معاك كتاب وخليه يتفرج معاك على الصور
- هيحاول يقلّدك لأن الأطفال بيحاولوا يبقوا شبه أهلهم في أي تصرف أو سلوك
- خليه يشوفك دايمًا معاك كتاب بتقرأ فيه.. وحاول تبسط له موضوع الكتاب لما يسألك
- اسأله قبل ما تجيب كتب له وحاول تجمع بين اهتماماته وبين الكتب اللي تنمي ثقافته
- اختار كتب مناسبة لسنه وفيها قدر كبير من الصور عشان تجذبه
- هتنمي جواه حب الكتاب ومع السن هينجذب لنوعية الكتب اللي في إيد الكبار
- اشتراك طفلك في مكتبة هيحببه في القراءة أكتر خصوصًا إن أغلب المكتبات بتعمل أنشطة ترفيهية وثقافية بتجذب بيها الأطفال
- هترتبط معاه القراءة بذكريات جميلة ودورها هيبقى أساسي في حياته
- وعي الطفل بالقراءة مش بس للكتب وخليه يقرأ أي حاجة قدامه زي شريط الأخبار أو منيو مطعم أو حتى إرشادات لعبة جديدة
- اسأله فهم إيه وحاول تفهمه الصح وبين اعتزازك وفخرك بثقافته عشان يحس إنه مميز عن باقي اللي في سنه وهيحب القراءة أكتر
- لو ابنك متعلق بالتابلت أو السمارت فون حاول تجذبه للقراءة من خلالها
طريقة اختيار حدوتة قبل النوم مثالية لطفلك
- اختار قصة فيها معنى وقيمة معينة عايز تقولها لطفلك بس بشكل غير مباشر
- اقرأها مع نفسك وشوف إذا كانت فعلًا ممتعة وجذابة ولا لأ وبلاش تستهين بذكاء طفلك
- ركّز في التفاصيل وبلاش تختار قصة فيها أي موضوعات أو إيحاءات مش مناسبة لسن الطفل
- توقّع أي سؤال هيسأله طفلك وجهّز إجابة عليه فورًا
- ابحث عن القصص اللي ليها معادل بصري سواء في شكل صور أو فيلم وشجع طفلك يتفرج عليه بس بعد إطلاعه عليه من خلالك لأول مرة
