المحتويات
الملل حالة نفسية بتحصل نتيجة عدم إحساس الشخص بالتوازن الداخلي ومش بيصنف كحالة مرضية لأنه بيحصل لأغلب الناس نتيجة الإحباط المتتالي في الحياة خلال بعض المواقف أو نتيجة التعوّد على روتين واحد لمدة طويلة حتى لو روتين صحي ومفيد ومريح للشخص، والاستغراق في شعور الملل ممكن ينتج عنّه مضاعفات صحية خطيرة.
كيفية الشعور بالملل
- الملل هو فقدانك للرغبة في ممارسة أي نشاط وإحساسك بعدم أهميته
- الإحساس ده بيقلل تركيزك حتى لو وراك مهمات لازم تخلصها
- بيتولد مع وجود طاقة كامنة جواك بس مش بتلاقي النشاط الناسب اللي تطلعها فيها
- لما بيبقى فيه حاجة معينة مسيطرة على مخك ومش بتقدر تطردها
- دراسة في جامعة كلارك الأمريكية بتقول إن عقلك اللاوعي مش بينشغل غير بالفكرة دي وبتفضل موجودة حتى لو إنت مش حاسس
- وبالتالي بتفقد اهتمامك بأي حاجة بتحصل حواليك ممكن تفيدك وتسليك لو اندمجت فيها
- تكرار المهام يوميًا بتفاصيلها بدون اكتساب مهارة جديدة بيزود الملل نتيجة لزيادة في نشاط الفص الجبهي الأيمن في المخ
- لكن لما بتبذل مجهود عشان تقاوم الإحساس وتركز في تعلم حاجات جديدة بتنشط الفص الجبهي الأيسر
- جزء كبير من الملل نتيجة لعدم سيطرتك على الموقف وبيزيد الملل لما بتبقى مستني حد أو قاعد في العيادة لإنك مجبر على الموقف
- لو اجتماعي فهتحس بملل أكتر لو فضلت في مكان واحد لمدة طويلة من غير ما تكون علاقات جديدة
- ولو مش بتعبر عن نفسك صح هيزيد إحساسك بالملل لإنك مش قادر تقاوم الفكرة المسيطرة عليك
تأثير الملل على حياتك
- الملل بيحصل لما بيقل رضاك عن نشاط بتعمله وبتعجز عن التركيز فيه لمدة طويلة
- بيسبب انخفاض جودة النوم والتغدية أو قلة الأنشطة الترفيهية نتيجة مشاعر الضيق
- بيختلف عن الكسل لأن وقت الإحساس بالملل بيبقى عندك طاقة مش عارف توجهها صح
- بيزيد عند الأطفال والمراهقين خصوصًا مع عدم قدرتهم على فهم المشاعر والأفكار
- مع الوقت بيتحول لإحساس بالإحباط وعدم التحقق وبتقل الثقة في النفس
- دراسة في جامعة ولاية واشنطن بتقول إنه بيسبب أمراض نفسية زي التوتر والقلق والاكتئاب مزمن
- إحساس الملل ممكن يبقى دافع قوي للإفراط في الطعام خصوصًا السكريات والنشويات واللجوء للتدخين أو تجربة المخدرات ومع الوقت ممكن تتحول لإدمان
- دراسات كتير بتقول إن عدم القدرة على توجيه الشخص لطاقته بصورة صحيحة بيولّد أنواع مختلفة من الإدمان
- سواء إدمان المخدرات أو حتى إدمان سلوكيات محددة زي الاستغراق في تصفح مواقع التواصل الاجتماعي أو بعض السلوكيات الجنسية زي العادة السرية أو الإفراط في الممارسة الجنسية
- سلوكيات الإدمان الناتجة عن الملل بتعطل الشخص عن التفكير في تحقيق تقدم في حياته
خطوات التخلص من الملل
- فكر في الحاجات اللي ممكن تعملها عشان تتشجع لو حالتك النفسية مش هتسمحلك تحاربه بكل قوتك
- حدد المواقف والأوقات اللي بتمل فيها واختار أبسط حاجة تضيع الإحساس ده
- لما بتنجز مهمة روتينية ضيف عليها عنصر جديد يحسسك بالاستمتاع
- زي إنك تتحدى نفسك تخلصها في مدة قليلة واحسبها بزمن انتهاء أغنية أو عند وقت محدد بالدقيقة
- دراسة في جامعة هارفارد بتقول إن اختيارك لنشاط يخليك مشغول لأطول وقت أساسي مع تخصيص فترات راحة متفرقة خلال اليوم واعمل حاجة بتحبها في يومك ولو لمدة بسيطة
- حاول تغير في ترتيب يومك واعمل حاجة مختلفة مرة أو اتنين اسبوعيًا
- افتكر أهدافك الكبيرة واسعى لتحقيقها وتخيل إحساسك بعد تحقيقها
- تواصل مع المقربين وعبر معاهم عن مشاعرك تجاههم وقضي معاهم وقت أطول
- القراءة من أسهل الأنشطة اللي تقدر تحارب بيها الملل لو مش لاقي حاجة تعملها لأنها بتدخّلك في عالم تاني موازي وبتساعدك تكتسب معلومات وخبرات جديدة
- خطط لمستقبلك في شغلك واختار مهارة معينة تنميها
- دراسات بتأكد إن التطوع ومساعدة الغير بيحسن نفسيتك وبيقلل إحساسك بالضيق والتوتر
مقاومة شعور الملل في الشغل
- غير في شكل مكتبك بإكسسوارات على ذوقك وحط صور لناس أو حاجات بتحبها
- حط أهداف صغيرة في الشغل وإدي لنفسك راحة بعد ما تخلصها
- اعمل هواية أو رياضة بتحبها بعد الشغل.. هتتحمس إنك تكمل من غير زهق
- لو الجو يسمح شغل أغاني أو موسيقى بتحبها
- اتناقش مع مديرك في تغيير شوية مهام وظيفتك عشان تكسب خبرة
- حاول تغير المكان اللي بتقعد فيه كل فترة
- استغل أوقات الملل دي بإنك تطلع أفكار جديدة لو شغلك في مجال إبداعي وبتفكر كتير
- إوعى تفكر في الشغل في وقت الراحة هترجع للشغل بطاقة أكبر
- هتحس بالوقت لو بصيت على الساعة وحسبت الوقت الفاضل فالأحسن إنك تقسم أهداف شغلك
- خلي في بالك إنك مش الوحيد اللي بتمر بالتجربة دي وماتستسلمش ليها
