المحتويات
العناية بالتوأم أمر مش سهل، فالاهتمام بطفلين بنفس السن ومحتاجين نفس الرعاية والاهتمام والطاقة، بيأدي لتراكم الضغوط والتوتر خاصة على الأم، لأنها دايما بتكون خايفة من عدم السيطرة، لكنها كمان تجربة مختلفة وتحدى، لأن البيت والتربية لها دور في تكوين شخصياتهم، اللي سواء كانوا مختلفين أو متشابيهن في الشخصية أو الصفات.
أنواع التوائم
التوأم المتماثل
- بينتج عن انقسام للبويض الملقحة لجزءين، وبيكون لهم نفس الأصل الجيني، وبيتكون الجنين في نفس كيس الرحم
- بيكونوا من نفس الجنس سواء ذكور أو إناث، ونفس فصيلة الدم ونفس الشكل
التوأم المختلف
- بيتكون من بويضتين ملقحتين باتنين من الحيوانات المنوية، بتختلف الشفرة الجينية زي أي أخين غير توأم، وممكن يكونوا من نفس الجنس أو مختلفين
- بيتكون كل جنين داخل كيس منفصل فى الرحم
- ممكن فصيلة الدم تكون مختلفة، وكمان شكلهم مختلف
طرق العناية بالتوأم حديث الولادة
- مهم الأم تعمل روتين يومي للأكل والاستحمام واللعب والقيلولة، لأنه هيوفر مجهود ووقت لراحتك
- الرضاعة للتوأم في نفس الوقت هتقلل توترك بسبب صراخ الطفل الأول خلال رضاعة التاني، ومهم تختاري أكتر مكان مريح عشان يدعم ضهرك
- لو بترضعي طبيعي.. في وضعيات هتسهل عليكي زي: وضعية كرة القدم.. شيلي كل طفل على دراع ووجهي فمهم نحو ثدييك واستعيني بمخدة الرضاعة لمساعدتك على رفع الرضيعين
- ممكن تستخدمي مضخة الثدي في تحضير الرضعات
- تناولي أكل صحي متنوع عشان تغذي الطفلين بالعناصر الغذائية اللي محتاجينها
- اهتمي بالمشروبات والأطعمة اللي بتساعد على إدرار الحليب زي: الحلبة والشمر والينسون واللوز والسبانخ والبيض
- حضري كل اللي محتاجاه جنبك قبل الرضاعة زي المياه أو ريموت التليفزيون
- اطلبي مساعدة زوجك أو أمك أو أصدقائك للاهتمام بيهم أو الاستعانة بشخص لمساعدتك
- مهم تاخدي فترة راحة لنفسك عشان تقدري تستعيدي تركيزك وطاقتك.. ممكن يكون ساعة واحدة في اليوم على الأقل
- اطلبي المساعدة من زوجك أو إخواتك أو مامتك أو صحابك
- وقت الاستحمام مهم يكون منفصل عشان توفري مجهود
- بعد عمر الـ6 شهور الأولى.. ممكن تخلي طفل في كرسيه الهزاز مع لعبه في وقت استحمام أخوه
- في الشهور الأولى ممكن يناموا في نفس السرير، لكن بعد ما يبدأوا في الحركة افصلهم عشان تضمن إن محدش فيهم يصحي التاني
- اشتري عربية الأطفال المخصصة لطفلين، عشان تسهل عليكي الحركة بره البيت
نصائح لتربية التوأم
- خليكي صبورة ومتتعصبيش بسرعة عشان تحافظي على سلامك النفسي
- اهتمي بكل طفل بشكل منفصل على قدر الإمكان عشان تنمي الاستقلالية وتبعدي أي شعور بالغيرة
- تجنبي التعامل معاهم على إنهم نسخة واحدة في اللبس أو تسريحة الشعر
- تجنبي إجبارهم على نفس الهوايات أو الألعاب وتعاملى مع ميول كل واحد بشكل فردي
- تجنبي المقارنة بينهم في أي حاجة عشان ميحصلش غيرة بينهم
- اتواصلي مع أمهات لتوائم عشان تستفيدي من خبراتهم
