أهمية مقابلة العمل (الإنترفيو) 

– في أغلب الشركات بتعتبر هي الخطوة الأخيرة قبل الحصول على وظيفة، بيقيم فيها المسؤولين عن التوظيف المرشح لوظيفة معيّنة سواء كانوا في قسم الموارد البشرية في الشركة / المؤسسة أو كان المدير المباشر للدرجة الوظيفية وبيختبر الموظفين اللي هيشتغلوا معاه، وبيحاول صاحب المقابلة يقيّم الشخص المتقدم في وقدرته على التواصل حتى ولو تحت ضغط ومهارته في استعراض قدراته ورؤية مظهره سواء لغة الجسد ومخارج الألفاظ وحتى الملابس لتحديد درجة مناسبة الشخص للوظيفة.

2- الاستعداد قبلها 

– لازم تقرأ كويس عن الشركة اللي هتقدم فيها وعن تاريخ تأسيسها ووزنها في السوق والخدمات اللي بتقدمها ومبيعاتها، سهل تعرفه من خلال محرك البحث Google من خلال تقارير صحفية أو كلام مؤسسات/ أفراد تانية عنها، بجانب دخولك على موقعها الرسمي لو مُتاح ومعرفة كل تفاصيلها.

– موقع (لينكد إن) هيساعدك تتعرف على المديرين الرئيسيين للشركة وهيتيحلك تصفح سيرهم الذاتية عشان تتعرف على خبراتهم والشهادات اللي حصلوا عليها، وكمان تتعرف على حسابات الموظفين عليه عشان تعرف مستواك بينهم وتحدد نسب قبولك في الوظيفة. 

– ذاكر كويس كل المعلومات اللي تعرفها عن الشركة وحاول تربطها بمهاراتك وقدراتك وخبراتك السابقة وامسك ورقة وقلم وافترض كل الأسئلة اللي ممكن تتسألها وجهّز رد منطقي ليها 

3- المظهر (اللبس) 

– اسأل في مكالمة هاتفية أو إيميل رسمي عن طبيعة اللبس واللون عشان تلتزم بيه 

– التزم بألوان وقورة وهادية قدر المستطاع، الخبراء بينصحوا بألوان الأسود والرمادي والأزرق الغامق بدرجاتهم وبتجنب الأحمر والبرتقالي والبني أو أي قطعة ملابس فيها أكتر من لون

– ضروري تهتم بنظافة اللبس وكويه واختار حذاء مناسب للملابس وشكله أنيق 

– بلاش تبالغ في قصة شعر غريبة وخليك طبيعي وهذّب دقنك لو طويلة ومش هتحلقها 

– مهم تتجنبي الميك أب المبالغ فيه وخليكي بسيطة قدر المستطاع ولو محجبة اختاري طرحة سادة خالية من النقشات  

4- التصرّف داخل الإنترفيو: 

– خليك مبادر وابتسم بلطف في وجه اللي بيعمل معاك الإنترفيو وشوف لو الأجواء تسمح بالسلام بالإيد ولا لأ 

– استقبل منّه الكلام ورد على أسئلته في أول دقيقة بحدود عشان تراقب طبيعة تواصله معاك وترد عليه بنفس الطريق، مثلًا لو الشخص بيهزر معاك رد عليه بطريقة متماشية مع كلامه بس بحدود، لكن لو جاد في كلامه يبقى مهم تبقى على نفس القدر من الجدّية 

– اطلب إعادة صياغة السؤال لو مش فاهمه في البداية وبلاش تخجل من تصريحك بعدم الفهم، ورد في صلب الموضوع وبلاش تفتح موضوعات فرعية 

– بلاش تفرض سيطرتك علي مجرى الحوار وافتكر إنك موجود عشان تتسأل وتجاوب مش عشان تطرح أسئلة وتتكلم عن حياتك إلا لو اتطلب منّك ده 

5- السيطرة على التوتر: 

– اعرف إن هدف المقابلة الأساسي هو تقييم قدرتك على تحمّل الإجهاد العصبي أو الذهني بسبب الوظيفة 

– افتكر إنه مفيش داعي للقلق طالما مستعد كفاية وجاهز لكل الأسئلة وعارف كل المعلومات المتاحة، وخليك جرئ وفكّر إن ده تحدي في حياتك لازم تنجح فيه، واعرف إن الشخص اللي بيعمل معاك الإنترفيو كان مكانك في يوم من الأيام 

– تخيّل نجاح المقابلة وقبولك في الوظيفة واسترجع لحظات النجاح والتحقق في حياتك 

– تمارين التنفس هتساعدك تتخطى أي قلق أو توتر، ومنها إنك تاخد نفس عميق وتكتمه وتفرّغه ببطء على 5 مرات، وتكرر التجربة 3 مرات ورا بعض 

– خلي جسمك مفرود وركّز في عين الشخص اللي قدامك أثناء الكلام وخليك واثق في نفسك ومهاراتك وقدرتك على تطويرها 

– اشرب مياه بكمية مناسبة لأن دراسات كتير أثبتت إن الجفاف دوره أساسي في التوتر خصوصًا في مقابلات العمل 

6- إظهار المهارات: 

– حافظ على نبرة صوتك ثابتة قدر المستطاع مع الصعود والهبوط فيها ولكن في أضيق الحدود، وتجنّب الحديث المتصاعد (رفع نبرة الصوت في نهاية الجملة) لأنه بيعبر عن سلوك غير ناضج

– بلاش تتكلم عن مدى المجهود والتعب اللي بذلته في شغل معين، والأهم اتكلم عن نتايج واقعية ملموسة بالأرقام، وتجنّب الحديث السلبي المفرط عن مكان شغلك القديم

– اربط إجاباتك بالأسئلة بمهارة أو تجربة استفدت منها في شغلك القديم، مثلًا لو السؤال كان عن طموحاتك في الشغل ابدأ  بإنجاز عملته مهما كان صغيّر وابني عليه باقي طموحاتك

– اربط دايمًا مهاراتك بأهداف المؤسسة وركّز على الإضافات المطلوبة لتحسين النتايج واظهر قدرتك عليها بفهم مش مجرد كلام

– خليك مستعد لأي تجربة عملية خصوصًا لو شغلك فيه جزء تقني بالإيد، وخلي معاك سابقة أعمالك جاهزة على موبايلك أو على فلاشة

-بعد انتهاء المقابلة غالبًا هيتطلب منّك طرح أي أسئلة، وقتها لازم تظهر اهتمامك وتطرح أسئلة مرتبطة بصميم شغلك أو على شيء مش واضح بالنسبة لك في البيانات المنشورة عن الشركة على موقعها الرسمي

– بلاش تسأل عن الأجازات إلا مع استلام الوظيفة أو على الأقل بعد مقابلة العمل (الإنترفيو)