المحتويات
البروستاتا هي غدة صغيرة مكانها تحت المثانة وبتعتبر جزء من الجهاز التناسلي الذكري وليها دور كبير في إفراز السائل المنوي بجانب بعض السوائل التانية، ولكن مع حدوث أي أعراض تضخم فيها ممكن تسبب التهابات بتسيب تأثير كبير سواء على الصحة الإنجابية والصحة العامة سواء الجسدية أو النفسية.
تطور نمو البروستاتا
- بتعتبر كتلة خلايا صغيرة عند الأجنة والأطفال الرضع وبتنمو مع ارتفاع هرمون التستوستيرون في الجسم خصوصًا في فترة المراهقة
- بيتضاعف حجمها في سن المراهقة ولحد سن 20 سنة وبعدها بيستقر النمو ومش بيزيد أو بيقل
- بتستأنف البروستاتا نشاطها في سن الـ 40 وجزء كبير من الرجال في المرحلة دي بيمرّوا بتجربة التضخم الحميد في البروستاتا
- بتنمو البروستاتا حوالين الأنبوب الصغير اللي بينقل البول للقناة البولية ولكن مع تضخمها في بداية الـ 40 بتزيد فرص حدوث احتباس بولي نتيجة تضخم البروستاتا
- بتضغط البروستاتا على الأنبوب الصغير وبتصعّب مهمة تفريغ المثانية وبيزيد الألم وممكن تتكوّن حصوات فيها
- عدم علاج الحصوات بدري ممكن يتطور لحدوث التهابات في المثانة والبروستاتا
أعراض مشاكلها
- ألم شديد أثناء التبول أو بعد الانتهاء منّه وبيتركز أسفل البطن
- انخفاض تدفق البول وظهوره فقط في شكل نقاط صغيرة
- تبول مستمر ومندفع بقوة كبيرة وضعف السيطرة عليه
- انتشار الألم للمناطق المحيطة بالحوض زي الظهر والبطن
- الأعراض بتبقى بسيطة وبتزيد حدتها مع الوقت خصوصًا مع استمرار ضغط البروستاتا المتضخمة على مجرى البول
- مع وجود التهاب شديد في البروستاتا بتزيد أعراض زي:
- حرقان البول
- ألم شديد وقت قذف السائل المنوي
- ظهور أعراض أنفلونزا شديدة (بتحصل بسبب العدوى البكتيرية أو الجرثومية)
- الإحساس بألم شديد في القضيب والخصيتين
المضاعفات
- تراكم البول في المثانة بسبب تضخم البروستاتا بيعتبر بيئة خصبة لنمو البكتيريا والجراثيم ومع الوقت بتسبب التهابات في المسالك البولية
- ممكن تتسبب البكتيريا والجراثيم في وجود التهاب شديد فيها واللي بيحصل فجأة أو بالتدريج على مراحل كتير
- التضخم الحميد فيها مع وجود حصوات في الكلى أو بقايا موجودة في جدار المثانة بيسبب ضعف في الأوعية الدموية في الجهاز البولي
- بتطور لظهور دم في البول وانتفاخ وتمزق الأوردة ومع وجود دم مختلط بالبول واحتباس البول لفترة طويلة ممكن يرجع للكليتين ويسبب فشل كلوي
- عدم تفريغ المثانة باستمرار بيسبب تلف فيها أو تجمّع الحصوات وممكن ينتج عنها عدوى تسبب التهابات
- عدم علاج مشاكلها سواء تضخم شديد أو التهاب ممكن يزوّد فرص الإصابة بتشوهات في الحيوانات المنوية والعقم
- الدراسات بتقول إن مفيش دليل مباشر على إن التهابها بيؤدي للسرطان
أدوية لعلاجها
- لعلاج تضخم البروستاتا أدوية كتير زي:
- تادالافيل (Tadalafil) واللي بيستخدم كمان في علاج ضعف الانتصاب
- بيبون بلس (Pepon Plus)
- دوزين (Dosin) واللي بيعالج كمان ارتفاع ضغط الدم
- أما التهابها بيتعالج بطرق كتير حسب شدته لكن في أغلب الأحيان بيحتاج مضاد حيوي قوي زي:
- تريميثوبريم-سلفا (Trimethoprim-sulfa)
- سيبروفلوكساسين (Ciprofloxacin)
- يفوفلوكساسين (Levofloxacin)
- بس لازم تستشير طبيب متخصص وقت ظهور أي أعراض وبلاش تاخد الأدوية إلا تحت إشراف طبيب متخصص
حماية البروستاتا بطرق طبيعية
- خبراء كتير بيقولوا إن النظام الغذائي عالي الدهون والسكر بيزود خطر الإصابة بأمراض البروستاتا
- جمعية السرطان الأمريكية بتقول إن سرطان البروستاتا أكتر أنواع السرطانات انتشارًا بين الذكور ومن قبلها خبراء كتير بحثوا في طرق طبيعية لحمايتها من السرطانات وتقليل أعراض التضخم الحميد أو الالتهابات الشديد
- دراسة بتأكد إن الطماطم غنية بمضادات الأكسدة اللي بتقلل التهابات البروستاتا سواء نية في السلطة أو أو مطبوخة
- البروكلي غني بمواد كيميائية بتحميها من الأمراض خصوصًا السرطان
- اشرب كوباية شاي أخضر كل يوم
- فول الصويا من البقوليات اللي بتساعد على الحماية من أمراضها
- الرمان غني بمضادات الأكسدة اللي بتحافظ عليها
- دراسة صينية بتقول إن شرب القهوة يوميًا بيقلل فرص الإصابة بأمراضها
- حافظ على نظام غذائي صحي غني بأوميجا 3 واهتم بتناول الأسماك
- اشرب كوباية جنزبيل أو شاي بالجنزبيل يوميًا أو أي مشروب خالي من الكافيين عشان يساعدك على التبول باستمرار وبالتالي طرد البكتيريا من المثانة
- الاستحمام بمياه دافية بيقلل الأعراض وبيحمي البروستاتا
- ابعد عن الجلوس لمدة طويلة خصوصًا وقت قيادة العجل
- دراسة أثبتت إن الأطعمة الحراقة والحمضية والإفراط في لمشروبات الغنية بالكافيين بتزوْد خطر الإصابة بمشاكلها
