المحتويات
لحمة العيد هي المكون الأساسي على السفرة طول أيامه وحتى في بعض الأحيان بعد انتهائه، السفرة المصرية مشهورة بالأكلات الشهية اللي بتعتمد على أجزاء ومشتقات الأضحية زي الفتة والفخدة والممبار والكرشة والرقاق وغيرها، وبتتنوع وتختلف طريقة تحضيرها سواء كان في الفرن أو الشوي أو التحمير، هنقولك وصفات جديدة بقطعيات مختلفة لتجديد سفرتك طول أيام العيد.
ريش بالتوم والروزماري
المكونات
- 5 قطع ريش
- ملح وفلفل أسود
- معلقة كبيرة روز ماري فريش مفروم
- معلقتين كبار زبدة
- 3 فصوص توم مفروم
- معلقة صغير زعتر مفروم
الطريقة
- نشف قطع الريش بمناديل ورقية وتبلها بالملح والفلفل الأسود
- سيح الزبدة في طاسة غير قابلة للالتصاق وشوح الريش لحد ما لونها يتحول لبني حوالي 5 دقايق على نار متوسطة
- ضيف باقي الزبدة مع التوم والروزماري والزعتر وقلب لحد ما الزبدة تتحول لسايل
- بمعلقة وزع الزبدة فوق لحمة الريش لمدة 3 دقايق لكل جانب
- ممكن تاكلها مع بطاطس محمرة وخضار سوتيه
فخدة روستو
المكونات
- فخدة ضاني (حوالي 2 كيلو)
- ربع كوباية زيت زيتون
- معلقة كبيرة روز ماري مفروم
- فصين توم
- كيلو ونص بطاطس بحجم صغير
- 4 كوبايات شوربة
- معلقتين كبار دقيق
- تلت أربع كوباية خل بلسميك
- ملح وفلفل أسود
الطريقة
- اخلط زيت الزيتون مع الروزماري والتوم والملح والفلفل الأسود وافرك بهم سطح الفخدة
- اشويها في الفرن على درجة حرارة 180 لمدة 15 دقيقة
- قلل حرارة الفرن لـ160 درجة لمدة ساعة و 15 دقيقة
- ضيف البطاطس في نفس صينية الفخدة وسيبها لمدة 40 دقيقة
- قلب البطاطس ووزع عليها وسطح الفخدة كمية من السوايل الموجودة في الصينية
فلفل محشي شرايح لحمة
المكونات
- نص كيلو لحمة مقطعة شرايح
- 4 ثمرات فلفل أخضر كبيرة مقطعة نصين
- معلقة كبيرة زيت
- بصلة كبيرة مقطعة شرايح
- كوباية مشروم مقطعة شرايح
- ملح وفلفل أسود
- معلقة صغيرة بهارات
- كوباية ونص جبنة شيدر مبشورة
الطريقة
- في صينية افرد ورقة زبدة وادهنها بكمية مناسبة زيت
- رص الفلفل ودخله الفرن لمدة 30 دقيقة
- في طاسة.. سخن الزيت وشوح البصل والمشروم لمدة 6 دقايق وتبلهم بالملح والفلفل الأسود
- ضيف اللحمة والبهارات وقلب كويس لحد ما اللحمة تستوي
- وزع كمية صغيرة من الجبنة في قعر ثمرات الفلفل وعليهم كمية مناسبة من اللحمة
- ضيف باقي الجبنة على سطح الفلفل ودخله لفرن لمدة 3 دقايق
لحمة بالطريقة المغربية
المكونات
- 2 كيلو لحمة مقطعة مكعبات صغيرة
- 3 كوبايات شوربة (ممكن تستخدم شوربة فراخ)
- 3 معالق كبار زيت زيتون
- كوباية مشمش مجفف
- بصلة كبيرة مفرومة
- نص معلقة صغيرة كزبرة
- معلقتين كبار صلصة
- 4 فصوص توم مفروم
- ملح وفلفل أسود
- 2 فص حبهان
- رشة جوزة الطيب
- معلقتين كبار جنزبيل فريش مفروم
- عود قرفة
- 2 – 3 عود قرنفل
- نص كوباية شرايح لوز محمص
الطريقة
- اغلي الشوربة وضيف المشمش المجفف لمدة 15 دقيقة
- سخن الزيت في الطاجن المغربي وضيف مكعبات اللحمة وشوحها لمدة 4 دقايق على كل الجوانب
- ارفع مكعبات اللحمة وضيف البصل وقلب لمدة 5 دقايق
- ضيف التوم والجنزبيل وقلب لمدة دقيقة وضيف صلصة الطماطم والقرفة والقرنفل والكركم والكزبرة والملح والفلفل الأسود
- حط الشوربة مع المشمش ومكعبات اللحمة للخليط السابق
- بعد ما الخليط يغلي.. قلل النار وغطي الحلة وسيبهم لمدة ساعة ونص
- ممكن تستغني عن الطاجن المغربي بأي طاجن بغطا أو حلة عادية
- قدمه مع كسكسي مسلوق
لحمة على الطريقة الإيطالية
المكونات
- نص كيلو لحمة مقطعة شرايح
- بصلة مفرومة
- ثمرة فلفل أصفر مقطعة شرايح
- نص كيلو طماطم مفرومة
- فرع روزماري
- معلقتين كبار زيت زيتون
- فص توم
- ربع كوباية زيتون أسود
الطريقة
- شوح البصل والتوم في زيت الزيتون لمدة 5 دقائق
- ضيف شرايح اللحمة والفلفل الأصفر والطماطم والروزماري
- سيب الخليط يغلي لمدة 15 دقيقة لحد اللحم ما تستوي
- وزع الزيتون وقلب المكونات وارفعها من على النار
- ممكن تقدمها مع أرز أبيض أو في ساندوتشات
