تكنولوجيا
كيفية تفعيل خاصية العثور على جهازي والتصرف عند فقدان الموبايل
إزاي تسترجع موبايلك المفقود؟
(العثور على جهازي) خاصية موجودة في كل الموبايلات الأندرويد والآيفون بتسهل أحيانًا العثور على التليفون المفقود لو متصل بالإنترنت بجانب خطوات تانية تقدر تعملها بعد تحديد الموقع الجغرافي للتليفون.
تفعيل العثور على جهازي
- اعرف إن من شروط الاستفادة من تفعيلها هو إتصال تليفونك بالإنترنت سواء بالواي فاي أو عن طريق بيانات الهاتف
- ضروري تعرف طريقة تفعيلها سواء على الآيفون أو على هواتف الأندرويد
للآيفون
- افتح Settings واضغط على Apple ID واختار iCloud ومكّن كل التطبيقات اللي عايز تعمل منها نسخة احتياطية
- فعّل iCloud Drive عشان تقدر تتصفحهم
- اتأكد إن Find my Iphone متفعّلة عن طريق الدخول على اسمك وصورتك فوق خالص بعد الدخول على Settings مباشرة وفعّل Find my Iphone
- ضروري تفعل النسخة الاحتياطية عشان تظهر خاصية Find My Iphone وتبقى قادر على تفعيلها
- وقت فقدان التليفون بتدخل على الجزء المخصص للبحث عن الآيفون داخل موقع الـ icloud عشان تقدر تحدد مكانه بدقة
للأندرويد
- لتفعيل خدمة الموقع الجغرافي/ Location افتح إعدادات/ Settings وادخل على الموقع الجغرافي/ Location وبعدها فعّله
- ضروري تفعل خدمة العثور على جهازي/Find My Phone عن طريق الإعدادات/ Settings وبعدها افتح أمان/Security
أو الأمان والموقع الجغرافي/ Security and Location هتلاقي داخلها العثور على جهازي/ Find My Phone
وقتها ضروري تفعّلها - ادخل على الموقع المخصص لتتبع الموبايل الأندرويد المسجل عليه لو تليفونك ضايع واعمل تسجيل دخول بحسابك الأساسي على التليفون وساعتها هتقدر تحدد الموقع الجغرافي لتليفونك عن طريق الرابط ده
إجراءات ضرورية بعد سرقة أو فقدان الموبايل
- اعمل محضر في قسم الشرطة اللي وقعت السرقة أو فقدت موبايلك في دايرته
- لازم المحضر يتضمن بيانات الهاتف (الماركة واللون والرقم المسلسل الموجود على العلبة)
- المحضر هيتحول للنيابة العامة وبعدها للمحامي العام هيكتب المحامي العام خطاب استعلام لشركات المحمول
- لما يستعمل السارق الهاتف بشريحة تابعة لأي شركة محمول هتنتبه الشركة للواقعة وهتسجلها فورًا
- هتبعت خطاب فيه بيانات الشريحة بالاسم ورقم البطاقة والعنوان المكتوب فيها وبيوصل الخطاب للنيابة العامة اللي بتصدر قرار ضبط وإحضار للسارق
- ضروري تغير كلمات السر المرتبطة بحساباتك على مواقع التواصل الاجتماعي فورًا
- اتصل بالبنك واوقف بطاقات الائتمان لو بتشتري أونلاين من الموبايل
- روح لأقرب فرع لشركة الاتصالات التابع ليها وبلّغهم فقدانك للشريحة واحتياجك لشريحة تانية بنفس الرقم
