الصمت هو حالة السكون وغياب مسببات الصوت سواء كانت في هيئة كلام أو مصدر مزعج زي آلة معيّنة أو صوت من أصوات الطبيعة، والخبراء بيأكدوا إنه بينعكس على الشخص بفوائد كتير للمخ أو للحالة النفسية والمزاجية وبالتالي ضروري تعرف تأثيره الإيجابي وكيفية التركيز في غيابه.
أهمية الصمت للصحة النفسية
- دراسة بتأكد إنه بيقلل التوتر والقلق وبيزود فرص الاسترخاء
- بيقلل العبء على قشرة الفص الجبهي في الدماغ المسؤول عن القرارات ومعالجة المشكلات
- بيزيد إحساسك بالراحة حتى لو عندك مهام كتير لازم تخلّصها
- بيسمحلك بالتفكير العميق اللي بينتج عنه قرارات صائبة بتزوّد ثقتك في نفسك
- بيساعدك تفكّر خارج الصندوق وبالتالي بيزيد إبداعك وابتكارك اللي بينتج عنّه النجاح في عملك
- بينشّط الإدراك الذاتي والتأمل والتخطيط للمستقبل وبيخليك تستغرق في تخيل تحقيق طموحاتك.. ووقتها بيفرز مخك مواد كيميائية بتحسسك بالسعادة
- بيساعدك على النوم بعمق وده بينعكس على سلامك النفسي وبيقلل تقلّباتك المزاجية
تأثير الهدوء على المخ
- دراسة في جامعة ديوك بتقول إنه بيجدد خلايا المخ خصوصًا في منطقة الحصين المسؤولة عن التعلم ومعالجة العواطف
- أمراض زي القلق المزمن والاكتئاب بيرتبطوا بانخفاض معدلات تجدد الخلايا العصبية في الحصين
- منظمة الصحة العالمية أكدت في تقرير ليها إن الضوضاء ليها تأثير على الإنسان
- سواء في السلوك أو على الصحة النفسية والجسدية والتركيز والمهام العقلية
- ودراسات كتير بتقول إن الهدوء بيسبب أثر فعال على المخ ونشاطه ومهامه
- دراسة في جامعة أوجستا الجورجية بتأكد في تجربة إنه أثر على نشاط مخ الفئران
- بيزود نشاط خلايا جديدة داخل الحصين المسؤول عن العواطف والذكريات ومع الملاحظة أكد الخبراء إنها تعتبر خلايا عصبية كاملة وده بعد تعرضها للهدوء ساعتين يوميًا
- دراسة تانية بتقول إن الهدوء بيساعد على معالجة المعلومات واستيعابها أسرع وحل المشكلات وقت الهدوء بياخد وقت أقل ودقة وتركيز أعلى
- وبتأكد الدراسة إنه بيسمح لعقلك بمساحات أوسع من الإبداع والابتكار
كيفية التركيز وقت الضوضاء
- استخدم سدادات الأذن أو حط سماعات في ودنك وشغل موسيقى هادية
- ابحث على White Noise على اليوتيوب وشغلها في السماعات بصوت منخفض
- لو مفيش اختيارات تانية الأحسن تختار المكان اللي الضوضاء فيه مستمرة على وتيرة واحد
- انقاطعها ورجوعها مرة تانية بيشتت التركيز أكتر من استمرارها لمدة طويلة
- حدد مصدر الصوت واقعد في أبعد مكان عنه واختار أبسط المهمات اللي تعملها في الوقت اللي الصوت فيه عالي
- وقسم شغلك على فترات بسيطة بينهم راحة عشان تركز أكتر
- اهتمامك بتناول وجبة خفيفة وشرب المياه هيساعدك تعلي تركيزك
- فرد الجسم وتحريك عضلاته هيساعدك تركز أكتر وحدد وقت معين تخلص فيه المطلوب منك وحاول تلتزم بيه
