المحتويات
كأس الحيض أو أكواب الدورة الشهرية أحد بدائل الفوط الصحية وهو عبارة عن كوب مرن مصنوع من السيليكون أو مطاط اللاتكس، هنقولك إيجابياته وسلبيات استخدامه عشان تقرري لو مناسب ليكي.
إيجابيات كأس الحيض
- ممكن تستخدميها لفترة طويلة لحد 12 ساعة في المرة الواحدة وبتختلف حسب غزارة الدورة الشهرية وبالتالي عملية أكتر من الفوط الصحية والسدادات القطنية
- سعرها مناسب وأكتر أمان من السدادات القطنية لأنها بتقلل خطر الإصابة بالتهابات الحكة الجلدية
- بتتحمل كمية أكبر من الدم من الوسائل التانية
- آثرها أقل على البيئة
- بتقلل الشعور بالرائحة المصاحبة للدورة الشهرية
طريقة استخدام كأس الحيض
- اقري التعليمات اللي مع العلبة الأول عشان تفهمي طبيعة الكأس وطريقة استخدامه بشكل مبدئي
- المرة الأولى لتجربتها لازم تكون أثناء الدورة الشهرية لأن مكان عنق الرحم في بعض الحالات بيتغير عن الأيام العادية
- الكأس ليه أشكال طيات مختلفة ممكن تتفرجي وتتدربي عليهم الأول عشان تختاري الأنسب والأسهل ليكي، وطية الكأس على شكل حرف C هي الأكتر استخداما
- اغسلي إيدك كويس واغسلي الكأس بالمياه بس لإزالة أي أتربة أو ميكروبات وتجنبي غسله بالصابون لأنه ممكن يسبب التهاب المهبل الفطري
- حاولي ترخي عضلات جسمك تماما وخاصة عضلات الحوض عن طريق شدها وإرخائها (تمارين كيجل) لأن التوتر هيزود الألم أثناء إدخاله
- اقعدي في وضع مريح على قاعدة الحمام زي وضع القرفصاء أو رفع قدم واحدة على حافة الحوض واسندي ضهرك على الحائط أو النوم على الأرض مع رفع الركبتين لأعلى وسيبي مسافة بين القدمين
- حركي إصبعك على المهبل عشان تحددي مكان عنق الرحم عشان تقدري توجهي الكاس بشكل سهل وسريع
- اتني الكأس وامسكيه بإيد واحدة ودوري على فتحة المهبل بالإيد التانية وادفعي الكأس بزاوية 45 درجة في اتجاه المهبل وتجنبي الدفع المباشر
- لازم الكأس يكون مفتوح واستمري في الدفع برفق لحد ما تحسي بارتياح وممكن يتحرك للأعلى أو للأسفل لكن لازم قاعدة الكأس تكون مرتكزة على موضع المهبل
- اتأكدي إن الكأس مفتوح من خلال استشعار المكان حوالين قاعدة الكأس لأنها لازم تكون مستديرة أو حتى بيضاوية، وممكن الكأس لا يفتح بشكل كامل وبالتالي حسب شكل الجسم
- افتحي الكأس يدويا في حالة عدم فتحه
- ممكن تحتاجي تفرغيه أكتر من مرتين في اليوم حسب كمية تدفق الدم وممكن يستمر لحد 12 ساعة
- الأفضل تلبسي فوطة صحية مع الكأس في المرات الأولى للأمان لحد ما تعرفي المعدل المناسب لتفريغ الكأس بالنسبالك
طريقة إزالة كأس الحيض
- اغسلي إيدك كويس بالمياه والصابون
- ارخي عضلاتك تماما عشان الكأس يتحرك للأسفل بسهولة واستمري لحد ماتوصلي لعنق الرحم
- امسكي الكأس من مكان مناسب في القاعدة وليس عنق الكأس واستمري في السحب
- الضغط على القاعدة بيساعد على اختراق الفراغ وسهولة إزالة الكأس
- خرجيه بشكل مستقيم لتقليل الانسكاب أثناء خروجه من فتحة المهبل واتنيه في شكل حرف C
- فرغي محتويات الكأس في الحوض أو قاعدة الحمام واغسليه بالمياه لو هو من النوع القابل للاستخدام أكتر من مرة
- ممكن تعقميه عن طريق غليه مع مياه أو بالكحول أو عن طريق استخدام أقراص تعقيم
سلبيات كأس الحيض
- تسرب الدم من الكأس في حالة نسيان تغييره
- الشعور بالألم عند وضعه سواء بسبب طول الضوافر أو دفعه بشدة
- زيادة فرص الإصابة بالعدوى البكتيرية في حالة عدم الاهتمام بالنظافة الشخصية
- ممكن يسبب رد فعل تحسسي أو تهيج المهبل
أنواعه
ينقسم بشكل أساسي لنوعين:
- نوع بيستخدم مرة واحدة
- كأس بيستخدم أكتر من مرة لكنه بيحتاج عناية شديدة في التنضيف والتعقيم بعد الانتهاء من الحيض وقبل استخدامه مرة تانية
موانع استخدامه
في حالات معينة الأفضل تتجنب استخدامه زي:
- التشنج المهبلي
- الأورام الليفية الرحمية
- الانتباذ البطاني الرحمي
- تغيرات في موضع الرحم
