فوائد الموز: غني بالفيتامينات وبيساعد على النوم الجيد

فوائد الموز متعددة، لأنه غني بالعناصر الغذائية زي البوتاسيوم والنحاس وفيتامين سي، ومن الأطعمة اللي بتطول فترة الشبع وبتحسن الحالة المزاجية.

الموز وعناصره الغذائية

كل موزة متوسطة (118) جم فيها:

• 9% من احتياجك اليومي من البوتاسيوم
• 33% من احتياجك اليومي من فيتامين ب6
• 11% من احتياجك اليومي من فيتامين سي
• 8% من احتياجك اليومي من الماغنيسيوم
• 10% من احتياجك اليومي من النحاس
• 14% من احتياجك اليومي من المنجنيز
• 24 جم كربوهيدرات
• 3.1 جم ألياف
• 1.3 جم بروتين
• 0.4 جم دهون
• 105 سعر حراري
• الكربوهيدرات في الموز الأخضر مكونة بشكل أساسي من النشويات المقاومة وليها فوائد كتير زي سد الشهية وتحسين الهضم

فوائد الموز لضبط مستوى السكر في الدم

• الموز غني بالبكتين، وهو نوع مهم من الألياف، والموز الأخضر من أنواع النشا المقاومة، وجمعهم مع بعض بيساعد في ضبط مستوى السكر في الدم بعد الأكل وسد الشهية
• معدل الموز على مؤشر جلايسيمي (هو تصنيف للكربوهيدرات على مقياس من 0 لحد 100 على مدى ارتفاع السكر في الدم بعد تناولها) من منخفض لمتوسط، الموز الأخضر حوالي 30 والموز المستوي 60 وبالتالي فهو لا يسبب ارتفاع مفاجيء في مستوى السكر في الدم
• الموز المستوي بكميات غير مناسب للمصابين بداء السكري 2 لأنه بيسبب ارتفاع في مستوى السكر في الدم

فوائد الموز لصحة الجهاز الهضمي

• كمية الألياف في الموز بتساعد في حماية الجهاز الهضمي من الأمراض وبتزود البكتيريا النافعة فيه
• البكتين (نوع من الألياف) بيساعد في الوقاية من سرطان القولون
• بيحسن حركة المعدة وبيساعد على انتظام دخول الحمام

الموز لإنقاص الوزن

• لا توجد دراسات عن دور الموز في إنقاص الوزن، لكنه ليه فوائد معروفة ممكن تساعد أثناء إنقاصه
• الموز قليل السعرات الحرارية
• الألياف ليها دور في الحفاظ على الوزن وإنقاص الوزن لأنها بتشبع لفترات طويلة
• النشا المقاومة بتسد الشهية وبتطول فترة الشبع

فوائد الموز لصحة القلب

• البوتاسيوم من أهم العناصر الغذائية للقلب، وخاصة التحكم في ضغط الدم
• البوتاسيوم في الموز بيساعد على خفض ضغط الدم وقلة خطر الإصابة بأمراض القلب بحوالي 27%
• الماغنيسيوم ليه دور في الحفاظ على صحة القلب

الموز كمضاد للأكسدة

• غني بأنواع مختلفة من مضادات الأكسدة زي الكاتشين والدوبامين
• مضادات الأكسدة ليها دور مهم في الوقاية من الأمراض زي أمراض القلب والشيخوخة
• الدوبامين من الموز لا يسبب الحالة المزاجية الجيدة لأنه مش بيوصل للعقل ولكنه مضاد قوي للأكسدة

فوائد الموز للشبع

• النشا المقاومة فيه بتطول فترة الشبع، خاصة لو الموز غير مستوي
• الموز المستوي فيه كمية أقل من النشا المقاومة ولكن فيه كمية أعلى من الألياف الذائبة
• البكتين والنشا المقاومة بيطولوا فترة الشبع بعد الوجبات

فوائد الموز لحساسية الأنسولين

• حساسية الأنسولين من أهم أسباب الإصابة بأخطر الأمراض زي داء السكري 2، وهي مدى حساسية الجسم للأنسولين وبتأثر على كيفية استخدام خلايا الجسم للجلوكوز في الدم
• دراسات كتير أثبتت إن 30-15 جم يوميا من النشا المقاومة بيحسن حساسية الأنسولين بحوالي 50-33%

فوائد الموز لصحة الكلى

• البوتاسيوم مهم لصحة الكلى والتحكم في ضغط الدم
• دراسة أثبتت إن أكل الموز 3-2 مرات أسبوعيا بيقلل خطر الإصابة بأمراض الكلى بحوالي 33%
• دراسات تانية أثبتت إن أكل الموز 4-6 مرات أسبوعيا بيعلي خطر الإصابة بأمراض الكلى بحوالي 50% عن الأشخاص غير المنتظمين على أكله

فوائد الموز للتمرين

• الموز غني بالمعادن والعناصر الغذائية اللي جسمك محتاجها أثناء وبعد التمرين
• بيقلل آلام العضلات بعد التمرين وبيزود قدرتك على التحمل أثناء التمرين

فوائد الموز للربو

دراسة أثبتت إن أكل الموز بيقلل أعراض نوبات الربو بسبب مضادات الأكسدة والبوتاسيوم اللي فيه، ولكن الدراسات في النقطة دي محدودة

الموز للوقاية من سرطان الدم

• الأبحاث أثبتت إن مادة اللكتين في الموز ممكن تساعد على توقف نمو خلايا سرطان الدم، لأنها مضادة للأكسدة
• دراسة تانية أثبتت إن الأطفال المنتظمين على أكل الموز وشرب عصير البرتقال عندهم فرص أقل للإصابة بسرطان الدم

فوائد الموز لصحة العقل

الموز غني بمادة التريبتوفان، وهي حمض أميني بيساعد على تحسين الذاكرة، وزيادة القدرة على التعلم والفهم، وبيحسن الحالة المزاجية

فوائد الموز لتحسين الحالة المزاجية

• فيه حوالي 6% من احتياجك اليومي من فيتامين ب9، وده عنصر مهم للوقاية من الاكتئاب وتحسين المزاج
• بيحفز السيروتونين (هرمون السعادة)
• بعض الدكاترة بينصحوا بتناول فيتامين ب9 أثناء الانتظام على مضادات الاكتئاب لزيادة فعاليتهم
• بيقلل معدلات الإصابة بنوبات القلق الزيادة أو الضغط النفسي

فوائد الموز للنوم

الموز غني بمادة التريبتوفان اللي بتساعد على تحسين جودة النوم وتنظيمه في حالة أكله قبل النوم

الموز لخفض الكوليسترول 

هو غني بمركب Phytosterols اللي بتساعد في خفض الكوليسترول الضار في الجسم

فوائد الموز لحرق الدهون

الموز فيه حوالي 12 مجم (3% من احتياجك اليومي) من عنصر الكولين اللي بيساعد على حرق الدهون وخاصة دهون البطن

محاذير تناول الموز

بعض الحالات هتحتاج تاكل كمية أقل من الموز، زي:

• لو منتظم على أدوية Beta Blockers لأنها بتعلي نسبة البوتاسيوم في الدم، وده بيأثر على صحة الكلى وممكن يوصل لدرجة مميتة
• في حالة ظهور رد فعل تحسسي زي تورم الوجه أو الكحة
• ممكن يحفز الإصابة بالصداع النصفي عند بعض الأشخاص