فرط الحركة عند الأطفال.. إيه هو وإزاي تكتشفه؟
المحتويات
فرط الحركة أو (Attention deficit hyperactivity disorder) هو اضطراب نقص الانتباه مع فرط الحركة واللي بيسبب درجات عالية من الحركة والسلوك الاندفاعي، والشخص المصاب بيه بيواجه صعوبة في التركيز على مهمة واحدة أو الجلوس في نفس المكان لمدة طويلة، وبالرغم إن في بعض الأطفال بيعانوا من جانب واحد من الاضطراب سواء كان قصرالانتباه أو فرط الحركة إلا إن معظمهم بيعانوا من مزيج الاضطرابين باختلاف درجات أعراض كل اضطراب.
ممكن الأطفال والبالغين يكونوا مصابين بيه وليه أعراض كتير ممكن تكتشف من خلالها الإصابة
أعراض فرط الحركة عند الأطفال
-عدم قدرته في التركيز على التفاصيل: وهي واحدة من أهم الأعراض وبتسبب إنه يغلط غلطات بسيطة وساذجة كنتيجة لقلة انتباهه سواء في المدرسة أو البيت
-قلة التيقظ والتنبيه: الطفل بيواجه صعوبة في إنه يفضل منتبه أثناء عمل شيء معين سواء في المدرسة أو اللعب وبيبان غير منتبه ليك حتى لو وجهتله الكلام بشكل مباشر
-صعوبة اتباع التعليمات: بيواجه صعوبة في تنفيذ واتباع التعليمات اللي بتقولها ولا ينجح في معظم الأحيان
-التنظيم: بيواجه صعوبة في التنظيم سواء أثناء المذاكرة أو تحضير أدوات المدرسة أو اتباع خطوات معينة
-الهروب من الطلبات: بيحاول يهرب دايما من المهام اللي وراه سواء في البيت أو المدرسة
-ضياع الأغراض: بيزيد عنده تكرار فقدان أدواته زي القلم والكتب والألعاب
-تشتت الانتباه: الطفل بسهولة بيلتفت لمؤثرات تانية خارجية وسهل ينسى بعض الأمور
-عدم الارتياح: فهو دائم الحركة في مكانه أو حوالين المكان وسهل يحس بملل أو يتنقل من مكانه لمكان تاني لأنه صعب يقعد في نفس المكان لفترة طويلة زي كرسي المدرسة
-السلوك الاندفاعي: بيظهر في أشكال كتير زي عدم إنهاء كلامه أو الإجابة على سؤال الآخرين بدون ما يسمع باقي السؤال والكلام بصورة مفرطة وصعوبة اللعب بهدوء
-صعوبة الالتزام: بيظهر في عدم قدرته على انتظار دوره زي الطابور مثلا ومقاطعة الكلام أو التشويش على الآخرين لما يتكلموا
-التعليم: ظهور صعوبات في التعليم خاصة في القراءة والحساب
-لو صعب يقعد على الكرسي بدون ما يتحرك أو يقفز في كل مكان
-لو بيتكلم كتير بدون توقف
اكتشافه عند الأطفال
لو ظهر على الأقل 6 من الأعراض السابقة على طفلك في مكانين مختلفين زي المدرسة والبيت، لمدة لا تقل عن 6 شهور والطفل بيكون مش بيتعرض لأزمة نفسية أو عاطفية أو تغيير مكان.. يبقى لازم تستشير طبيب نفسي مختص عشان يساعد في تشخيص حالته
الأعراض عند البالغين
-الاندفاع: الشخص بيميل للتصرف باندفاع في أبسط المواقف
-قلة مهارات التنظيم: بيواجه مشكلة في إدارة الوقت أو ترتيب الأولويات سواء في البيت أو العمل وبيعاني من سوء التخطيط
-قلة التركيز: صعب يركز على مهمة واحدة أو يعمل أكتر من حاجة في نفس الوقت
-ضبط النفس: بيواجه صعوبة في التحكم في نفسه أو في تعبيرات وجهه في مواقف مختلفة
-الحالة المزاجية: بيمر بتقلبات مزاجية متكررة وعصبي معظم الوقت وعنده مشكلة في التعامل مع المواقف الضاغطة
-فرط النشاط: فهو دائم الحركة وسريع التململ وصعب يستمر أو يكمل مهمة معينة
أنواع فرط الحركة
ينقسم الاضطراب لـ3 أنواع أساسية واللي ممكن تزيد بعض الأعراض فيه عن التاني، لكن ده مش معناه انعدام الأعراض التانية وممكم تتغير نسبة ظهور الأعراض في المراحل العمرية المختلفة
-النوع الأول: تشتت الانتباه وبالتالي الأعراض المتعلقة بيه أعلى من الأعراض التانية، ونسبته أعلى عند البنات
-النوع التاني: فرط الحركة والاندفاعية وبالتالي بيغلب عليهم أعراض الحركة المفرطة وسرعة التململ، ونسبته أكتر عند الذكور
-النوع التالت: النوع المشترك وبيشمل أعراض الاضطرابين لكن بدرجات مختلفة وهو أكتر الأنواع انتشارا
أسباب الإصابة
-بالرغم من أبحاث الأطباء المستمرة إلا إن مفيش سبب واضح للإصابة بيه، ومع الوقت والدراسات المختلفة الأطباء رجحوا إن أسباب الإصابة بيه ممكن تكون وراثية أو بيئية زي:
-وجود مشاكل في الجهاز العصبي
-يكون وراثي وإن كل 1 من بين 40 مصاب عنده قريب عائلي على الأقل مصاب بيه
-نقص في مادة الدوبامين في المخ
-إن الموضوع سببه اختلاف تكوين المخ عند الأشخاص المصابة بيه، لأنهم لاحظوا اختلاف حجم المنطقة الرمادي في المخ وهي المنطقة المسؤولة عن الكلام وضبط النفس واتخاذ القرار والتحكم في العضلات
-الدراسات الأخيرة بتقول إن تدخين الأم أثناء الحمل أو شرب الكحول بيزود احتمالية إصابة الطفل بيه
حالات مشابهة لفرط الحركة
حالات تانية تتشابه أعراضها مع أعراض اضطراب (ADHD):
-معاناة الطفل من مشاكل التعلم واللغة
-الإصابة بالأمراض اللي بتأثر على الحالة المزاجية زي الاكتئاب والقلق
-وجود مشكلات في الرؤية أو السمع وبالتالي بيختلط على الآباء الأمر في حالة عدم الاستماع واتباع الأوامر بينها وبين الإصابة بالاضطراب
-معاناة الطفل من اضطرابات النوم أو الغدة الدرقية
تشخيص فرط الحركة
-مفيش اختبار واحد يقدر الطبيب يحدد من خلاله الإصابة لكنه بيجمع أكبر قدر من المعلومات عن الطفل المصاب عشان تساعده في التقييم
-المرحلة الأولى هي عمل فحص طبي شامل فيه أسئلة متعلقة بصحة الطفل وأي مشاكل طبية بيمر بيها والأعراض اللي ظهرت عليه في المدرسة أو البيت
-بيجمع المعلومات الطبية عن الطفل وعائلته الحالية وتاريخهم الطبي
-عمل مقابلات أو استبيانات لأفراد الأسرة والمعلمين وغيرهم من الأشخاص اللي بيتعاملوا مع الطفل بشكل كبير
معايير التشخيص
-لازم تظهر علامات واضحة في المراحل المبكرة في الطفولة أو قبل سن الـ12 سنة
-لازم يظهر عليه 6 أعراض على الأقل
-القيام بسلوكيات غير مقبولة ومختلفة عن الأطفال اللي حواليه وبتظهر في أكتر من بيئة واحدة زي المدرسة والبيت ومع أشخاص مختلفين
-ظهور واستمرار الأعراض دي 6 شهور على الأقل وتكون مش نتيجة لصدمة عاطفية أو عقلية أو مرضية
-بالرغم من إن الأعراض بتظهر في مرحلة مبكرة من العمر زي مرحلة ما قبل المدرسة إلا إن تشخيص الاضطراب بيكون صعب جدا لأن المشاكل التنموية زي تأخر المهارات اللغوية ممكن يتم الاختلاط بينها وبين الإصابة بالاضطراب فمهم تلجأ لطبيب نفسي.
العلاج
-بينقسم العلاج لأكتر من طريقة حسب حالة الطفل واحتياجه، وده اللي بيقرره الطبيب المختص فممكن يلجأ للعلاج السلوكي اللي بيساعد الطفل على التأقلم والتعامل مع سلوكه بشكل صحيح، واستبدال سلوكياته العادية بسلوكيات أكتر إيجابية
-أو العلاج بالأدوية واللي بتأثر على المواد الكيميائية في المخ وبالتالي الشخص المصاب بيقدر يتصرف بطريقة أحسن وأنسب ويركز لمدة أطول
-في بعض الحالات بيتم الجمع بين طريقتين العلاج
-في طرق للعلاج الطبيعي لمساعدة الطفل على تحقيق أكبر فايدة من مجهودات الطبيب زي الانتظام على نظام غذائي صحي ومتوازن
-ممارسة أي نشاط بدني لمدة 60 دقيقة يوميا وانتظام النوم والمحافظة على جودته
-تقليل وقت التعرض للشاشات اليومي زي التلفزيون والموبايل، وتشجيع الشخص على ممارسة اليوجا وتمارين التأمل، وقضاء وقت في أماكن مفتوحة لأنه بيساعد على تطويل فترة التركيز وتقليل أعراض الاضطراب
– قدم للطفل قدر كبير من الحب والعاطفة من خلال تصرفات بسيطة زي الطبطبة عليه، وركز دايما مع تصرفاته الإيجابية وامدحها لأن ده هيساعده يلتزم بيها
-دور على الطرق المناسبة لتحسين صورته عن ذاته وزيادة ثقته في نفسه، فأغلب الحالات بتكون عندها مواهب أو اهتمامات بعيدة عن الدراسة زي حب الحيوانات والرسم والموسيقى، وساعده ينجح فيها لأن الإنجازات البسيطة المتتالية مفيدة ليه
-استخدم كلمات واضحة وبسيطة عند توضيح طلباتك منه وخليك محدد واطلب طلب واحد كل مرة
-حدد المواقف الصعبة عشان تقدر تتجنبها أو تجهز ليها بالطريقة الصحيحة، زي الجلوس لفترات طويلة في السينما أو التسوق
-علم طفلك النظام من خلال عمل كراسة للمهام اليومية وعلمه يكتب فيها وجهز له مكان هادي للمذاكرة ورتب أدواته في غرفته بشكل واضح وبسيط بإنك مثلا تكتب على كل علبة اسم الحاجات اللي جواها عشان تسهل عليه التدوير والترتيب
-اعمل جدول لكل النشاطات في حياته زي الأكل والمذاكرة والنوم لأنه صعب يتأقلم مع التغييرات أو يتقبلها
-ساعده يتعلم عادات صحية يوميا واهتم بأوقات الراحة، وتجنب إنهاكه في نشاط معين لأن ده هيزود أعراض الاضطراب عنده
-اتكلم مع المدرسين في مدرسته واشرحلهم طبيعة حالته، عشان تقدر توفرله الظروف المناسبة زي الـ(Shadow teacher) اللي هتكون معاه أغلب الوقت وتساعده على التركيزغير مدرسة المادة
التجهيز لموعد الدكتور
-اعمل قائمة بكل الأعراض اللي ظهرت عليه في البيت أو المدرسة
-جهز أهم المعلومات الشخصية عنك وعن الطفل زي المرور بظروف صعبة مؤخرا أو الأمراض اللي بيعاني منها الطفل لو في
-اعمل قائمة بكل الأدوية اللي بيتناولها الطفل
-حضر أي تقييمات أو نتايج دراسية أو تقارير مدرسين عن حالته
-جهز قايمة بأهم الأسئلة اللي عايز تسألها للدكتور
العلاقة بين اضطراب فرط الحركة ونقص الانتباه والاكتئاب
-لو الشخص مصاب بالاضطراب فهو في الأغلب مصاب بالاكتئاب، لأن الدراسات أثبتت إن نسبة الاكتئاب بين الأطفال المصابة بالاضطراب أعلى 5 مرات عن الأطفال التانية، وحوالي 31% من البالغين المصابين بيه بيعانوا من أعراض الاكتئاب، فمهم تتكلم مع الطبيب المختص عن احتمالية إصابة الشخص بالاضطرابين، وتنظيم الأدوية وطرق العلاج عشان تكون مناسبة لعلاجهم
