المحتويات
شوربة خضار من أشهر الأكلات لمرضى الإنفلونزا وبرد المعدة، فهي من الأكلات الصحية الخفيفة، لأنها بتحتوي على عدد من الخضروات غنية بالعناصر الغذائية والفيتامينات المهمة للجسم، لكن بعض الناس مش بيفضلوها، لكن هنقولك أكتر من طريقة مختلفة لتناولها.
فوائد شوربة الخضار
- بتحتوي على نسبة كبيرة من الفيتامينات والعناصر الغذائية المتكاملة، وبتساعد في تعزيز صحة القلب وحمايته من تصلب الشرايين والسكتة الدماغية
- بتساعد على ضبط مستوى ضغط الدم، ومفيدة لمرضى الضغط المرتفع، وتحميهم من الجلطات
- الدراسات قالت إن تناول الخضروات والفواكه بيعزز من الصحة النفسية وبيعالج الاكتئاب والتوتر وبيزود شعور بالسعادة والاسترخاء
- بتحمي من خطر الإصابة بالأمراض السرطانية زي سرطان البروستاتا والجلد والمعدة لأنها بتحتوي على فيتامينات ومواد مضادة للأكسدة
- بتعزز صحة الجهاز المناعى وحماية الجسم من الأمراض والعدوى
- بتحمي الجهاز الهضمى والمعدة من التقلصات وعسر الهضم والالتهابات، ومن أفضل الأطعمة لعلاج مشاكل المعدة زي برد المعدة والإمساك
طرق مختلفة لعمل شوربة الخضار
شوربة خضار بالكريمة
المكونات
- حبة بطاطس كبيرة مقطعة مكعبات
- 2 حبة كوسة مقطعة مكعبات
- حبة جزر مقطعة مكعبات
- نص كوباية مشروم مقطع شرايح
- ربع كوباية بروكلي (زهور)
- بصلة صغيرة مفرومة
- نص كوباية دقيق
- 3 كوبايات لبن حليب
- نص كوباية زبدة
- كوباية كريمة طبخ
- 4 كوبايات شوربة
- ملح وفلفل أسود (حسب الرغبة)
- ربع معلقة صغيرة بودرة توم
الطريقة
- سيح الزبدة في حلة على النار.. وضيف البصلة وشوحها لمدة 3 دقايق
- ضيف الدقيق وقلب لحد ما تبقى كتل متجانسة، ضيف المرق وعليها الخضار وسيب المكونات على نار هادية لحد ما تغلي
- تبل بالملح والفلفل الأسود والتوم البودرة، وضيف اللبن والكريمة وقلب كويس عشان المكونات تتجانس
- سيب الشوربة تغلي على نار هادية لحد ما تتماسك
شوربة خضار بالمكرونة
المكونات
- كوباية مكرونة مقصوصة
- 2 حبة بطاطس مقطعة مكعبات
- كوباية بسلة
- نص كوباية جزر مقطع مكعبات
- 2 حبة كوسة مقطة مكعبات
- ربع كوباية بقدونس
- كوباية ونص طماطم مفرومة من غير قشر
- بصلة مفرومة
- 4 كوبايات شوربة فراخ
- كوباية مياه
- 3 فصوص توم مفروم
- ربع كوباية زيت
- حبهان (حسب الرغبة)
- ملح وفلفل أسود (حسب الرغبة)
الطريقة
- سخن نص كمية الزيت على نار متوسطة وضيف البصل والجزر وقلب لمدة 5 دقايق
- ضيف التوم وقلب لمدة دقيقة وضيف الطماطم
- سيب المكونات على نار هادية لمدة 5 دقايق
- ضيف باقي الخضار والشوربة
- تبل بالملح والفلفل الأسود والحبهان (ممكن تضيف بهارات)
- غطي الحلة وسيب الشوربة على نار هادية لمدة 20 – 30 دقيقة لحد ما الخضار يستوي
- في حلة صغيرة.. سخن الزيت وضيف المكرونة وقلب لحد ما يبقى لونها دهبي
- ضيف المكرونة للشوربة والمياه وقلب كويس
- بعد ما الشوربة تغلي لمدة 5 دقايق.. ضيف البقدونس وارفعها من على النار
شوربة خضار السبانخ
المكونات
- نص كوباية جزر مقطع مكعبات
- كوباية ورق سبانخ مقطع صغير
- نص كوباية بسلة
- 3 فصوص توم مفرومة
- نص معلقة كبيرة زبدة
- ثمرة طماطم
- نص كوباية بطاطس مقطع مكعبات
- 4 كوبايات شوربة فراخ
- ملح وفلفل أسود (حسب الرغبة)
الطريقة
- سيح الزبدة وضيف التوم وقلب لمدة دقيقتين
- ضيف الطماطم والسبانخ وقلب لمدة 5 دقايق
- ضيف الشوربة وباقي الخضار وسيب الخليط يغلي لحد ما الخضار يستوي
- تبل الشوربة بالملح والفلفل الأسود وارفعها من على النار
شوربة خضار مشوية
المكونات
- 2 ثمرة فلفل ألوان (أصفر وأحمر)
- بصلة مفرومة
- 2 ثمرة طماطم
- عودين كرفس
- ثمرة جزر
- عودين كرات
- معلقة صغيرة زعتر
- ملح وفلفل أسود (حسب الرغبة)
- معلقتين كبار زيت زيتون
- 4 كوبايات شوربة
الطريقة
- قطع الطماطم والفلفل الألوان قطع سميكة وتبلهم بالملح والفلفل الأسود والزعتر ومعلقة كبيرة زيت زيتون
- وزعها في صينية واشويها في الفرن
- سخن باقي الزيت.. شوح البصلة وضيف الجرز والكرفس والكرات
- ضيف الخضار المشوي وعليه الشوربة، وضيف زعتر أو ملح أو فلفل أسود (حسب الرغبة)
- بعد ما الشوربة تغلي.. اطحنها بالبلندر أو في الخلاط الكهربائي
