زراعة البطاطس من الأنشطة الزراعية السهلة اللي تقدر تفرّغ بيها أي طاقة سلبية وفي نفس الوقت بتربي في طفلك تعلم المسؤولية، بجانب إنها من الدرنيات السهل ذراعتها في التربة أو في أوعية مخصصة وممكن يبقى مكانها فوق السطح أو البلكونة أو تربة حديقة البيت لو عندك المساحة والإمكانية.
خطوات زراعة البطاطس في البيت
مرحلة الإنبات الأولية
- اشتري 5 ثمرات بطاطس فيهم عيون كتير (مش أقل من 7 أو 8 عيون) لأنهم الجزء اللي بينبت في البطاطس
- امسك فرشة الخضروات لتنضيف البطاطس بشكل مثالي وإزالة أي أوساخ متراكمة عليها أو أي رواسب لمبيدات حشرية
- اعرف إن خطوة تنضيف البطاطس أساسية لأن أحيانًا بعض المعوقات بتبقى فوق الثمرة وممكن تمنع نموها بعد زراعتها
- املا وعاء مياه (برطمان كبير) واسع بفتحات كبيرة عشان تستحمل وزن البطاطس اللي هتتثبت على عيدان الأسنان
- اقسم ثمرة بطاطس بالنص وامسك نصفها وادخل فيه عيدان أسنان من كل ناحية
- ثبّت نصف الثمرة في البرطمان واتأكد إن عيدان الأسنان ثابتة على حواف البرطمان
- سيب البرطمان في مكان مشمس وراقبه يوميًا ولو لاحظت أي تغيير في المياه داخل البرطمان غيرّها فورًا
- اعرف إن ظهور البراعم هياخد مدة مش أقل من أسبوع وممكن أكتر
نقل الثمرة للأصيص
- اشتري أصيص فيه فتحات تصريف ولو عندك أصيص قديم نضّفه كويس قبل الاستخدام
- ثبّت بعض قطع الحصى في قاعدة الوعاء للمساعدة على تصريف المياه
- املا 1/3 الوعاء بالتربة الطينية وبعدها حط الثمرات اللي بدأت تظهر فيها البراعم في منتصف الأصيص بعيد عن الحواف بس سيب مسافة كافية بينهم (في حدود من 12 سم لـ 15 سم) وخلي اتجاه الجذور لأسفل
- خليك حريص على ري النبات يوميًا ولما تلاحظ استكمال النمو ضروري تزوّد كمية التربة مع استمرار ريها
- اتأكد إن التربة رطبة وقت الري لكنها مش سائلة لأن التربة السائلة بتهدد النمو الصحيح لأي نبات
- عشان تحمي النبات من الحشرات اللي بتنتشر مع زراعة البطاطس املا زجاجة بخاخ بالمياه وضيف عليها 5 نقاط صابون غسيل الأطباق ورش منها بانتظام على النبات
- وجود درنات صغيرة على الأوراق دليل على وجود بطاطس جاهزة للحصاد داخل التربة
- بلاش تاكل الدرنات الصغيرة الظاهرة لأنها في أغلب الوقت بتبقي مسمومة نتيجة تفاعلها مع أشعة الشمس لفترة طويلة
- عملية نمو البطاطس بتحتاج من 18 لـ 20 أسبوع عشان تحصل بشكل مثالي
- اسأل أي مكان بيبيع الأسمدة الزراعية عن السماد المخصص لزراعة البطاطس لأنك ضروري تضيفه في أوقات محددة ممكن يحددها ليك البائع أو أي خبير زراعي حسب حجم الوعاء وعدد الثمرات اللي زرعتها
- الخبراء بينصحوا إن أفضل وقت لزراعتها في منتصف الصيف أو نهايته عشان تحصد الثمار المزروعة مع بداية أو منتصف الخريف
- بعد استخراج أول ناتج من زراعتك ضروري تسأل شخص متخصص عن حالة الثمار وكفائتها واعرف إنك هتتعلم عن طريق التجربة
