المحتويات
الجبنة القريش من أنواع الجبن الصحية والمغذية، وبتحتوي على عناصر غذائية مهمة زي فيتامين ب وأ والكالسيوم، بتساهم في تنظيم مستويات السكر وضغط الدم، ومفيدة لصحة العظام، وكمان بتساعد على إنقاص الوزن، لأنها قليلة الدهون، تقدر تعملها في البيت بخطوات بسيطة عشان تضمن جودتها، وتدخلها في وصفات مختلفة في وجبات الفطار أو العشاء.
فوايد الجبنة القريش
- بتساعد في الحفاظ على صحة الأسنان والعظام وبتحمي من مرض هشاشة العظام بسبب احتوائها على الكالسيوم
- بتنظم معدل ضغط الدم بسبب توازن نسبة الأملاح فيها
- بتقلل مستويات السكر في الدم ومفيدة لمرضى السكري
- بتحتوي على نسبة قليلة من الدهون والسعرات الحرارية وبتساعد على تقليل الوزن
- غنية بالبروبيوتك اللي بيحافظ على صحة المعدة والأمعاء
- مهمة للأطفال لأنها بتساعد على النمو بشكل سليم
- بتحتوي على البوتاسيوم اللي بيساعد على تنشيط الأعصاب والمخ وبيحمي من تشنجات العضلات
- مفيدة للحامل لأنها غنية بحمض الفوليك وهو من الأحماض المهمة للجنين وبيحميه من التشوهات الخلقية
طريقة عمل الجبنة القريش في البيت
المكونات
- 5 كيلو لبن حليب
- معلقة صغيرة ملح
الطريقة
- حط اللبن في حلة على نار متوسطة وضيف الملح
- دفي اللبن.. وانقله في طاجن فخاري
- سيب الطاجن في مكان دافي لمدة 12 ساعة
- صفي الجبنة في شاش أبيض نضيف واحتفظ بالمياه (الشرش)
- سيبها على مصفى لمدة 6 ساعات عشان تتخلص من أي مياه زيادة
- حط الجبنة القريش في علبة ووزع عليها الشرش ودخلها التلاجة
أفكار لتناولها
- اهرسها مع أعشاب زي الزعتر والبقدونس والتوم وكمية قليلة من زيت الزتون وعيش الحبوب الكاملة كوجبة فطار صحية
- اخلطها مع زبادي ومسطردة كصوص للمشاوي
- ضيف كمية مع أي فاكهة موسمية زي الخوخ أو الموز أو التوت مع عسل نحل، واخفقها كويس في الخلاط الكهربائي
وصفات مختلفة
الأفوكادو بالجبنة القريش
المكونات
- 2 حبة أفوكادو
- كوباية جبنة قريش
- ربع كوباية أوراق ريحان
- فصين توم
- معلقتين كبار عصير ليمون
- ملح وفلفل أسود
الطريقة
- قشر الأفوكادو وقطعه مكعبات
- في الكبة.. اخلط الأفوكادو مع باقي المكونات لحد ما تتجانس
- تبل الخليط بالملح والفلفل الأسود
- افرد الخليط على عيش من الحبوب الكاملة مع شرايح أفوكادو
جبنة قريش مع العسل
المكونات
- كوباية جبنة قريش
- تلت كوباية مايونيز (خالي الدسم)
- معلقتين كبار عسل
- معلقة كبيرة خل بلسميك
الطريقة
- اخلط المكونات مع بعض كويس
- افرد كمية على عيش محمص وتناولها مع شرايح تفاح
بان كيك بالجبنة القريش والموز
المكونات
- نص كوباية دقيق شوفان
- نص كوباية جبنة قريش
- معلقة صغيرة فانيليا
- 4 بياض بيض
- 3 ثمرات موز
الطريقة
- اهرس 2 ثمرة موز واخلطهم مع باقي المكونات
- سخن طاسة غير قابلة للالتصاق.. ضيف مقدار مغرفة من الخليط وحرك الطاسة عشان يشكل الخليط دايرة متوسطة الحجم
- هيبدأ يظهر فقاعات صغيرة على السطح وتتحول الأطراف للون الدهبي
- اقلبها على الوجه التاني وسيبها 3 دقايق وارفعها من الطاسة
- كرر آخر خطوتين مع باقي الكمية وزين البان كيك بزبدة فول سوداني وشرايح موز (الثمرة الباقية)
كب كيك مالح
المكونات
- كوباية جبنة قريش
- 4 بيضات
- ربع كوباية دقيق
- معلقة صغيرة بيكنج بودر
- ربع كوباية مياه
- نص كوباية جبنة بارميزان مبشورة
- معلقة صغيرة زعتر فريش مفروم
- كوباية مشروم مقطع شرايح
- معلقة صغيرة زيت زيتون
- ملح وفلفل أسود
الطريقة
- اخلط الجبن والدقيق والمياه والبيكنج بودر والملح والفلفل الأسود والزعتر الطازج
- اخفق البيض وضيفه للخليط جيدا
- شوح المشروم في زيت الزيتون وضيفه للخليط
- وزع الخليط في قالب الكب كيك ودخلها الفرن لمدة نص ساعة
