تربية القطط: نصائح للتغذية والتطعيمات والنظافة

تربية القطط مش بتتطلب اهتمام كبير، لكن مهم ماتتسابش لفترات طويلة لوحدها، وعشان كدة قبل إحضار قطة للبيت، ضروري تكون عارف نمط حياتك وهل  هتقدر تستوعب حيوان أليف واحتياجاته، زي عدد ساعات وجودك في البيت؟ هل بتسافر بانتظام أو لفترات طويلة؟، إمكانياتك المادية تسمح؟ هتعرف تتحمل مسؤوليتها زي الطفل لكنه مش بيكبر ومحتاج رعايتك معظم الوقت؟.. هنقدملك معلومات عن تربية القطط عشان تقدر تقرر. 

القطط والحساسية

• قبل قرار تربية القطط، اتأكد إنك مش بتعاني من حساسية شعر القطط ووبرها، زي حكة العين أو سيلان الأنف أو الطفح الجلدي أو بتعاني من أي مشكلة في الجهاز التنفسية أو الربو
•  وكمان في بعض الحالات الجسم بياخد رد فعل تحسسي عنيف زي التورم والاحمرار والحكة لو اتعرضوا لخدش
• تقدر تحل المشكلة دي عن طريق اختيار سلالة مش بتسبب النوع ده من الحساسية زي (القط البنغالي/ كورنش ريكس/ ديفون ريكس/ الروسي الأزرق/ السيبيري/ سفينكس/ جافنيز/ بالي/ قط الشعر القصير الشرقي

عمر القطة

• القطط من الحيوانات سريعة الفهم والتعلم وبتستوعب أشياء كتير
• عمر القطة بين 12 لـ15 سنة في المتوسط لكن في بعض السلالات ممكن تعيش لـ19 سنة  

السن المناسب لتربية القطط

• لما تشتري أو تتبنى قطة وقدامك فرصة تختار.. فيفضل تربية القطة وفصلها عن أمها بعد 50 يوم من الفطام  
• قبل الوقت ده ماينفعش تفصل القطة الرضيعة إلا لو في ظروف حاتمية زي موت الأم أو هروبها 

لو اشتريت أو اتبنيت قط رضيع

• مهم تستشير دكتور بيطري لأن القطط الرضيعة بتختلف على حسب أعمارهم في الرعاية والأكل
• احمل القطط الصغيرة برفق شديد لأن القبضة القاسية عليهم ممكن تسبب أضرار لأجسامهم
• لو عندك أطفال.. تجنب حملهم لصغار القطط من غير إشرافك
• وفر صندوق خاص بهم ومجهز بشكل سليم للنوم في مكان دافئ ومريح
• تجنب أماكن فيها تيارات هواء عشان تحميهم من الأمراض
• غطيهم كويس بوضع الفوط المختلفة حولهم لتوفير الراحة والأمان
• من عمر أسبوع لأسبوعين لازم تأكلهم كل ساعتين على الأقل
• أكلهم اللبن التجاري لأنه شبيه للبن الأم وتجنب اللبن البقري تمامًا لأن معدتهم الصغيرة مش بتقدر تهضمه
• من 3 لـ4 أسابيع..حط لهم اللبن في طبق عميق بجوار الطعام بمقدار خمس مرات يوميًا على الأقل
• من 6 لـ12 أسبوع قدم لهم كمية أكبر من اللبن وتقدر تديلهم الدراي فوود
• دلك المنطقة الحساسة للصغار برفق باستخدام قطعة قماش مبللة

أساسيات تربية القطط

احتياجات القطة

• مكان للنوم .. مهم يكون مش ضيق ودافي وفي مكان هادي بعيد أي شيء ممكن يسبب لها ضرر أو إصابة
• صندوق أو شنطة خاصة بحملها وقت الخروج.. اختاره مناسب لحجم القطة بعد ما تكبر
• صندوق رمل (litter box)
• أداة للخدش وألعاب
• طبق للأكل وطبق للمياه
• أدوات تنظيف القطط (فرشة/ شامبو مخصص)

التغذية

• ممكن تعودها على تناول أكتر من نوع أكل بين المنزلي والمعلب والجاف 
• اختبر مدى محبته لكل نوع على حدة 
• البيض المسلوق.. من ضمن الأطعمة المفضلة للقطط 
• مهم الفراخ اللي هتقدمها تكون خالية من العضم ومطبوخة (مسلوقة أو مشوية) 
• كمية ونوع الأكل اللي بتقدمه بيختلف حسب نوعها وعمرها وحالتها الصحية.. مهم تستشير دكتور بيطري

الأكل المفيد

• البيض المسلوق 
• الخضار المسلوق (بسلة/كوسة/ بطاطس/ جزر) 
• الخيار 
• فاكهة (تفاح/ موز/ بطيخ/ شمام)
• الأرز
• الشوفان
• الجبنة 
• العيش
• الفراخ المسلوقة
• الكبدة
• الزبادي
• السمك (بشكل قليل)

الأكل الضار

• اللبن 
• التونة 
• الأكل الني (لحوم/ أسماك/ بيض) 
• التوم والبصل
• الشوكولاتة والكافيين
• العنب بأنواعه 
• الكبدة (بكميات كبيرة)
• السكريات خاصة الحلوى
• العضم 
• اللحوم الدهنية (سجق/ بيكون) 
• المشروم
• المكسرات 
• الآيس كريم
• اللانشون

نظافة القطط

•  تقدر تدرب القطط على الاستحمام من الأسبوع الخامس أو السادس من عمرها  
• حميها عدة مرات في الصيف ومرة أو مرتين خلال الشتاء (باستخدام الشامبو الخاص بها) 
• تجنب الإفراط في تحميم القطط لأنه بيسبب ضعف المناعة وانتقال العدوى 
• ولأنها بتنضف نفسها طول الوقت من خلال لحس نفسها لأن لسانها بيحتوي على غدد بتفرز سائل مطهر بيساعدها في تنظيف نفسها والتخلص من الشعر والوبر الزايد
• وكمان بتقدر تعالج الجروح البسيطة 
• قص الأظافر مهم لأنها بتنقل البكتيريا والفيروسات.. الأفضل الاستعانة بالدكتور البيطري
• ممنوع قص شوارب القطط لأنها بتساعدها في الحفاظ على توازنه، وقياس المسافة وبعد الأشياء عنه

تنظيف أذن القطط

• هيكل قناة أذن القط صعب يطرد المواد العالقة فيه بسبب عمق القناة الأفقية
• تراكم المادة اللي بتفرزها الأذن مع الأتربة ممكن يسبب حكة والتهابات الأذن
• مهم تنضفها مرة كل شهر
• الكحول أو أي منظف بيحتوي على مادة بيروكسيد الهيدروجين ممكن يسبب التهاب قناة الأذن
• المنظفات المخصصة للقطط بتحتوي مكونات مضادة للبكتيريا أو الفطريات وبتمنع التهابات الأذن
• اسحب الأذن للخلف برفق واملا قناة الأذن بمحلول التنظيف الموصوف من دكتور البيطري
• دلك قاعدة الأذن لمدة 5- 10 ثواني بقطعة شاش على صباعك لتنضيف السوايل الزايدة من قناة الأذن
• كرر مع الأذن التانية
• مهم يكون معاك شخص تاني يساعدك ويمسك القطة معاك عشان تسيطر عليها وتمنعها من التحرك
• تجنب استخدام أعواد قطن الأذن لأنها ممكن تتلف طبلة الأذن
• يفضل تلجأ للدكتور البيطري لو هتكون لوحدك أو مش هتعرف تتحكم في القطة بطريقة صحيحة

التطعيمات وجرعات الديدان

• تطعيم الرباعي: بيبدأ بعد ما تتم شهرين، وبيتكرر بعدها بـ 3 أسابيع بـ250 جنيه
• السعار: من 3-6 شهور، و بيتكرر كُل سنة بـ200 جنيه

تطعيم الديدان للقطط

• لو القطة صغيرة أو حديثة الولادة.. استشير دكتور بيطري
• تجنب تقديم أي جرعات للقطة الحامل
• أول جرعة في عمر الشهرين
• الأدوية زي بارتل/ برافيران/ دونفنتال متوفرة في محلات مستلزمات الحيوانات
• الجرعة الدورية كل 3 شهور (جرعتين مرة كل 14 يوم)
• قرص لكل 10 كيلوجرام من وزن القطة
• بتتاخد الجرعة على معدة فاضية (يصوم قبلها بـ3 ساعات وبعدها 3 ساعات)
• القطط الأقل من 6 شهور تاخد ربع قرص في المرة والأكبر تاخد نص قرص
• ممكن تستعين بعلاجات منزلية زي خل التفاح والجزر والكركم والتوم.. لكن باستشارة الدكتور البيطري
• اهتم بنضافة القط نفسه وصندوق المخلفات وطبق الأكل عشان تتجنب إصابته بالديدان
• بيتراوح سعره من 40/60 جنيه حسب المكان اللي هتشتريه منه

التعامل وفهم القطط

فهمها من حركات جسمها

• رافعة ديلها لفوق: مبسوطة
• رافعة ديلها بشكل أفقي: بتستكشف حاجة
•  لو قاعدة ولفت ديلها حواليها وودنها مرفوعة: منتبهة لحاجة
• ديلها ملفوف حواليها: يعني هادية وبتحب صاحبها
•  لو بتتمسح فيك وديلها مرفوع بشكل أفقي: شامة ريحة غريبة وبتكتشفها
• مستلقية على ضهرها: ده وضع الهدوء والثقة
• لو رفعت ديلها وجسمها من النص وبتبخ: خايفة وبتستعد للهجوم
• الأذن المتنية: تبقى خايفة
• لو بتعضك خفيف/ بتلعب في شعرك/ تجيبلك لعبها/ بتتمسح فيك: عايزة تلعب معاك وتدلعها
• غلق العين: بترحب بيك
• تحديق العين مع تحريك ديلها: تبقى مركزة
• بتحرك ديلها بسرعة: يعني غضب قبل الهجوم
• مستلقية وبتحرك ديلها بالراحة: يعني مبسوطة ومرتاحة
•  نايمة وحركت أذنها بعد ما ندهت عليها: يعني سامعاك وانتبهتلك بس مش عايزة تقوم

أفضل طرق حمل القطط  

• القطط معروف إنها بتخاف بسهولة.. مهم تعرف إزاي تشيلها صح عشان تتجنب إيذاءها أو أي خربشة 
• أول خطوة..  اعرف حالتها المزاجية ولو هي حاباك تلعب معها وتشيلها أو لأ
• هتظهر حركات وإيماءات توضح لك ده زي إنها بتستخبى منك وعايزة تنام وتبقى لوحدها عكس لو بتموء وتمسح جسمها فيك وعايزة اهتمام
•  لو شيلت القطة مرة واحدة ممكن ده يخوفها خاصة لو هترفعها لفوق 
• من الأفضل تنحني لها عشان تطمنها..  وده هيديها فرصة فرك جسمها بيك وهينتج عنه ريحة الفيرومونات على ملابسك وجسمك وتساعدها تحس براحة أكبر
• حط إيدك المفرودة تحت جذع قطتك وهتحس بقفصها الصدري ثابت تحت صوابعك مش بطنها 
• استخدم إيدك التانية لدعم رجل القطة.. حط إيدك تحت رجليها الخلفية بحيث تكون إيد فوق والتانية خلف كفوفها 
• تقدر تسحب القطة على صدرك عشان تزود إحساسها بالأمان 
• طريقة تانية .. شيلها من تحت دراعينها ولف إيد حوالين جذعك وقعدها عليها وبالإيد التانية ادعم الجزء السفلي للقطة 
• في قطط تحب تشيلها على صدرك وكفوفها على كتفك زي الأطفال 

أمراض بتصيب القطط

الديدان

• بتصاب بمجموعة متنوعة من الطفيليات المعوية
• بتظهر عليها أعراض زي: الإسهال/ وجود ديدان مرئية في البراز/ دم في البراز/ انتفاخ/ فقدان الوزن/ القيء/ صعوبة في التفس والكحة
• بتتقسم لأنواع:

1. الحلقية وبتتنقل لها عن طريق القوارض زي الفيران أو بلع براز ملوث
2. الشريطية: في الغالب بتتنقل عن طريق بلع براغيت مصابة ببيض الديدان الشريطية
3. الخطافية: بتنتقل من البراغيت أو الحشرات وتخترق الجلد وبتتغذى على الدم بعد ما تتعلق في جدار الأمعاء

عدوى الجهاز التنفسي

• بتصاب بعدوى فيروسية في منطقة الأنف والحنجرة والجيوب الأنفية
• بتنتقل الفيروسات من قطة للتانية عن طريق العطس أو الكحة أو مشاركة أطباق الأكل والمياه

سعفة

• عدوى فطرية بتصيب الجلد والشعر والضوافر وتظهر في حلقات حمراء
• وغالبا بتنتشر السعفة لأنها شديدة العدوى ممكن تتنقل لحيوانات أليفة تانية أو للبشر

دودة القلب

• من الأمراض الطفيلية بتتنقل عن طريق لدغة البعوض وملهاش علاج لكن بتقدر القطط تقاومها
• أعراضها: السعال المنتظم ومشاكل الجهاز التنفسي/ القيء/ الخمول/ فقدان الشهية/ فقدان الوزن

البراغيت

• بتسبب حكة وعلق مستمر وتساقط للشعر والتهابات جلدية

السكري

• بتصاب به بسبب نقص هرمون الأنسولين أو استجابة غير كافية للأنسولين
• بعد تناول القطط أكلها بيبدأ الجهاز الهضمي بتقسيم الأطعمة لمكونات مختلفة ومنها الجلوكوز
• بيحمله الأنسولين في خلاياها وفي حالة عدم إنتاج الإنسلوين بيترفع نسبة السكر في الدم وبيأدي لمشاكل تانية
• وبتظهر أعراض زي: زيادة أو نقصان في الشهية/ فقدان الوزن/ العطش الشديد/ زيادة التبول التبول في أماكن أخرى غير صندوق الفضلات/ ريحة نفس كريهة/ الخمول/ التهاب المسالك البولية

تزاوج القطط

• الذكور: بتوصل لمرحلة البلوغ بعد عمر الـ10 شهور وبيكون مستعد للتزاوج بشكل كامل بعد ما يتم السنة 
• الإناث: بين 4 و10 شهور بتكون مستعدة للتزاوج حسب نوع السلالة
• موسم التزاوج بيبدأ من نهاية فبراير (آخر 10 أيام) لنص إبريل
• الموسم التاني من نهاية أكتوبر لنهاية نوفمبر

أخطاء في تربية القطط

• إهمال القطة
• ترك النوافذ مفتوحة 
• عدم العناية بنضافتها 
• تجاهل الزيارة الدورية للدكتور البيطري
• عدم إعطائها التطعيمات الدورية
• خروجها من البيت بدون رقابة

مخاطر تربية القطط على الحمل

• اسمه داء المقوسات أو توكسوبلازما
• عدوى طفيلية بتأثر على صحة الجنين بينتقل عن طريق ملامسة براز القطط المحملة بالعدوى
• بتتنقل العدوى للقطط من تناول اللحوم النيئة الملوثة وتعرضها لبيئة ملوثة خارج البيت
• أعراضه بتشبه الأنفلونزا وبتشمل ارتفاع درجة حرارة الجسم والآم العضلات والشعور بالتعب وتضخم الغدد الليمفاوية
• تشخيص الإصابة بداء القطط بيكون عن طريق تحليل للدم
• في حال الإصابة قبل الحمل بمدة تتراوح بين 6-9 أشهر.. عادة الجسم بيفرز الأجسام المضادة للمرض ومش بيتنقل للجنين
• لكن في حالة الإصابة به أثناء الحمل.. بيتسبب في تشوهات خلقية وأمراض ذهنية وفقدان الجنين للبصر
• بتزيد خطورته حسب عمر الجنين خاصة في آخر 3 شهور من الحمل  
• العلاج بيكون عن طريق تناول المضادات الحيوية
• كل ما تم اكتشافه بدري.. زادت فرص عدم انتقاله للجنين

الوقاية

• تجنبي تناول اللحوم النية 
• عدم تقديم أي لحوم نية للقطط
• غسل أدوات الأكل والإيدين كويس بعد التعامل مع اللحوم والفراخ
• تجنبي ملامسة براز القطط وارتداء جوانتي عند تنظيف مكانها وغسل الإيدين بعدها كويس
• امنعي خروج القطط المنزلية للشارع
• تغيير صندوق الفضلات يوميًا
• التزمي بمواعيد التطعيمات الخاصة بالقطط