العناية بالبشرة الجافة والدهنية.. روتين بخطوات سهلة

العناية بالبشرة مهما كان نوعها لابد منها يوميًا، عشان تحافظي على نضارتها وحيويتها، وتتجنبي ظهور البقع والحبوب والتجاعيد، ووسط مئات من منتجات العناية، فتيات ونساء كتير بيقعوا في حيرة لاختيار أفضل وأنسب منتج، لكن تحديد عادات ومنتجات أساسية في روتين يومي هيسهل عليكي العناية بيها. 

تحديد نوع البشرة

أول وأهم خطوة لبداية روتين للعناية ببشرتك إنك تعرفي نوعها عشان تقدري تحددي الخطوات وأنواع المنتجات اللي بشرتك هتحتاجها 

أنواع البشرة بتشمل:

• الجافة: الجلد بيكون ناشف وخشن ومتقشر
• الدهنية: لامعة وبعض الحالات بتكون مسامها واسعة 
• المختلطة: بتكون في بعض المناطق جافة، وخاصة الخدين، ومناطق تانية دهنية زي الجبين والأنف والذقن (T Zone)
• الحساسة: بمجرد ملامستها لأي مادة جديدة أو التعرض للشمس بتتهيج وتحس بالوخز أو الحكة بعد استخدام بعض من مستحضرات التجميل
• العادية: بتكون متوازنة 

طريقة سهلة لتحديد نوع البشرة

• اغسلي وجهك بالمياه وبعد نص ساعة امسحيه بمناديل ورقية
• الدهنية: هتلاحظي وجود آثار لزيوت البشرة على المنديل في كل منطقة من المناطق الأربعة (الأنف/الجبهة/الدقن/الخدين)
•  المختلطة: وجود آثار الزيوت في بعض المناطق (T Zone)
• العادية: مش هتلاقي أي أثر للزيوت
• الجافة: هتلاحظي جفاف المنديل من الدهون ووجود أثار تقشر 

روتين يومي أساسي

بغض النظر عن نوعية بشرتك.. الحفاظ على روتين معين هيساعدك تحافظي عليها نضيفة وصحية:

• المنظف/الغسول (Cleanser): مهم اختيار المنظف المناسب واستخدميه مرتين في اليوم (الصبح وقبل النوم) 
• السيروم: الأفضل يحتوي على فيتامين سي أو الببتيدات وتستخدمه الصباح، وبالليل الأفضل يحتوي على ريتينول (Retinol) أو الريتينويد (Retinoid)
• المرطب: مهم ترطبي بشرتك حتى لو دهنية، لكن اختاري النوع المناسب عشان تمدي البشرة بالعناصر اللي محتاجها
• واقي الشمس: استخدميه قبل ما تنزلي بنص ساعة واختار نوع مناسب بأعلي درجة تغطية وحماية

خطوات العناية بالبشرة 

الروتين الصباحي

• نظفي وجهك بغسول.. للبشرة العادية والجافة الأفضل تستخدمي غسول خالي من السلفات أو الكبريتات (Sulfate-free) والدهنية والمختلطة بيحتوي على حمض الساليسيليك
• استخدمي تونر طبيعي (زي مياه الورد) أو خالي من الكحول للبشرة العادية، وللدهنية يحتوي على حمض الصفصاف أو حمض الجليكوليك أو حمض اللاكتيك ويكون جل أو ذو قاعدة مائية يسهل امتصاصه 
• رطبي بشرتك  
• استخدمي واقي للشمس مناسب لنوع بشرتك

الروتين الليلي

• امسحي وجهك بمزيل الميكاب 
• نظفي بشرتك كويس بالغسول المناسب 
•  استخدم التونر
• دلكي بشرتك بحركات دائرية بسيروم مغذي بيحتوي على ريتينول (Retinol) أو الريتينويد (Retinoid) أو فيتامين سي
• استخدمي كريم مخصص لمنطقة محيط العين
• رطبي بشرتك بكريم مناسب

العناية بالبشرة بشكل أسبوعي

تنظيف البشرة بالبخار

• بيساعد في فتح المسام والتخلص من الزيوت والجلد الميت والأوساخ
• نظفي وجهك بالغسول 
• حضري بولة فيها مياه مغلية وضيفي عليها زيت نعناع أو لافندر أو شجرة الشاي
• وجهي بشرتك للمياه وغطي رأسك بفوطة على مسافة متقلش عن 20 سم ولمدة 10 دقايق 

المقشر

• استخدمي مقشر مرتين في الأسبوع (مرة واحدة للبشرة الجافة) عشان تتخلصي من الجلد الميت 
• ممكن تستخدمي منتج مناسب لنوع بشرتك أو ماسكات طبيعية زي السكر والعسل أو القهوة أو الشوفان والطماطم

ماسكات 

• اختاري نوع الماسك المناسب لمشاكل واحتياجات بشرتك زي توحيد لونها أو ترطيبها أو التخلص من الحبوب
• ممكن يبقي شيت ماسك أو منتج أو طبيعي زي الزبادي والعسل 

غلق المسام

• استخدمي قطنة وبلليها بمياه ورد وامسحي بها البشرة بحركات دائرية خفيفة

نصايح وحيل العناية بالبشرة

• زيت شجرة الشاي أو المنتجات اللي بتحتوي عليه بتقلل بكتيريا الوجه/ الحبوب/ الالتهاب/ الاحمرار
• تجنبي النوم بالمكياج على وجهك
• امسحي الميكاب بزيت تنظيف البشرة قبل استخدام غسول البشرة للتخلص من بقاياه/ التراب/ تراكمات البشرة اليومي
• روتين العناية بالبشرة بيتغير مع تغير درجة الحرارة فمهم تراقبي آثاره عليها عشان تعرفي تغيري المكونات صح
• الريتينول مكون أساسي للروتين الليلي.. استخدميه بالطريقة وعدد المرات المناسبة لبشرتك
•  امزجي استخدام فيتامين سي مع واقي الشمس لزيادة فعاليتهم وحماية البشرة من أشعة الشمس الضارة
• ترطيب البشرة على مدار اليوم ضروري.. استخدمي الكريم والسيروم المرطب مرتين يوميا
• ضيفي الرقبة لروتينك اليومي بكل خطواته مع عمل حركات مساج للأعلى مش الأسفل لتجنب ظهور التجاعيد
• استغلي بخار المياه أثناء الاستحمام لعمل مساج لوجهك بحركات دائرية بسيطة
• ماسك البشرة الليلي مهم لأن ده الوقت اللي خلايا البشرة فيه بتنشط وتتجدد.. حطي زيت جوز الهند/ اللوز/ جل الصبار واغسليه الصبح
• كريم العين اللي فيه كافيين مناسب لعلاج الهالات السوداء
• غسل الوجه بمياه باردة أو عمل مساج ليه بقطعة تلج بيقلل انتفاخ الوجه والتهابه/ بيشد الجلد/ بيحسسك بالانتعاش
• غيري أكياس المخدة دايما واستخدمي الأنواع الحرير لتجنب تسرب منتجات البشرة ليه ولتأخير ظهور التجاعيد
• نامي على ضهرك عشان تحافظي على بشرتك واستخدمي منتجات البشرة ووجهك مبلل بسيط
•  ممارسة تمرين الـ(Downward Dog) يوميا من 3-10 دقايق بينشط الدورة الدموية في الوجه وبيزود لمعانه
• اغسلي فرش الميكاب بشكل دوري وغيري الفوطة يوميا لتجنب التهاب البشرة
• زيت جنين القمح بيوحد شكل البشرة وبيشد الجلد.. ضيفي معلقة كبيرة منه مع معلقة زبادي وسيبيه 20 دقيقة وبعدين اغسليه

أخطاء العناية بالبشرة

• غسل أسنانك بعد استخدام الغسول، لأن بعض المواد في معجون الأسنان بتسبب تهيج وجفاف البشرة ومهم تتخلصي منها
• استخدام فوطة غير نضيفة أو خشنة لأنها بتسبب تهيج وخدش البشرة وانتشار البكتيريا فيها
• مناديل إزالة الميكاب بتحتوي على مواد كيميائية بتأثر على درجة الـ(pH) للبشرة وبالتالي بتسبب تهيج/ التهاب/ جفاف/ حساسية البشرة وظهور الحبوب
• لمس قطارة السيروم لوجهك ممكن يسبب التقاطها للبكتيريا من بشرتك ونقلها لباقي السيروم في الزجاجة
• استخدام المياه الساخنة في الاستحمام لأنها بتخلص البشرة من الزيوت الطبيعية وبتسبب عدم توازن درجة ترطيبها
• استخدام كمية كبيرة من المرطب/ السيروم/ كريم العين لأنها بتسد مسام البشرة

علامات تغيير روتين العناية ببشرتك 

بمجرد ظهور أي من العلامات والأعراض دي، مهم إنك تلاحظي أي من المنتجات اللي بتسببها ومهم تستشيري دكتور متخصص 

• لو بشرتك دايما مشدودة.. يعني طبقة الجلد الواقية جافة ومتضررة 
•  ظهور الخطوط والتجاعيد الرفيعة خاصة حول منطقة الفم تحت العين  
• الحكة والتحسس المفاجئ
• البقع الداكنة
• جفاف البشرة وتقشرها
• لمس غير موحد للبشرة
• حبوب حمراء أو بثور صغيرة

العناية بالبشرة تحت الكمامة 

•  ارتداء الكمامة لفترات طويلة مع الاحتكاك والرطوبة والبكتيريا وارتفاع درجة الحرارة وعدم تغييرها بشكل منتظم خلال اليوم ممكن يأدي لظهور الحبوب أو تهيج البشرة
•  نظفي وجهك بغسول ورطبيه بكريم مناسب قبل ارتداء الكمامة
• تجنبي وضع الميكاب عشان تسمحي لبشرتك تتنفس
• مهم تغيري الكمامة مرتين على الأقل في اليوم وتحاولب تنضفي بشرتك قبل لبسها مرة تانية