المحتويات
العناية بالاسنان بتحتاج خطوات معينة عشان تحمي نفسك من مشاكل خطيرة ومزمنة ممكن تنتج عن تسوسها أو التهاب اللثة، وبتجنب عادات مضرة بتأثر عليها مع الوقت.
العادات الصحية للعناية بالاسنان
غسل الاسنان
خطوة ضرورية ولازم تحصل على الأقل مرتين يوميا وتجنب تجاهلها خاصة بالليل قبل النوم لأن بقايا الأكل بتفضل مستقرة على سطحها وفي الشقوق طول ساعات النوم
استخدام فرشة الاسنان بالطريقة الصحيحة
- اختار حجم الفرشة المناسبة لحجم فمك وتقدر توصل بيها لكل الأماكن الصغيرة في الأسنان
- ابدأ بوضع الفرشة بزاوية 45 درجة من اللثة وحركها من الأمام للخلف برفق
- حركها لكل الأماكن الداخلية من الأسنان في حركات دائرية وميل الفرشة للوصول ليها
- المدة المناسبة لغسل الأسنان هي دقيقتين
استخدام معجون مناسب للعناية بالاسنان
في عناصر مهمة في معجون الأسنان لازم تكون موجودة زي الفلورايد لأنها المادة الأساسية للحفاظ على صحة الأسنان وحمايتها من التسوس والتلف
استخدام خيط الاسنان
- لازم تستخدمه من مرة لمرتين يوميا للتخلص من بقايا الأكل في تجويفات الأسنان وتقليل نسبة الإصابة بالتهاب اللثة
- بينضف الأماكن اللي صعب فرشاة الأسنان توصلها زي اللثة وعمق الفراغات بين الأسنان واستخدامه بانتظام بيحمي الأسنان من التسوس وبيقلل نسبة التهابات اللثة
- بيحسن صحة اللثة وبيحميك من التهابات الفم اللي بتسببها بقايا الأكل ومهم تستخدمه بعد الأكل على طول لمنع تراكم بقايا الأكل آخر اليوم بين الأسنان
- بيقلل تراكم البكتيريا في الفم وبالتالي الحماية من رائحة الفم الكريهة أو أضرار الجسم التانية زي ارتفاع نسبة الالتهابات في الدم وبالتالي زيادة نسبة الإصابة بالجلطات الدموية
- مناسب لكل المراحل العمرية فحاول تعود طفلك على استخدامه يوميا والانتظام عليه مع غسل الأسنان مرتين يوميا واستخدام غسول الفم مرة يوميا بشكل روتين صحي للأسنان
التغلب على عادة جز الاسنان
- جز الأسنان حالة غير إرادية من ضغط الفكين على بعض ومعظم الحالات بتعاني منها أثناء النوم
- ممكن تسبب اضطرابات في مفصل الفك وصداع وتلف للأسنان وألم في الرقبة
- بتحصل بسبب المشاكل النفسية زي القلق والتوتر أو الضغط العصبي أو الغضب وبتظهر العادة دي عند الأطفال لكنها عادة بتختفي في مرحلة البلوغ
- في بعض الحالات زي الشخص العدواني أو مفرط الحركة والنشاط بيصابوا بحالة جز الأسنان
- الأدوية زي مضادات الاكتئاب والوراثة كمان من العوامل المسببة لجز السنان
- تغلب عليها بممارسة تمارين اليوجا وتمارين الاسترخاء بانتظام عشان تتخلص من مسببات التوتر أول بأول
- استخدم واقي الأسنان الشفاف لتقليل الاحتكاك بين الفكين أثناء النوم وتقدر تعمله عند دكتور الأسنان بالمقاس المناسب لفمك، وليه علامات معينة تقدر تكتشف من خلالها احتياجك ليه زي:
- لو بتصحى من النوم بوجع في الفك وصعب تحركه أو تمضغ
- صوت طرقعة لما تحركه/ تاكل/ تتاوب
- صداع وألم في الرقبة أو الكتف
- ألم في الأسنان
- أصوات حك أسنانك وقت النوم
- آلام في الوجه والأذن
- أسنانك اللي قدام شكلها أقصر
- شرخ في أسنانك
- حفر/ جيوب بين ضروسك
الحفاظ على نضافة فرشة الاسنان
- الدراسات أثبتت إن الحمام فيه كمية من البكتيريا والفيروسات اللي بتنتشر على الأسطح والأدوات زي فرشاة الأسنان
- وبتنتقل لمسافة على الأقل متر وبتستقر لحد 6 ساعات ومسببة لأمراض زي الإنفلونزا والنوروفيروس
- لو الحمام صغير.. خزن فرشاة الأسنان في غرفة النوم عشان تتجنب انتقال الأمراض أو خلي حامل فرشاة الأسنان في مكان عالي وبعيد عن قاعدة الحمام والحوض
- لأن الحوض ممكن ينقلها قطرات المياه والبكتيريا أثناء غسل الإيد
- الجمعية الأمريكية للأسنان بتنصح بغسل الفرشة بعد الاستخدام وتحريكها للتخلص من بقايا المياه وتخزينها واقفة في كوباية أو حامل الفرشة في مكان مفتوح من غير ما تلمس فرش تانية
تجنب استخدام خلة الاسنان
- ممكن تتلف مينا الأسنان وأنسجة اللثة سواء كانت بلاستيك أو خشب استخدامها بشكل متكرر بيسبب تآكل سطح الأسنان وقشورها الخارجية (فينيير)
- بتسبب المسافات الكبيرة بين الأسنان وممكن تدخل الأكل جوه اللثة أكتر فتسبب التهاب
- استخدامها الكتير بيسبب انحسار اللثة والسنان وده بيعمل حساسية فيهم وتكرار عملية التهاب اللثة وتآكل عظام الأسنان ممكن يسبب خلعها على المدى البعيد
- تجنب استخدام أي حاجة ليها سن زي الإبرة لأنها بتسبب نفس النتيجة
- لو بتحس بأكلان وميل للضغط على اللثة بالخلة.. استشير دكتور
العادات الخاطئة للعناية بالاسنان
- الإفراط في شرب الليمون والمياه الغازية بيسبب تآكل في مينا الأسنان
- أكل التلج بيضعف الطبقة دي وبيعرّض الأسنان للضعف والكسر
- التدخين بيسبب تسمم اللثة وممكن ينتج عنه الإصابة بسرطان الفم
- وضع الأقلام أو ذراع النضارة علي الأسنان بيسبب تشققها وضعفها على المدى البعيد
- المشروبات السخنة قبل أو بعد أي مشروب بارد بتضر بالأسنان فبعض الخبراء بيشبهوا التأثير بنفس مفعول إضافة المياه السخنة على قطعة تلج وتشققها وذوبانها
- دراسة بتأكد إن قضم الأظافر بترهق الأسنان ومع الوقت ممكن تسبب ضعفها وتساقطها
- ضغط الأسنان على بعضها لمدة طويلة بيضعف عضلات الفك وبيسبب تآكل الأسنان مع الوقت
- تجنب الأطعمة والمشروبات اللي بتسيب أثر على الأسنان زي القهوة والمشروبات الغازية وعصائر الفواكه الغامقة وخل البلسميك وصوص الصويا والمشروبات الرياضية والحلويات
- الإفراط في السكريات بيزود كمية الأحماض في الجسم اللي بتضر الأسنان
- تنضيف الأسنان بالبيكنج صودا بيأذي الأسنان على المدى البعيد رغم فاعليته في تنضيفها
- تناول الكافيين يوميًا بكميات كبيرة بيزود فرص تلوث الأسنان وتسوسها
