المحتويات
التنمر من أشكال العنف اللي بيواجهها الأطفال بشكل أساسي، ومع الوقت وتطور استخدام المصطلح بدأ الوعي ينتشر عن تأثيره العنيف على الأطفال ونفسيتهم، وبالتالي ضروري تعرف أنواعه وأسبابه لو عندك طفل أو مراهق وعايز تحميه وتعرّفه كيفية التعامل مع المواقف دي.
تعريف التنمر
- هو من أشكال العنف اللي بيمارسه طفل أو مجموعة أطفال على طفل تاني بشكل مزعج ومتكرر ومتعمّد
- بيشمل أشكال كتير زي نشر الشائعات والتهديدات ومهاجمة المتنمر عليه لفظيًا أو بدنيًا
- الميل لعزل الطفل بقصد الإيذاء بجانب حركات وأفعال تانية بتحصل بشكل غير ملحوظ للكبار سواء مدرسين أو مشرفين أو مدربين في التمارين الرياضية
- معايير أساسية بتفرق بين التنمر وأي سلوك تاني وهي التعمد والتكرار واختلال القوة
الأطفال المستهدفين من المتنمرين
- المنطويين والخجولين والمسالمين
- الوافدين الجدد للتمرين أو للمدرسة
- المختلفين في الشكل أو الدين أو من خلفية ثقافية مختلفة
- المصابين بمشكلة صحية أو إعاقة مختلفة
- أحيانًا بعض الأطفال بيجمعوا أكتر من صفة في الصفات دي أو كلها
تأثير التنمر على الطفل
- بيقلل ثقته في نفسه وبيضعف تركيزه وممكن يبقى سبب في تراجع مستواه الدراسي
- بيسبب مشاكل بينتج عنها الخجل الاجتماعي وبيزوّد الخوف من المجتمعات الجديدة
- بتزيد مشاكل نفسية زي الاكتئاب والقلق اللي ممكن يوصل أحيانًا للتفكير في الانتحار
سبب ممارسة سلوك التنمر
- ممكن يبقى المتنمر مر بتجربة تنمر سابقة شجعته على القيام بنفس السلوك مع أطفال آخرين
- مشاهدة السلوك العدواني باستمرار سواء في وسائل الإعلام أو في المدرسة أو في البيت
- الإحساس بالضعف والعجز في الحياة
- تجارب سابقة صوّرت للطفل المتنمر إن السلوك ده بيؤدي لتحقيق الرغبات
- الجهل بعمق التأثير السيء للتنمر على الضحية
- الغيرة والبحث عن طرق مختلفة لجذب الانتباه
أنواع التنمر
- بدني زي الضرب والسرقة وإتلاف المقتنيات
- لفظي زي إطلاق الألقاب والشتائم والتهديد
- اجتماعي زي الإهمال والتجاهل والاستبعاد ونشر الشائعات
- نفسي زي النظرات السيئة والتلاعب بمشاعر الطفل والتربص
- إلكتروني زي السخرية والتهديد عن طريق رسائل على مواقع التواصل الاجتماعي
تأثير التنمر الإلكتروني على الصحة النفسية للضحية والجاني
- دراسات كتير اتكلمت عن تأثير التنمر الإلكتروني على الصحة النفسية للأشخاص اللي بيتعرضوا له
- بيحصل على مواقع التواصل ومواقع الألعاب والمواعدة بهدف تخويف الشخص واستفزازه أو تشويه سمعته
- دراسة في أمبريال كوليدج لندن بتقول إنه منتشر بين المراهقين بنسبة بتوصل 40% وبتقول إن تلت المتنمرين على المواقع الإلكترونية في تعاملهم وجهًا لوجه مش بيتنمروا على اللي حواليهم
- وبيصاب المتنمرين والضحايا باضطرابات ما بعد الصدمة والقلق والاكتئاب
- الضحايا بتقل ثقتهم في نفسهم وبيسيب أثر عليهم ممكن يمتد معاهم لمدة 40 سنة والمتنمرين بيتأثروا بتصرفاتهم وبتزيد عندهم المشاكل النفسية أكتر من الأشخاص العاديين بـ5 مرات
- دراسة بتأكد إنهم أكثر عرضة للإصابة باضطراب الشخصية المعادية للمجتمع أو الاعتلال الاجتماعي
- هو اضطراب عقلي بيقلل تقدير الصواب والخطأ وبيخلي الشخص يتجاهل حقوق الآخرين ومشاعرهم وبيخليهم بيتلاعبوا بمشاعر الآخرين وبيتعاملوا بقسوة مع اللي حواليهم
طريقة الدفاع عن النفس ضد التنمر
- بلّغ الشخص المسؤول فورًا وخليك شجاع
- ابعد عن المجموعات اللي معروفة بممارسة التنمر
- بلاش تبقى لوحدك لمدة طويلة والأحسن تحيط نفسك بمجموعة أشخاص تانيين قريبين منّك
- خليك حريص على التواجد في مكان مراقب من شخص أكبر (شخص له سلطة أعلى يقدر يحميك وينقذك)
- بلاش ترد عليهم باللفظ لأن الرد عليهم هيشجعهم على التمادي في سلوكهم المريض
- لو بيحاول يأذوك جسديًا دافع عن نفسك بكل الطرق وبلّغ الشخص المسؤول في نفس الوقت فورًا
- اطلب المساعدة من شخص بتثق فيه وبلّغ المسؤولين في مدرستك ووالديك
تدريب الطفل على حماية نفسه من التنمر
- لازم تفهمه إن التنمر سلوك ليه أسباب زي الغيرة أو التوتر أوعدم الاستقرار الأسري
- فهمه دايما إنه ملوش ذنب وإن مفيش حاجة تبرر تعرضه للأذى
- خليك مستمع كويس وماتحكمش على كلامه سواء بالعصبية أو تعبيرات الوش
- بلاش تلومه أو تحمله مسؤولية اللي بيحصل وسيبه يعبر عن مشاعره بصراحة
- تجنب أي كلام ممكن يجرحه وحسسه دايما إنك هتساعده مهما حصل
- وابعد عن ردود الأفعال زي الشتيمة أو الهجوم على المتنمر وأهله عشان تبقى قدوة لابنك
- علمه ياخد موقف زي تجنب المتنمر أو الدفاع عن نفسه بتمثيل المواقف معاه في البيت
- مهم يتعلم رياضة دفاع عن النفس عشان يبقى واثق في نفسه
- ادعمه وطمنه إن مفيش عقاب مهما كان رد فعله في حماية نفسه
- علمه يوصف الفعل باسمه الحقيقي (التنمر) عشان يرتبط في ذهنه إنه شيء مرفوض
- الجأ للمدرسة وحاول تتواصل مع أهل المتنمر عشان تحمي ابنك من الضرر النفسي
- عوده دايما يطمن إنه يحكيلك وبلاش تسيبه يعزل نفسه ويتجنب التجمعات
تخطي ذكريات التنمر السابقة
- افتكر دايمًا إنها جزء من الماضي مش هيرجع واتعلم الطريقة اللي تقدر تواجه بيها أي سلوك مشابه
- بلاش تستسلم لمشاعر الندم والخوف وافتكر إنك مش مسؤول عن تصرفاتهم
- اعرف إنك تقدر تتحكم في رد فعلك عن طريقة مواجهة أي سلوك حالي
- خلي الأولوية لصحتك النفسية وتنمية المشاعر الإيجابية والبعد عن أي ذكريات سلبية
- مثلًا بلاش تسكت على أي موقف يحصل ويضايقك وعبّر عن انزعاجك ولكن بطريقة مقبولة
- دراسة بتأكد إن كتم المشاعر بيزوّد استرجاع الذكريات المؤلمة بجانب الإحساس بالضعف وقلة الثقة
- ارفض أي كلام وجّهه المتنمر ليك في الماضي وابذل مجهود عشان تكتشف حقيقة نفسك
- اسأل المقرّبين منك عن وجهة نظرهم فيك وفكّر عشان تحدد الإيجابيات والسلبيات في شخصيتك
- بس افتكر إن فكرتك عن نفسك لازم تكوّن بناء على قناعاتك مش مجرد كلام سلبي من بعض الأشخاص
- بلاش تعزل نفسك عن الآخرين وابني صداقات مختلفة واتعامل بطبيعية
- اختار مهارة عايز تتعلمها وابذل مجهود كبير عشان تحقق اللي نفسك فيه.. هيزيد إحساسك بالتحقق وهتقل مشاعرك السلبية واستشير طبيب نفسي لو مش قادر تتخطاها
