خدمات
التليفون الأرضي: إزاي تبلغ عن أعطال الخط وتصلّح مشاكله بنفسك؟
إزاي تصلح أعطال التليفون الأرضي؟
التليفون الأرضي وجوده أساسي لإجراء الإتصالات التليفونية الطويلة وتوفير جزء كبير من قيمة المكالمة في الموبايل، بجانب أهمية وجوده لتركيب الإنترنت المنزلي وأحيانًا التأخر في دفع الفاتورة ممكن يسبب سحب الحرارة وبنسبة كبيرة هتتأثر خدمة الإنترنت المنزلي.
طريقة إصلاح مشاكل التليفون الأرضي
- فك السلك من التليفون (اللي بيبقى في آخره مربع شفاف) وركّبه في فتحة تليفون تانية في الحائط
- الأحسن تركّب سلك التليفون في الفيشة الرئيسية الأقرب للشارع عشان توصل لأدق نتيجة
- جرّب تليفون تاني قديم عندك عشان تتأكد لو المشكلة في التليفون نفسه ولا من الخط سواء عن طريق صندوق الخطوط في عمارتك أو من السنترال نفسه
- غيّر سلك التليفون اللي بيتركب في الحائط وجرّب لو التليفون هيشتغل ولا لأ عشان تحدد مصدر العيب
- تآكل السلك أو أي كسر بسيط في الجانب البلاستيكي الموجود في طرفه اللي بيدخل في التليفون ممكن يأثر على جودة الحرارة
- ركّب سبليتر بين الفيشة الواصلة في الحائط وبين التليفون عشان تجرّب الفرق
- ولو مركّب سبليتر شيله وخلي السلك مباشرة في الحائط لأنها الطريقة الأضمن لتوفير الحرارة
- اتصل بالرقم الأرضي من الموبايل ولو سمعت صوت إزعاج بدون جرس التليفون يبقى المشكلة في الخط
- لو اكتشفت إن سبب المشكلة هو فتحة الفيشة في الحائط وقتها لازم تستعين بفني أسلاك متخصص
- شركة الإتصالات مش مسؤولة عن فتحات الفيش في المنازل
الإبلاغ عن عطل في التليفون الأرضي
- اتصل بشركة وي على 19777 من أي تليفون
- لو متاح خط أرضي تاني اتصل على رقم 111 أو من أي موبايل على 01555000111
- ابعت إيميل للشركة على البريد الإلكتروني [email protected]
- ممكن تتواصل مع الشركة عن طريق الأونلاين شات للتقدم بشكوى وتحديد معاد لزيارة فنية لحل المشكلة
طرق دفع الفاتورة
- أحيانًا بيبقى السبب هو التأخر في دفع الفاتورة وبالتالي لازم تدفعها في أسرع وقت بعد الاستعلام عن قيمتها
- طرق الدفع متنوعة زي فروع شركة وي أو عن طريق خدمات فوري ومصاري ووسائل الدفع الإلكتروني
