التسنين عند الأطفال: أعراضه وطرق التعامل معاه

التسنين من المراحل الصعبة اللي بتمر على الطفل والأهل، لأنها بتسبب الآلام للطفل وبتشكل صعوبة للأهل لعدم قدرتهم على تسكينها أو التعامل معاها بالشكل الصحيح، وشدة أعراضها بتختلف من طفل للتاني.

سن بداية التسنين

• عند الشهر الخامس أو السابع والتوقيت بيختلف بين طفل والتاني، وبيكتمل ظهور الأسنان اللبنية (20 سِنة) بعد أول 3 سنين من عمر الطفل
• ممكن نمو الأسنان يتأخر لأسباب وراثية أو مشاكل في اللثة

أعراض التسنين عند الأطفال

• احمرار اللثة وانتفاخها
• احمرار الخدين
• حكة الفم
• رغبة الحكة في اللثة أو الفرك فيها
• سيلان اللعاب
• أرق بسبب الألم
• الإسهال
• عدم انتظام الرضاعة
• ارتفاع درجة حرارة الطفل
• البكاء المتواصل وحدة طباع الطفل
• عض الأجسام

الأعراض الجانبية للتسنين

في أعراض بتظهر على الطفل وقت التسنين زي:

• الطفح الجلدي على الشفايف أو الدقن
• قرح اللثة

وده بسبب سيلان اللعاب المستمر واللي لازم تمسحه أول بأول لتجنب تراكمه على فم الطفل

أماكن الأسنان اللبنية ووقت ظهورها

الشكل ده هيوضحلك أماكن الأسنان ومتوسط السن اللي بتظهر فيه عند الطفل

تأخر التسنين عند الأطفال

شيء طبيعي وبيحصل مع أطفال كتير، وممكن ظهورها يتأخر لحد سن 12 شهر لكن لو اتأخرت لبعد كده لازم تستشير دكتور

علاج آلام التسنين

• خليه يعض على قطع فواكه مبردة زي الموز المهروس/ التفاح/ مانجا عشان تقلل آلام الأسنان
• طبطب على اللثة بقطعة قماش نضيفة ومبلولة عشان تقلل آلامها
• برد معلقة معدن في التلاجة واستخدمها على اللثة عشان تساعده يهدى
• اغسل إيدك كويس واعمله مساج بحركات دائرية للثة باستخدام إصبعك وممكن تعمله مساج بجل تسكين آلام التسنين
• في ألعاب مخصصة للفترة دي.. اغسلها وبردها في التلاجة وخليه يعضها
• امسح لعابه كل شوية عشان تتجنب تهيج فمه
• اتعامل مع مضايقته وتغيراته المزاجية بإنك تحضنه كتير عشان ده هيساعده يتخطى الألم
• مشروب الكاموميل بدرجة حرارة الغرفة هيساعده ينام بليل أحسن ويهديه ومناسب للأطفال من سن 6 شهور
• أكله أكل بارد زي الجزر المسلوق/ الزبادي/ العنب المتقطع قبل النوم عشان تهدي آلام الأسنان

  انتهاء أعراض التسنين

لا يوجد معاد محدد لانتهاء أعراضه، فممكن يستمر لمدة شهر أو أكتر، المهم إنك تتعامل معاها بطريقة صحيحة عشان تخفف الألم عن طفلك

رعاية الفم والأسنان عند الطفل

ابدأ بالتنضيف بالسنة الأولى

• ابدأ برعاية أسنان طفلك بمجرد ظهورها ونضفها على الأقل مرة واحدة يوميا بمجرد ظهور السن الأول
• عادة وقت النوم هو الوقت المناسب لبدء الروتين.. استعمل فرشاة أسنان ناعمة الشعر المصممة خصيصا للأطفال الصغار

تجنب العصائر والمشروبات السكرية

• قلل كمية المشروبات السكرية التي بيشربها الطفل
• تجنب إنه يروح السرير مع زجاجة عصير أو أي مشروب
• السكريات الطبيعية في العصير والصبغة في المشروبات الصناعية وحليب الثدي بيسببوا تسوس الأسنان

نضف الأسنان بالفرشاة مرتين في اليوم 

• لما طفلك يكون عمره 3 أو 4 سنين،تقدر تعلمه غسيل الأسنان تدريجيا لمدة دقيقتين
• استعمل كمية معجون أسنان بحجم حبة البازيلا وشجعه على بصق معجون الأسنان بدلا من بلعه