المحتويات
اختبار الذكاء أو الـ IQ Test هو اختبار بيقيس العمر العقلي لشخص معيّن، وهي طريقة بدأت في فرنسا ولكن نظريات وعلماء كتير أثبتوا إنها مرتبطة بأنواع محدودة من الذكاء ومش بتغطي كل جوانبه، وإن دقته محدودة لأنها بتقيس التأخر العقلي أكتر من الفروق الفردية في الذكاء بين الأشخاص.
تعريف اختبار الذكاء
- الذكاء هو الوظيفة الأساسية للعقل وبيتداخل في كل الأنشطة اللي بيقوم بيها وبيظهر تأثيره في التحصيل الدراسي أو مواقف الحياة والقدرة على الفهم بسرعة وبدقة
- كلمة IQ اللي بيستخدمها الناس للتعبير عن الذكاء فهي اختصار لكلمة (Intelligence Quotient) ومعناها حاصل الذكاء
- اختبار الـ IQ بيقيس مجموعة من المهارات زي الذكاء اللفظي والذاكرة وسرعة معالجة المعلومات
- الخبراء حددوا إنه بيشتغل أكتر على الجانب التحليلي من الذكاء ومش العملي أو الإبداعي
- وبيهتم بقياس الذكاء اللغوي والرياضي وبيتجاهل أنواع الذكاء التانية وبالتالي مهم تعرف إنه مش تقييم عادل لكل الأشخاص
- اختبار الذكاء عبارة عن أسئلة ليها اختيارات متعددة بيجاوب عليها الشخص في وقت محدد
- الوقت في اختبارات الذكاء عامل أساسي عشان كل ما الشخص جاوب على أسئلة أكتر في وقت أقل كل ما كانت نتيجته أعلى
تاريخ اختبار الذكاء
- في بداية القرن الـ 20 قررت فرنسا إن التعليم لازم يكون إجباري على جميع الأطفال
- عشان تقسّم الطلاب حسب مستواهم العلمي لجأوا للعلماء ألفريد بينيه وثيودور سيمون عشان يبتكروا طريقة لاختراع طريقة لقياس الذكاء
- الموضوع مش مرتبط بالمناهج التعليمية ولكن الاختبار بيقيس مهارات الاستيعاب والتركيز وحل المشكلات والحفظ ومعالجة البيانات للوصول لنتيجة واضحة
- اتسمى بمقياس Simone-Binet
- قبل المقياس ده كان الذكاء بيتحدد عن طريق عوامل زي حجم الجمجمة والطول والعرق ولكن وضع الاختبار ده حدد الموضوع أكتر بشكل علمي
- جامعات أمريكية اعتمدت على المقياس ده وطورته زي رائد علم النفس التربوي لويس تيرمان اللي كان أستاذ في جامعة ستنافورد
- طوّر لويس الاختبار ده وسمّاه مقياس Stanford- Binet
طريقة قياس نسبة الذكاء
- بيتقسم العمر العقلي على العمر البيولوجي وبتضرب النتيجة في 100 وبالتالي بتتحسب نسبة الذكاء
دليل الاختبار على العبقرية
- لويس تيرمان مع مجموعة علماء تانيين اختبروا ذكاء 1521 طالب في مدرسة أمريكية عشان يتأكد من تأثير أصحاب الذكاء الأعلى في المستقبل
- راقبوا تطور الأطفال دول على مر 70 سنة عشان يشوفوا مدى ذكائهم وقدرتهم على تحقيق إنجازات في المجتمع
- المفاجأة كانت إن أغلبهم اختاروا مهن عادية ومفيش إلا اتنين منهم بس حققوا إنجازات علمية كبيرة
- والمفارقة كانت إن الاتنين دول بقوا أساتذة في جامعة ستانفورد اللي هي نفسها بتعمل عنهم دراسة
- مع الوقت اكتشف العلماء إن الاختبار بيقيس الـ G factor أو القدرات المعرفية العامة لكن مش الذكاء كله
- الذكاء عملية معقدة بتشترك فيها مناطق كتير في المخ بناء على مواقف معيّنة وخبرات متراكمة وبالتالي صعب تحديد نسبته في اختبار بعينه
- الخبراء أكدوا إنه بيقيس مش أكتر من 50% من قدرات الشخص العقلية ولكن صعب يقيس تأثير البيئة على قدراته أو مهاراته الفنية والإبداعية والابتكارية
أنواع الذكاءات
- عالم النفس هوارد جاردنر هو صاحب نظرية الذكاءات المتعددة وبيعتبر من الرافضين لفكرة إن اختبار الذكاء هو المقياس الوحيد له
- بيقسمهم لـ 8 أنواع رئيسية وهم
- المنطقي الرياضي لحل مسائل رياضية بتحتاج قدرات ذهنية معينة زي مهارات حل المشكلات
- اللغوي لاستخدام الكلمات بنجاح للتعبير عن معنى معيّن وبيتطور النجاح فيها للتأليف أو العمل بالصحافة والكتابة
- البصري وهي القدرة على استرجاع التفاصيل الصغيرة وملاحظة التفاصيل بدقة
- الموسيقي وبيزوّد القدرة على العزف على الآلات الموسيقية وتمييز الألحان والقدرة على تأليفها
- الجسدي الحركي وهي تطويع الجسم وحركة الأطراف لتحقيق هدف معيّن وأحيانًا بيعبر عن المهارات الجسدية العالية
- الاجتماعي أو العاطفي وهي القدرة على التواصل مع الآخرين وفهم مشاعرهم ودوافعهم واستيعاب عيوبهم وفهم نقاط ضعفهم
- الشخصي وهو فهم مشاعر الشخص لنفسه وأفكاره الداخلية والقدرة على تحديد الأهداف وتحقيقها
- البيئي وهو القدرة على استغلال البيئة المحيطة للرغبات الشخصية سواء حيوانات أو نباتات أو حتى جماد
- لكن اختبار الذكاء بيقيس أول نوعين فقط (المنطقي الرياضي واللغوي)
أهمية اختبار الذكاء للأطفال
- دراسة في جامعة لندن بتقول إن اختبار الذكاء بيكشف عن بعض الاضطرابات زي التوحد
- بيظهر من خلال التباين في النتايج بين التفوق الشديد في مهارات معينة والفشل في مهارات تانية
- بيكشف الاختبار عن صعوبات التعلم اللي بتسبب تأخر المستوى الدراسي وبتحتاج تعاون الأهل مع المدرسة لتنمية قدرات الطفل ومساعدته
- بيكشف عن بعض الإعاقات الذهنية اللي تأخر ظهور أعراضها أو اكتشافها بعد نمو الطفل بمدة ممكن تتفاقم المشكلة عنده
- بتزيد مشاعر زي الحزن والاكتئاب وممكن توصله لسلوك عدواني خصوصًا مع إحساسه بالغربة عن الأطفال الآخرين اللي في نفس سنّه
- ممكن يكشف الاختبار عن الإعاقات الذهنية المختلفة في وقت مبكر
طريقة إجراء اختبار الذكاء للأطفال في مصر
- مركز الطب النفسى في مستشفى الدمرداش
- معهد الدراسات العليا للطفولة التابع لجامعة عين شمس
- وحدة الأطفال “بيت الشمس” في مستشفى العباسية
- ووحدة السمع والاتزان وأمراض التخاطب في مستشفى قصر العينى
- وحدة الأطفال في مستشفى حلوان للصحة النفسية
التدريب على اختبار الذكاء
- بعض أماكن العمل في مصر ومنها البنوك من ضمن اختبارات التقدم إليها هو اختبار الذكاء
- طرق كتير هتساعدك تدرب عليه عشان تحقق أعلى نتيجة في الاختبار
- خصص ساعة يوميًا تدرب نفسك فيها على الاختبار
- حدد مدة زمنية تخلص فيها حل الاختبارات التجريبية على بعض المواقع زي Test IQ أو 123 Test اللي بتتيح الاختبارات دي وقلل المدة كل يوم
- اختار أكتر وقت بتبقى مركز فيه عشان تحقق أفضل نتيجة مع الوقت درب نفسك على الحل في أوقات مختلفة عشان تكتسب خبرة ومرونة أكبر
- اعرف إن الحل الكتير خصوصًا في أسئلة أوجه الشبه والاختلاف بيقوي ملاحظتك
- نمي قدراتك في البيت وحاول تطلع الفروق بين الأشياء المتشابهة اللي قدامك
- اتحدى نفسك وحاول تنجز المهمة في أقل وقت ممكن وحل الكلمات المتقاطعة والسودوكو يوميًا
- دراسات أكدت إن القدرة على حل المتاهات والألغاز بيزود فرص تحقيق نتايج أعلى
- دراسة بتأكد إن القراءة في مجالات متنوعة بتقوي تركيزك وبتوسع مداركك وبتنمي مهاراتك
- تعلّمك مهارة جديدة بيزود إنتاج خلايا عصبية جديدة في مخك وبيقوي ذكائك خصوصًا تعلم اللغات والعزف على آلة موسيقية أو أكتر
- خصص وقت معين لمواقع التواصل واستبدل تصفحها بشيء تاني
- دراسة بتقول إن مشاهدة التلفزيون لفترة طويلة بتضعف مستوى ذكائك
- حافظ على عدد ساعات نوم كافية مش أقل من 8 ساعات يوميًا وخصص 30 دقيقة للرياضة يوميا مهما كانت بسيطة
