iptv هي اختصار لجملة (Internet Protocol Television) وهي توفير البث التلفزيوني عن طريق الإنترنت سواء كانت قنوات فضائية مفتوحة أو مشفرة ومش بيرتبط تشغيلها بوجود أي أسلاك للدش أو أطباق الأقمار الصناعية، لكن تقارير تقنية كتير شرحت إن استخدامها ممكن يضر التلفزيون الذكي أو هواتف الأندرويد ويهدد خصوصية البيانات.
مميزات استخدام تقنية iptv
- الاستغناء عن تركيب الصحون الهوائية وصيناتها أو الخوف من الطقس العاصف والأمطار الغزيرة اللي ممكن تأثّر على الإرسال وتسبب انقطاعه باستمرار
- بتتيح لك مشاهدة القنوات من مختلف دول العالم ومن جميع الأقمار مش شرط القمر الصناعي الخاص بالدولة اللي عايش فيها
- بتتفرج على القنوات اللي بتبث على أقمار تانية على الهواء مباشرة بدون الحاجة للانتظار لتحميل المقاطع المفضلة ليك على صفحة القناة على يوتيوب أو حتى مشاهد رابط ضعيف الجودة على الكومبيوتر
العيوب
- بعض الأشخاص أصبحوا يستخدموا روابط لتحميل تطبيقات وأكواد لفتح جميع القنوات المشفرة بدون إذن القنوات بذلك
- القنوات مش بتتيح الخدمة مجانًا لكن بعض الهيئات أو الأشخاص المحتالين بيخدعوك لدفع قيمة مالية بسيطة مقابل الاستمتاع بالمشاهدة عن طريق تطبيقات تستخدم أكواد مسروقة بتاريخ صلاحية محدود
- بجانب إنه تعدي على حقوق أصحاب القنوات ولكنه بيعرّضك للنصب لأن الخدمة ممكن تنقطع في أي وقت لأنها غير قانونية
- تقارير تقنية كتير أكدت إن تطبيقات خدمات التلفزيون على الإنترنت من المصادر الرئيسية لانتشار الفيروسات على التلفزيونات الذكية والموبايلات الأندرويد
- صعب الاعتماد عليها لو بتتفرج على حاجة محتاج تكمّلها لنهايتها (زي مبارة مصيرية لفريقك المفضل) لأن في أوقات كتير الخدمة بتنقطع فجأة بدون سابق إنذار
- أو حتى بيحصل تشويش من أصحاب حقوق البث لخفض جودة المشاهدة
- بيحتاج البث التلفزيوني على الإنترنت جودة إنترنت مش أقل من متوسطة (مش أقل من 2 ميجا) عشان يبث القنوات وتقدر تشوفها بدون تقطيع
- في بعض الدول بترصد الجهات المختصة الأجهزة المستمتعة بالخدمة وأحيانًا بتقطع عنهم خدمة الإنترنت لفترة محددة
حماية التلفزيون الذكي من الفيروسات
- بلاش توصله بأي جهاز شاكك إن فيه فيروسات سواء لاب توب أو فلاشة
- حدّث باستمرار كل التطبيقات الموجودة عليه
- بلاش تفتح أي مواقع على محركات البحث وتصفّح فقط المواقع اللي بتثق فيها
- ابعد عن تحميل أي تطبيق iptv غير موثوق في مصدره ومش تابع لمؤسسة معترف بيها
- حمّل التطبيقات من المتجر الأساسي مش من أي روابط تانية
- بلاش تفتح أي رابط مش واثق في درجة أمانه خصوصًا لو بتتصفح مواقع التواصل عليه
- اكتب أي رابط عايز تفتحه وقلل تعاملك مع متصفح/Browser التليفزيون قدر المستطاع
- خلي كلمة سر الراوتر قوية عشان تحمي شبكة الإنترنت من الاختراق
- تطبيقات كتير هتحمي تليفزيونك من أي ضرر زي (ESET Smart TV Security)
