صحة جنسية
الاعتداء الجنسي وتأثيره على مفهوم الجنس عند الأطفال والبالغين
إزاي الاعتداء الجنسي بيأثر على الرغبة الجنسية؟
المحتويات
الاعتداء الجنسي هو شكل من أشكال العنف الجنسي، وبيأثر على جوانب كتير من شخصية الضحية، زي قلة الثقة في النفس والآخرين والقدرة على المواجهة وتجنب لمس أو فهم معلومات طبية خاصة بالجسم.
ما هو العنف الجنسي؟
العنف الجنسي هو أي فعل أو محاولة لفظية أو جسدية أو مرئية بتجبر الشخص على أي نشاط أو اهتمام جنسي غير مرغوب فيه بغض النظر عن طبيعة العلاقة بين المعتدي والضحية سواء كان شخص غريب أو من العائلة
العنف الجنسي اللي لا يتضمن أي تلامس أو تعامل جسدي اسمه تحرش جنسي، لكن الأفعال اللي بتتضمن تلامس جسدي اسمها اعتداء جنسي
الدراسات أثبتت إن الاعتداء الجنسي ليه آثار سلبية على الصحة العقلية والجسدية للضحية ومنها عدم الشعور بالرضا عن علاقته العاطفية والجنسية مع شريكه والخوف من الجنس وضعف الاستثارة والرغبة الجنسية
آثار الاعتداء الجنسي على الأطفال
الآثار بتختلف من طفل للتاني، وممكن تمتد معاه لفترة طويلة وبتأثر على حياة الطفل زي:
- الشعور بالذنب والخجل من حكي أو التفكير في الاعتداء الجنسي والشعور بالعجز لعدم قدرته على رفضه
- صعوبة إقامة علاقة سليمة ووضع حدود صحية مع الجنس الآخر لأن التجربة الجنسية الأولى كان فيها خوف وشعور بالخجل والرغبة في الغثيان
- قلة الثقة في النفس
- بيأثر على حياة الطفل ونموه الجنسي وإدراكه التدريجي الصحيح والصحي للجنس لأنه بيربط بينه وبين حادثة مؤلمة وبيفهم إنها رغبة مخيفة وصعب التحكم فيها
- بتهتز عنده مباديء الحميمية والتلامس الجسدي البسيط مع أقرب الناس ليه
- الدراسات أثبتت ارتباطه بزيادة نسب الاكتئاب/ اضطرابات الأكل/ المخاوف الجسدية/ القلق الزايد/ لوم النفس عند الأطفال
- الميل للعزلة وتجنب العلاقات الجديدة لأنهم بيحسوا بالدونية وإنهم غير كافيين
- تكوين صورة سلبية عن جسمهم وتجنب المشاعر الرومانسية تجاه أي شخص والخوف من الإثارة الجنسية
- إظهار مجموعة متناقضة من المشاعر والسلوكيات وهو شيء مشترك بينهم وبين الأطفال اللي اتعرضوا لصدمة
- صعوبة النوم والمرور باضطرابات مختلفة زي الكوابيس والتبول الليلي
- الغضب الزايد أو الإصابة باضطراب القلق المزمن
- الهروب من الجلوس او التعامل مع شخص معين بسبب إنه الشخص المعتدي أو بيفكره بيه
- الاهتمام أو الكلام عن الأعضاء الحساسة أو لعب ألعاب جنسية غير مناسبة لسنه مع أطفال تانية
- المرور بأعراض اضطراب ما بعد الصدمة
آثاره على البالغين
- الدراسات أثبتت إن الضحايا من البالغين بيعانوا من مشاكل في تكوين علاقة جنسية سليمة وبيتجنبوا أو بيخافوا أو غير مهتمين أو بيحسوا بالإجبار عند الدخول في علاقة جنسية
- بيمروا بمشاعر الندم/ الاشمئزاز/ الغضب/ القلق/ الميل للتجنب في كل مرة الطرف التاني بيلمسهم
- بيواجهوا صعوبة في الشعور بالإثارة والنشوة وبيحسوا إنهم غير موجودين في العلاقة جسديا وعاطفيا
- بيتخيلوا صور وأفكار جنسية مزعجة وبيواجهوا صعوبة في حميمية العلاقة مع الطرف التاني
- السيدات بتواجه ألم مهبلي والرجال بتواجه صعوبة الانتصاب أثناء العلاقة وأحيانا الضحية ممكن يتخيل الشخص اللي اعتدى عليه مكان شريكه وبالتالي بيمر بمشاعر وذكريات مؤلمة
- البعض بيربط الشعور الجيد نحو ذاته بالجنس وده بيخليه يميل لإقامة علاقات جنسية متعددة وبيربط الحميمية وحب الطرف التاني بإنها حيلة للوصول ليه في النهاية
- وكل ما كانت العلاقة بالطرف الآخر حميمية وفيها حب كل ما كان استمتاعه بالعلاقة الجنسية صعب
- دراسات تانية على عدد كبير من السيدات اللي اتعرضوا للاعتداء الجنسي أثبتت ميل النسبة الأعلى منهم للعلاقات الجنسية العابرة وعدم الالتزام بعلاقة جادة وده بسبب قلة ثقتهم في نفسهم من الناحية الجنسية
- أو إنها طريقة للحصول على التصديق من الرجال
- البعض من الضحايا بيواجهوا مشكلة في الإلتزام والإخلاص لشريكهم، والبعض التاني بيعاني من فقدان مفاجيء للرغبة في الاستمرار في العلاقة لأنهم بيمروا بذكريات مفاجئة لحادثة الاعتداء أثناء تقرب شريكهم منهم
- الشعور بعدم الراحة عند لمس أجزاء معينة من الجسم
- الإصرار على تفاصيل معينة في العلاقة الجنسية زي الرغبة في إطفاء النور
- الشعور بالتوتر عند تخيل أو ممارسة العلاقة الجنسية واحتياج عوامل خارجية زي الأفلام الإباحية للشعور بالإثارة
- مواجهة صعوبات في العلاقات الجنسية والخلط بينها وبين الحب والرعاية بالطرف التاني والألم والاستغلال
آثار العنف الجنسي بأنواعه على البالغين
بيسبب مشاكل جسدية ونفسية وعاطفية للضحايا، وبيواجهوا صعوبة في فهمها أو التعامل معاها زي:
- المرور بمشاعر سلبية مختلفة زي اضطراب القلق والاكتئاب
- ظهور ذكريات الحادثة في تفكير الضحية بشكل مفاجيء وبتسبب آثار مشابهة للتعرض لصدمة
- المرور بمشاعر الخوف والقلق وعدم الارتياح وصعوبة التأقلم مع الأشياء لفترة بتختلف من شخص للتاني
- التفكير في أفكار انتحارية أو فيها أذى للنفس
- الميل لإدمان المخدرات والعزلة عن الآخرين لعدم القدرة على التأقلم معاهم
- الإصابة بنوبات هلع والخوف الشديد وهي بتصيب الأشخاص اللي اتعرضوا لصدمة أو درجات عالية من التوتر
- اضطرابات الأكل وعدم القدرة على التحكم فيها
- صعوبات النوم المختلفة زي عدم القدرة على النوم السريع أو الكوابيس المتكررة أو النوم لمدة أقل أو أطول من العادي أو النوم في أوقات غريبة
- الأفكار الانتحارية المتكررة
علامات تعرض طفلك للتحرش الجنسي
- الكوابيس المتكررة أو المرور باضطرابات نوم غير مبررة
- لو بيسرح كتير وتركيزه ضعيف معظم الوقت
- تغير عاداته الغذائية سواء فقدان الشهية أو الأكل الكتير
- لو بيمر بحالات مزاجية مفاجئة زي الخوف والقلق والسكوت
- الخوف من مكان أو أشخاص معينة فجأة وبيرفض يقعد لوحده
- ظهور ألعاب أو هدايا أو فلوس معاه مصدرها مش معروف
- لو نظرته لنفسه سلبية وفيها لوم من غير مبرر
- الفضول وفتح مواضيع أو يسأل أسئلة متعلقة بالجنس
- لو رفض تغيرله هدومه أو تشوف جسمه لو بتحميه
- التبول على نفسه بالليل أو بيتصرف تصرفات أصغر من سنه
- لو بدأ يتكلم عن الأعضاء الحساسة بشكل مختلف ويطلب من أصحابه يلعبوا معاه ألعاب فيها إيحاءات جنسية
- ممكن يقلد فعل التحرش مع لعبة عنده
- التوتر من إنك تلمسه أو تحضنه
- لو مشيته اتغيرت أو بيحس بآلام متكررة عند البول
- ظهور نزيف أو ألم أو تغير في لون المناطق الحساسة
- دور في هدومه على قطع أو دم أو أي بقعة مختلفة
خطوات تقديم الدعم لضحايا الاعتداء الجنسي
- أول خطوة للمساعدة هي إنك تسمع كويس للضحية حتى لو اللي بتحكيه صعب عليك
- اتقبل وصدق كلامها ومشاعرها الغاضبة خاصة وقت روايتها عن الحادثة
- اختيار الناجية إنها تحكيلك معناه إنها بتثق فيك.. حافظ على ده بوجودك من غير ضغط والحفاظ على السرية
- حسسها باهتمامك في مساعدتها وتخطيها الأزمة وتعاطفك معاها
- بلاش تحكم عليها ومتسألهاش عن سبب سكوتها قبل روايتها للي حصل
- التعرض لاعتداء خصوصا لو اغتصاب بيحسس الضحية بعدم الثقة والسيطرة على نفسها وحياتها.. ساعدها تاخد قرارها بنفسها
- ادعم قراراتها وتجنب النقاشات والجدل
- بلاش تقلل من تفاصيل واقعة الناجية ومقارنتها بقصص وضحايا تانية أو تهويل القصة أكتر من اللازم
- حاول تساعدها ترجع لحياتها الطبيعية
- الرجوع لمتخصص نفسي عشان تقدر تساعدها بطريقة صحية
