المهبل: معلومات عنه وطرق العناية به ووقايته من الأمراض

المهبل هو أنبوب عضلي مرن بيمتد من الفرج- وهو الجزء الخارجي من الجهاز التناسلي للسيدات- مرورا بالشفرات ومنطقة البظر لحد عنق الرحم، وعند سماع كلمة مهبل Vagina بتتخيل الجهاز التناسلي للسيدات بالكامل، ولكنه هو جزء منه.

تكوين المهبل

فتحة المهبل

هي ما بين فتحة مجرى البول والشرج، وهي المسؤولة عن خروج الدم أثناء الدورة الشهرية والعلاقة الجنسية وولادة الأطفال

جدران المهبل

• عبارة عن جدران عضلية مبطنة بغشاء مطاطي، وفيها أنسجة مطاطية بتسهل عملية التمدد والحركة أثناء العلاقة الجنسية أو الولادة
• أنسجة جدران المهبل بتمر بتغيرات هرمونية أثناء الدورة الشهرية، بمعنى إن الخلايا في الجزء الخارجي منها بتخزن مادة الجليكوجين، وأثناء عملية الإباضة البكتيريا بتكسر المادة دي للحصول على مستوى pH متوازن لحماية المهبل من البكتيريا والفطريات

غشاء البكارة

هو غشاء رقيق بيغطي فتحة المهبل بيختلف في الشكل والحجم ولكنه بيسمح بنزول دم الدورة الشهرية وممكن ينقطع مع أول علاقة جنسية

غشاء البكارة والدورة الشهرية

دم الدورة الشهرية بيمر بسهولة من المهبل بدون ما يتعرض غشاء البكارة ليمنعه من الخروج، لكن في أنواع من غشاء البكارة اللي بتغطي فتحة المهبل تقريبا بشكل كامل، والثقب المخصص لخروج الدم صغير جدا (غشاء بكارة مثقوب Microperforate، أو بيغطيه بشكل كامل (غشاء بكارة مسدود Imperforate) واللي بيمنع الدم من المرور

الأشياء المؤثرة في صحة المهبل

في عوامل مختلفة ممكن تأثر على صحته زي:

• الجنس، فالنوع غير المحمي ممكن يسبب العدوى المنقولة جنسيا
• الجنس العنيف ممكن يسبب إصابة في منطقة الحوض أو تعرض المهبل لصدمة
• بعض الحالات أو العلاجات الصحية زي التهاب الحوض ممكن يسبب ألم اثناء العلاقة الجنسية
• الندبات الناتجة عن الجراحة في الحوض أو أدوية علاج السرطان ممكن تسبب ألم أثناء العلاقة الجنسية
• استخدام المضادات الحيوية بيزود خطر الإصابة بعدوى الخميرة المهبلية
• منتجات النظافة الأنثوية وأدوات منع الحمل ممكن تسبب تهيج واحمرار المهبل وخلل في مستوى الـpH
• الحمل والولادة، لأن الدورة الشهرية بتتوقف أثناء الحمل وبالتالي زيادة إفرازات المهبل، وفي بعض حالات الولادة المهبل بيتمزق بدرجات مختلفة وممكن يحتاج عملية جراحية
• الاضطرابات النفسية، ممكن تقلل مستوى الإثارة والرغبة الجنسية والشعور بعدم الارتياح والألم أثناء العلاقة
• مستويات الهرمونات ليها تأثير عليه، فمثلا إفراز هرمون الإستروجين بيقل في الجسم بعد انقطاع الدورة الشهرية وأثناء الرضاعة الطبيعية، وده بيسبب ترقق بطانة المهبل وبالتالي الألم أثناء العلاقة الجنسية

اضطرابات المهبل

المشاكل الجنسية

• الألم المتكرر قبل أو أثناء أو بعد العلاقة الجنسية
• التألم أثناء الإيلاج بسبب التشنجات اللاإرادية لعضلات جدار المكان
• شد عضلات قاع الحوض واللي بتسبب الألم المزمن أثناء العلاقة الجنسية
• جفاف المهبل وخاصة بعد سن اليأس

العدوى المنقولة جنسيا

حالات زي المتدثرة والسيلان وبثور الأعضاء التناسلية والزهري بتأثر على صحة المهبل، وبتظهر أعراضها في الإفرازات غير الطبيعية وتقرحات الأعضاء التناسلية

التهاب المهبل

• العدوى وخلل التوازن الطبيعي للخميرة المهبلية والبكتيريا ممكن تسبب التهاب المهبل
• أعراضها بتتضمن الإفرازات المتكررة والرائحة الكريهة للمكان والرغبة في الحكة والألم

ارتخاء القاع الحوضي

• لما الأربطة الداعمة والأنسجة الضامة اللي بتثبت الرحم وجدران المهبل بتضعف، بتسبب تدلي الرحم أو المثانة أو المستقيم أو جدران المهبل، وده بيسبب ترس البول أثناء العطس أو الكحة
• الإصابة بالتكيسات المهبلية بيسبب ألم أثناء العلاقة الجنسية وبيصعب إدخال فوط التامبون

الإفرازات المهبلية

• هي شيء طبيعي ولكن زيادته بيدل على اضطراب صحة المهبل بسبب عدوى أو التهاب المهبل أو المناطق المحيطة بيه
• غالبا بيصاحبها الرغبة في الحكة والحرقة والاحمرار والتهيج والألم أثناء التبول أو العلاقة الجنسية

الإفرازات الطبيعية للمهبل

بتكون نتيجة للتغيرات الهرمونية في المهبل زي تغير مستوى الإستروجين، فارتفاعه بيزود مستوى الإفرازات وبيكون مرتفع أثناء:

• الفترة ما قبل الدورة الشهرية وأول أيامها
• عند حديثات الولادة في خلال الأسبوع والتاني بعدها
• في الشهور ما قبل أول دورة شهرية عند البنات
• فترة الحمل
• تناول أدوية فيها إستروجين زي أدوية الخصوبة
• الإفرازات الطبيعية لا يصاحبها رائحة ولونها أبيض خفيف في العادة
• في عوامل بتأثر على الكمية والتكرارية زي الحمل والدورة الشهرية والانتظام على حبوب منع الحمل والاستثارة الجنسية وسن اليأس

الإفرازات المهبلية غير الطبيعية وأسبابها

في بعض الأعراض تدل على عدم طبيعيتها زي:

• لو كانت أغزر من المعتاد
• في حالة إنها أسمك من المعتاد
• بيضاء ومتلاصقة
• لونها مايل للأصفر أو الأخضر أو الرمادي أو فيها دم
• رائحتها كريهة
• تصاحبها حكة أو حرقة أو ألم أو طفح جلدي

أسبابها

في مرحلة الطفولة

• عدوى بسبب بكتيريا من الجهاز الهضمي
• مواد كيميائية في الصابون
• وجود جسم غريب في المكان زي بواقي مناديل الحمام
• قلة النظافة الشخصية زي مسح الأعضاء التناسلية من الخلف للأمام أو عدم غسل الإيد بعد استخدام الحمام

في سنوات الإنجاب

• التهاب المهبل البكتيري
• داء المبيضات في الجلد
• التهاب المهبل بالمشعرات
• الأمراض المنقولة جنسيا زي السيلان أو عدوى الكلاميديا
• استخدام الفوط الخشنة والعطور والصابون المعطر لتنضيف أو تغيير رائحة المهبل
• استخدام الكريمات المهبلية أو مواد التزليق

أعراض الالتهابات المهبلية

• حكة أو تهيج في المهبل
• ألم المهبل أو المنطقة اللي حواليه
• رائحة غريبة أو كريهة
• الإفرازات المهبلية الشديدة
• حرقان وألم عند التبول
• ألم في أسفل البطن أو في الحوض
• التألم أثناء العلاقة الجنسية
• ظهور القرح في المهبل أو المناطق اللي حواليه
• وجود بقع دم بين فترات الدورة الشهرية أو بعد العلاقة الجنسية
• طفح جلدي في المهبل

الفروق بين الالتهابات البكتيرية والفطرية

• نوعين العدوى بيشتركوا في الأعراض
• ظهور إفرازات رقيقة لونها مايل للرمادي أو الأخضر ووجود رائحة كريهة مشابهة لرائحة السمك يدل على العدوى البكتيرية
• إذا كانت الإفرازات سميكة ولونها أبيض وبيصاحبها حرقة وحكة شديدة فهي في الأغلب عدوى فطرية

طرق الوقاية من الالتهابات المهبلية

في خطوات معينة ممكن تتبعيها للوقاية منها زي:

• تنضيف المهبل يقتصر على المنطقة الخارجية والمحيطة بيه فقط لأنه قادر على تنضيف نفسه بنفسه من الداخل
•  أثناء الاستحمام.. استخدمي مياه دافية وصابون بدون رائحة لتجنب تهيج المكان والتهابه
• ولأن الصابون المعطر بيقضي على البكتيريا الجيدة وبيعمل خلل في توازن درجة حموضة المكان
•  اتأكدي من غسل المكان كويس وشطف بواقي الصابون في تواني الجلد
•  نشفي المكان بفوطة ناعمة عن طريق الطبطبة
•  أثناء الدورة الشهرية..اغسليه أكتر من مرة يوميا لتجنب الرائحة الكريهة والإفرازات 
•  غيري الفوط الصحية كل 5 ساعات حتى لو مش مليانة لتجنب الإصابة بالتهابات مهبلية أو سرطان المثانة والرحم
•  بعد انتهائها.. نضفيه بمياه دافية وفوطة ناعمة من الأمام للخلف بلطف واتأكدي من نضافة منطقة خط البيكيني
• نضفي جانبي منطقة البظر عشان تتخلصي من بواقي الدم
•  لو بتعاني من الحكة بعدها.. املي البانيو مياه دافية وضيفي نص كوباية ملح واقعدي فيه بوضع السكوات
•  دايما نشفي المكان كويس من أي مياه لتجنب تراكم البكتيريا
•  في غير أيام الدورة الشهرية.. نضفيه مرة يوميا وغيري الملابس الداخلية المبلولة/ فيها عرق بشكل دوري
•  الملابس الداخلية القطن واللي مقاسها مناسب هي الأفضل
•  تجنبي غسلهم بمساحيق غسيل معطرة أو استخدام العطور/ البيرفيوم في المكان لأنهم بيسببوا الحساسية والالتهابات
•  تجنبي استخدام الدش المهبلي لأنه بيزعج البكتيريا الموجودة بشكل طبيعي وبيعلي نسبة الإصابة بيها
•  استخدمي الحمام (التبول) بعد العلاقة الزوجية للتخلص من كل البكتيريا الناتجة أثناء العلاقة
• ممارسة الرياضة بانتظام بيساعد في الحفاظ على صحة المكان
• تجنبي المشروبات الكحولية والتدخين

طرق التخلص من رائحة المهبل

بينقسم الموضوع لعادات يومية وعادات أسبوعية

العادات اليومية

• انتظمي على روتين نضافة يومي
• اغسلي الأماكن بين الفخدين كويس بمياه دافية ونشفيها بفوطة ناعمة برفق
• استخدمي صابون خفيف غير معطر لأن الأنواع المعطرة بتهيج الجلد
• تجنبي استخدام المنتجات المعطرة زي البيرفيوم أو غسول الجسم لأنها بتسبب خلل درجة الـ(PH) في المهبل
• استخدمي كريم الجسم المعطر على الأجزاء الخارجية فقط
• استخدمي ملابس داخلية قطن وتجنبي الحرير أو البوليستر لأنه بيسمح بتهوية المكان وبيقلل امتصاص العرق والتراب
• غيري الملابس الداخلية من مرة لمرتين يوميا
• نشفي المكان كويس وبرفق بعد التشطيف لتجنب تراكم المياه أو البلل

العادات الأسبوعية

• املي البانيو مرة أسبوعيا بمياه دافية مع كوباية خل تفاح واقعدي فيه 20 دقيقة لأنه بيقلل نمو البكتيريا
• تجنبي الملابس الضيقة واشربي مياه كفاية
• اغسلي المكان قبل وبعد العلاقة الجنسية للحفاظ على مستوى البكتيريا الطبيعي فيه
• استخدمي الصابون برفق على منطقة الفرج بس واغسليه ونشفيه كويس
• التبول بعد العلاقة الجنسية مفيد
• تجنبي المأكولات الجاهزة والسكريات لأنها بتسبب عدوى الخميرة
• نضفي المهبل من الأمام للخلف
• الانتظام على الأطعمة اللي فيها بروبيوتك لأنها بتقلل فرص الإصابة بالعدوى اللي بتسبب الرائحة وهو موجود في الزبادي والأطعمة المخمرة زي الكرنب والمخلل
• اخلطي نقطة من زيت أساسي زي زيت الشاي مع نقطة من زيت حامل زي زيت الجوجوبا مع المياه لاستخدامهم في شطف المكان من الخارج فقط أسبوعيا
• تجنبي استخدام الزيت الأساسي بدون الزيت الحامل واتأكدي إن جسمك مش حساس ليها

أطعمة لتحسين صحة المهبل

•  الزبادي اليوناني فيه بكتيريا نافعة بتساعد في الحفاظ على معدل الـ(PH) فيه
•  البطاطا غنية بفيتامين أ اللي بيساعد في تقوية أنسجة عضلات المكان
•  السلمون والرنجة فيهم أوميجا 3 اللي بيساعد على تنشيط الدورة الدموية
•  السبانخ غنية بالمغنيسيوم اللي بينشط الدورة الدموية وبالتالي تحسين العلاقة الجنسية للسيدات والرجال
•  البروكلي غني بمادة (Flavonoid Kaempferol ) اللي الدراسات أثبتت إنها بتحمي من سرطان المبيض
•  الجزر/ الفلفل/ الكرنب فيهم مادة الـ(Flavonoid Luteolin) اللي بتقلل خطر الإصابة بسرطان المبيض بحوالي 34%
•  المياه بتحافظ على ترطيب المكان ودرجة الـ(PH) فيه
•  الجوافة غنية بفيتامين سي اللي بيقلل خطر الإصابة بالأمراض المهبلية
•  بذر الكتان فيه مادة الـ(Phyto Estrogens) اللي بتعلي معدل الإستروجين في الجسم
•  التوم بيقلل خطر الإصابة بعدوى الخميرة المهبلية
•  المكسرات غنية بفيتامين هـ اللي بيقوي أنسجة عضلات المهبل وبتقلل جفافه خاصة أثناء العلاقة الجنسية
• المحار غني بالزنك اللي بيزود الرغبة الجنسية وبيحارب العدوى وبيرطب المهبل وبينظم الدورة الشهرية
•  الأفوكادو غني بالدهون الصحية اللي بتساعد الجسم على إنتاج الهرمونات الجنسية وبالتالي قلة آلام العلاقة الجنسية
•  البيض غني بفيتامين د اللي بيقلل خطر الإصابة بالتهابات المهبل أو الوقاية السريعة منها