المحتويات
الفاهيتا من أشهر الأكلات المكسيكية، بتتميز إنها لذيذة وخفيفة، وبتعتمد على الفلفل بألوانه (الأخضر والأصفر والأحمر)، مع شرايح صدور الفراخ، لكن ممكن تعملها باللحمة أو الجمبري، طريقة عمل الفاهيتا سهلة وسريعة وممكن تكون وجبة غداء أو عشاء وقدمها مع بطاطس محمرة أو بوريه.
طريقة عمل الفاهيتا بالفراخ
المكونات
- كيلو صدور دجاج مقطعة شرايح
- معلقة كبيرة نشا ذرة
- ربع كوباية عصير ليمون
- 2 حبة فلفل أخضر مقطع شرايح
- بصلة متوسطة مقطعة شرايح
- 2 حبة فلفل ألوان مقطع شرايح
- معلقة صغيرة سكر
- نص كوباية زيت زيتون
- نص معلقة صغيرة بودرة توم
- معلقة صغيرة بابريكا
- نص معلقة صغيرة بودرة بصل
- رشة شطة
- نص معلقة صغيرة كمون
- ملح وفلفل أسود
- عيش تورتيلا للتقديم
- جبنة شيدر مبشورة/ كريمة حامضة (اختياري)
الطريقة
- في بولة عميقة.. اخفق ربع كوباية زيت الزيتون وعصير الليمون والكمون والشطة والملح والفلفل الأسود وبودرة التوم والبصل والسكر
- ضيف صدور الفراخ وقلب كويس وسيبها في التلاجة 30 دقيقة على الأقل
- في طاسة كبيرة.. سخن باقي كمية الزيت وشوح فيها الفراخ لحد ما يبقى لونها دهبي ومستوية
- ضيف البصل والفلفل الأخضر وقلب لمدة 5 دقايق
- ارفع الفاهيتا من على النار ولفها في عيش تورتيلا
طريقة عمل الفاهيتا بستيك اللحمة
المكونات
- معلقة كبيرة زيت نباتي
- 450 جرام لحمة ستيك
- حبة بصل متوسطة مقطعة شرايح
- حبتين فلفل ألوان مقطع شرايح
- حبة فلفل أخضر مقطع شرايح
- ملح وفلفل أسود
تتبيلة اللحمة
- عصير ثمرة ليمون
- معلقتين كبار زيت زيتون
- فصين توم مفرومين
- نص معلقة صغيرة كمون
- ربع كوباية كزبرة طازة مفرومة
الطريقة
- اخلط مكونات تتبلية اللحمة كويس
- انقع اللحمة في طبق وغطيه ببلاستيك حفظ الطعام لمدة ساعة في التلاجة
- سخن الزيت في طاسة على نار متوسطة
- اتخلص من باقي التتبيلة من على شرايح اللحمة وحطها في الزيت
- شوح اللحمة لكل جنب 3 دقايق لحد ما تستوي وشيلها وغطيها بالفويل
- في نفس الطاسة.. ضيف البصل والفلفل الألوان والأخضر
- ممكن تزود معلقة صغيرة زيت لو احتاجت
- قلب الخضار مع بعضه وتبله بالملح والفلفل الأسود
- قطع اللحمة لشرايح رفيعة وضيفها للخضار وقلب كويس
- قدم الفاهيتا مع عيش التورتيلا
طريقة عمل الفاهيتا بالجمبري
المكونات
- نص كيلو جمبري مقشر
- ربع كوباية زيت زيتون
- فصين توم مفرومين
- ربع كوباية عصير ليمون
- معلقة صغيرة كمون
- ربع معلقة صغيرة شطة
- بصلة صغيرة مفرومة
- حبتين فلفل أخضر مفروم
- معلقة صغيرة فلفل هالبينو مفروم
- عيش تورتيلا للتقديم
الطريقة
- في بولة عميقة.. اخفق تلت كوباية زيت الزيتون مع عصير الليمون والكمون والشطة وملح وربع كوباية مياه
- انقع الجمبري في الخليط وسيبه في التلاجة لمدة 15 دقيقة
- في طاسة كبيرة.. سخن باقي كمية الزيت وشوح البصل مع التوم
- ضيف الفلفل الأخضر وتبل الخليط بالملح والفلفل الأسود
- شوح الجمبري في طاسة تانية لحد ما يبقى لونه وردي
- ضيف الجمبري لخليط الفلفل والبصل وقلب لمدة 5 دقايق
- ممكن تضيف معلقة كبيرة من تتبلية الجمبري
- ضيف الفلفل الهالبينو
- وزع الفاهيتا على عيش التورتيلا
