المحتويات
السشوار من الأدوات الأساسية في البيت سواء لتجفيف الشعر الناعم أو الكيرلي أو فرده قبل استخدام مكواة الشعر، في منه أنواع مختلفة حسب المادة المصنوع منها ونوع شعرك.
أنواع السشوار
النوع الـ(Ionic) أو الـ(Tourmaline)
- مناسب للشعر المجعد أو اللي بياخد وقت عشان ينشف وشكله كثيف لأنه بيعمل أيونات سلبية بتغلف خصل الشعر وبتساعد على فكه وتنشيفه أسرع
- بيعمل على غلق بصيلات الشعر وتحسين مظهره النهائي
- سعره أغلى من السشوار العادي
- تجنبيه لو شعرك متوسط الكثافة أو خفيف لأنه مش مناسب لعمل فوليوم للشعر
النوع السيراميك أو البورسلين
- أنسب للشعر الجاف والعادي لأن حرارته أقل وتوزيعها أبسط وبالتالي مناسب للشعر سريع الجفاف
- مناسب لكل أنواع الشعر
- بيساعد على تجنب تجعد الشعر
- بعض الأنواع فيها خاصية (Infrared) اللي بتنشف الشعر من الداخل للخارج بدرجات حرارة أقل
النوع الـ(Titanium)
- مناسب للشعر الكثيف والصحي لأنه بيوزع الحرارة بشكل متوازن بين السعر
- تجنبيه لو شعرك ضعيف أو جاف لأنه بينشف الشعر بسرعة
- وزنه أخف من الأنواع التانية
- اتأكدي من وزنه قبل الشراء عشان تختاري النوع الأريح لإيدك.. الأنواع اللي وزنها لحد نص كيلو مناسبة
نصائح عند شراء سشوار
- لو شعرك خفيف.. سرعة الـ(1500) وات مناسبة ليكي
- لو كثيف.. اختاري بين الـ(1600)- (2000) وات
- الأنواع اللي فيها درجات مختلفة من الحرارة أنسب عشان تقدري تعدليها طبقا لحالة شعرك
- خاصية الهواء البارد مهمة كخطوة نهائية عشان تحافظي على شكل ولمعان الشعر بعد تنشيفه
- استخدميه بعد التنشيف بنسبة 80%
- الـ(Diffuser) مهم لو شعرك كيرلي لأنه بينشف الشعر بدون فك خصل الشعر وبيحافظ على شكله
- الـ(Nozzle) مناسب لو بتفردي شعرك بالسشوار لأنه بيركز الحرارة على جزء معين ولكن تجنبي تركيزه على الشعر مباشرة
- استخدميه بإنك تمشيه مع شعرك أثناء تسريحه بفرشة
- الإضافات التانية زي المشط والفرشة اللي بتتركب فيه مناسبة لو بتحبي تفرديه بسيط
خطوات استخدام السشوار بطريقة صحيحة
- اشتري نوع كويس ومتعدد الخصائص عشان تقللي الحرارة والوقت اللي بتعرضي شعرك ليها
- تجنبي استخدام الفوط القطن لأنها بتتلفه ولفي شعرك بفوطة مايكروفايبر لمدة 10 دقايق بعد الاستحمام
- سيبي شعرك ينشف شوية بشكل طبيعي قبل تجفيفه بالسشوار
- لو شعرك كيرلي.. حطي المنتجات اللي محتاجاها عليه وهو مبلل ولفيه بالراحة بالفوطة وبعدين نشفيه بالـ(Diffuser)
- لو هتفرديه بالسشوار.. تجنبي استخدامه بقوة عالية على شعرك وهو مبلول لأن ده بيسبب تقصف الأطراف/ الهيشان/ التجعد
- استني لما ينشف بنسبة 80% وبعدين قسميه لأجزاء واعمليه بالسشوار
- حطي سيروم أو كريم مقاوم للحرارة على كل أجزاء الشعر قبل استخدامه عشان تقللي تلف الشعر
- مهم تستخدمي قطعة الغيار المكثفة للهواء لأنها بتركز الحرارة في الجذور وبتحمي الشعر من الحرارة الزايدة
- استخدمي فرشة مناسبة لحجم شعرك وخالية من المعادن عشان تقللي كمية الحرارة اللي بيتعرضلها
- ابدأي بالأجزاء الأمامية للشعر من الجذور للأطراف وبعدين الأجزاء الخلفية ولو عايزة تزودي حجم شعرك.. ركزي على الأطراف أو اقلبي شعرك وبعدين سرحيه بالسشوار
- استخدمي درجة حرارة متوسطة وتجنبي الإعادة عليه لأن ده هيسبب جفاف أو هيشان الشعر
- سيبي شعرك دقيقة يهدى قبل ما تبدأي جزء جديد عشان النتيجة النهائية تكون أفضل
- استخدمي خاصية الهواء البارد على شعرك آخر خطوة خاصة الأطراف عشان تحافظى عليه أطول وقت ممكن
- حطي سبراي الشعر بعد ما تخلصي ولفيه بطرحة حرير قبل ما تنامي
- نضفي السشوار/ أدواته/ الفرشة بعد كل استخدام لمنع تراكم منتجات الشعر والتراب عليهم
