المحتويات
التحرش الجنسي بالأطفال من الظواهر المنتشرة مؤخرا، وهو إشراك الأطفال بأفعال وسلوكيات جنسية لإشباع الرغبات الجنسية لبالغ أو مراهق، أو يكون بين قاصرين ولكن مع وجود شخص أقوى من التاني مع فرق سن 4 سنوات أو أكتر.
علامات تعرض طفلك للتحرش الجنسي
في علامات معينة ظهورها على الطفل بشكل مفاجيء علامة خطر، زي:
- الحلم بكوابيس أو بيمر اضطرابات نوم غير مبررة
- لو بيسرح كتير وتركيزه ضعيف معظم الوقت
- تغير عاداته الغذائية سواء فقدان الشهية أو الأكل الكتير
- لو بيمر بحالات مزاجية مفاجئة زي الخوف والقلق والسكوت
- إظهار الخوف المفاجيء من مكان أو أشخاص معينة فجأة وبيرفض يقعد لوحده
- ظهور العاب أو هدايا أو فلوس معاه مصدرها مش معروف
- لو نظرته لنفسه سلبية وفيها لوم من غير مبرر
- إظهار الفضول في مواضيع جديدة أو بدأ يسأل أسئلة متعلقة بالجنس
- لو رفض تغيرله هدومه أو تشوف جسمه لو بتحميه
- التبول على نفسه بالليل أو بيتصرف تصرفات أصغر من سنه
- لو بدأ يتكلم عن الأعضاء الحساسة بشكل مختلف ويطلب من أصحابه يلعبوا معاه ألعاب فيها إيحاءات جنسية
- ممكن يقلد فعل التحرش مع لعبة عنده
- التوتر من إنك تلمسه أو تحضنه
- لو مشيته اتغيرت أو بيحس بآلام متكررة عند البول
- وجود نزيف أو ألم أو تغير في لون المناطق الحساسة
- دور في هدومه على قطع أو دم أو أي بقعة مختلفة
خطوات تشجيع الطفل في حالة تعرضه للتحرش الجنسي
معظم الأطفال بتخاف تحكي عن تعرضها لأي شكل من الإيذاء الجنسي، لأسباب كتير زي:
- قلة الوعي بحجم المشكلة وتأثيرها عليه
- عدم وجود مساحة من الحميمية الكافية بين الطفل والأهل اللي تسمحله يحكي وهو حاسس بأمان
- قلة الوعي الجنسي عند الأطفال وإهمال الأهل لتعليم الطفل عن أعضاء جسمه وخصوصيتها وطرق حمايته
- المتحرش شخص قريب أو من العائلة وبالتالي الثقة التامة فيه
كل سن ليه التوعية الجنسية المناسبة معاه والطرق اللائقة للكلام عن الأعضاء الجنسية وطرق حمايتها، وتشجيع الطفل إنه يحكي تعرضه للتحرش محتاج خطوات زي:
- توعية الطفل بأعضائه الحساسة وخصوصيتها بيبني عنده حاجز تلقائي إن أي حد يلمسه
- علمه يحب نفسه وكلمه عن الجوانب الإيجابية في شكله وشخصيته.. ده هيعلي عنده الإحساس بالذات
- اسأله دايما عن تفاصيل يومه عشان يحس إنك مهتم تسمعها فتشجعه يحكي
- ركز مع كل التفاصيل اللي بيحكيها واسأله فيها عشان ممكن تلاحظ منها أي تصرف غلط بيحصله
- علمه يثق في نفسه عشان يقدر يواجه أي موقف ويرفضه
- لازم تعمله مبدأ (لأ يعني لأ) بإنك تحترم رفضه لأبسط الأشياء زي إنك تبوسه/ تحضنه/ تزغزغه لأن ده هيعوده يعبر عن مشاعره بوضوح ويرفض التصرفات لو حس بعدم ارتياح
- افتعل موضوع معين واتناقشوا فيه كعيلة وخليه يعبر عن رأيه بصراحة عشان يتعلم إنه مؤثر ومهم
- لو حصل موقف ضايقه وإنت معاه..علمه يرفضه وياخد حقه بوضوح وسانده فيه عشان الفكرة تترسخ عنده
- تجنب ردود الأفعال العنيفة زي العصبية على المواقف اللي بيحكيها عشان تبني ثقة الحكي بينكوا
- اهتم تسمعه وأكد له دايما إنك مصدر أمان وثقة مهما حصل عشان يحكيلك كل حاجة ومايخافش من رد فعلك
- مهم ترسخ في عقله حبك ليه غير المشروط مهما كان الموقف عشان مايتكسفش يحكي حاجة
- لو حكالك حاجة صدقه وبين له دعمك ودور ورا الموضوع عشان تاخدوا حقه ومايحسش بالخذلان
- علمه يعتمد على نفسه بأبسط المواقف عشان تبني عنده القدرة على الرفض وجرأة الحكي
- مثل معاه المواقف وردود الأفعال في البيت زي إن حد يلمسه/ يقرب منه عشان يتعلم يتصرف فيها
- الحب غير المشروط للطفل بيساعده يبقى أقوى وأنضج وعنده القدرة على التمييز
التصرف الصحيح للأهل بعد حكي الطفل
بعض الأهالي بيستخدموا طرق خاطئة ومنفرة بعد سماع تعرض طفلهم للتحرش الجنسي، سواء كان الجهل بأثر الموضوع على صحته النفسية والبددية أو الخوف الزايد عليه والرغبة في حمايته
طريقة التصرف تجاه الحكي ليها تأثير كبير عليه لأن الطفل بيكون في احتياج للدعم الشديد وبتساهم في تقليل شعوره بالذنب وليها دور في القدرة على تخطي الأزمة اللي بيمر بيها، وبالتالي مهم تتبع خطوات معينة زي:
- خليك هادي وانفعالاتك ثابتة على قد ما تقدر لأن أي رد فعل فيه خوف أو عصبية هيخوفه أكتر
- قدر مشاعر الإحباط والتدمير اللي حاسس بيها فمهم تستوعب كلامه وتحسسه إنه هيبقى كويس
- صدقه واشكره إنه قالك ولو عايز معلومات زيادة.. تجنب الأسئلة اللي ليها إجابة معينة وخلي أسئلتك تراعي مشاعره ومفتوحة
- تجنب إظهار الألم أو الارتياح لما يحكي حاجة معينة لأنه لو حس إن كلامه ضايقك.. مش هيحكي تاني
- اتكلم معاه إن اللي حصل غلطة الشخص التاني وإنه ماعملش حاجة غلط ومفيش حاجة تعيبه
- تجنب الكلام مع شخص تاني عن الموضوع لأنه لو سمع هيحسسه بالإحراج/ اختراق الخصوصية
- تجنب لومه إنه ماحكاش بدري واتكلم معاه دايما إنه مش سبب في اللي حصل ومش مسؤول عن تصرف الآخرين تجاهه
- ابعده عن الشخص المتحرش تماما وخد موقف تجاهه والجأ لشخص متخصص عشان يساعده ويساعد أفراد العيلة
- اسمعه للآخر وتجنب مقاطعته وخليك عطوف/ داعم/ حنين وقول له إنه اتصرف صح وبشجاعة لما حكالك
- دور على الطرق المناسبة لحمايته وعمل حدود واضحة لخصوصيته عشان كل أفراد الأسرة تلتزم بيها
- خليك معاه على قد ما تقدر.. خد أجازة من العمل واستغل أي وقت لقضاء وقت معاه زي توصيله وأخده من المدرسة والجلوس معاه فترات طويلة
