نصائح لاختيار حوض حمام والفروق بين أنواعه المختلفة

حوض الحمام ليه أشكال مختلفة من حيث اللون والخامة والحجم، فمهم تختار النوع المناسب لحجم الحمام وترتيبه في الديكور وفتحة الباب.

نصائح قبل شراء حوض الحمام

قيس مساحة الحمام عشان تتأكد من اختيار الحوض بحجم وشكل مناسب يضيف ليه ولا يسبب الزحمة

اتأكد إن حجم الحوض وارتفاعه مناسب لطولك عشان تحس بارتياح أثناء استخدامه

استغل أضيق وأصغر الأماكن في الحمام للتخزين خاصة أسفل الحوض

اعتمد على قطع الديكور المعلقة في مستوى الرؤية عشان تضيف للمكام بدون ما تاخد مساحة كبيرة

أشكال مختلفة لحوض حمام 

حوض حمام خارجي

• مناسب لو عايز تعمل تقفيلة أسفله عشان تستغل المساحة وتخزن حاجات زي الشامبو والبلسم
• بيتثبت فوق الرخام وبيتعمل فتحة تحت عشان الصرف
• موجود في شكل بيضاوي/ مدور/ مربع/ أشكال وألوان تانية

حوض حمام ساقط في الرخام

• مناسب للحمامات الصغيرة لأنه بيوفر المساحة
• تقدر تستغل المساحة تحته لعمل تقفيلة وتخزين الحاجات الزيادة
• لازم الشخص اللي يعمله يكون محترف عشان تتجنب المنظر السيء في النهاية

الحوض الثابت في الحيطة

• في منه الشكل اللي الصرف باين فيه وواصل لحد الأرض
• أو الشكل التاني المعلق والصرف فيه مثبت في الحائط وده بيضيف للمكان وسع أكتر وممكن تستغل المساحة تحته في تقفيلة
• في منه كل الأشكال زي البيضاوي/ المدور/ المربع وهو من الأنواع التقليدية

الحوض الطولي (القرطاس)

• بيحتاج مساحة كبيرة لأنه طويل وواقف على الأرض
• لا يوفر مساحة كبيرة أسفله للتخزين
• الصرف بيكون داخل الجزء الأسفل منه المقفول
• سعره غالي

الحوض الركنة

• مناسب للمساحات الضيقة لأنه بيتركب في أي ركنة مناسبة في الحمام
• شبه الحوض المثبت في الحائط
• الصرف بيكون مناسب لحجم الحوض والمكان المتوفر
• لا يوفر مساحة للتخزين في الجزء أسفله

الحوض الستاند

• أكتر نوع كلاسيكي ونمطي
• بيتركب فوق ستاند مخصوص ليه من نفس الشركة المصنعة للحوض
• في أغلب الأوقات الحمام/ الصندوق/ الصبانات/ حامل الفوط بيكونوا نفس الطراز
• الصرف بيكون ورا الستاند وغير مرئي
• سهل التعامل معاه في حالة الانسداد عكس الأنواع التانية

حوض ركبة

• شبه الحوض الستاند ولكن الستاند أقصر شوية
• بيتثبت في الحائط ومناسب للمساحات الضيقة
• سهل التعامل معاه في حالة الانسداد

الحوض الطبق

• هو أجدد أشكال الأحواض وأفخمها
• عميق ومناسب للاستخدام اليومي بالرغم من صغر قطره
• فيه منه أحجام وألوان وخامات مختلفة زي الزجاج
• بيتثبت على رخامة لونها متناسق معاه