المحتويات
السبع بهارات خلطة من أشهر أنواع التوابل المستخدمة في الوصفات المختلفة، خاصة في المطبخ المصري واللبناني، وبتتوافر جاهزة ومعبئة في محلات العطارة والسوبر ماركت، لكن مكوناتها بسيطة ومتوافرة، وممكن تحمصها وطحنها في البيت بسهولة.
مكونات السبع بهارات
بتحتوي على 7 أنواع مختلفة من التوابل، وممكن تحضرها من التوابل المطحونة أو غير مطحونة
من التوابل المطحونة
المكونات
- نص كوباية فلفل أسود
- ربع كوباية كمون
- معلقتين صغيرين حبهان
- ربع كوباية كزبرة
- 4 معالق صغيرة جوزة الطيب
- ربع كوباية قرنفل
- 4 معالق كبار قرفة
الطريقة
- اخلط المكونات مع بعض كويس واحفظها في برطمان معقم محكم الغلق
من التوابل الكاملة غير المطحونة
المكونات
- كوباية فلفل أسود
- نص كوباية كمون
- 2 حبة جوزة الطيب
- نص كوباية كزبرة
- 3 أعواد قرفة
- نص كوباية قرنفل
- 8 حبات حبهان
الطريقة
- في صينية عليها ورقة زبدة.. وزع التوابل ودخلها الفرن على درجة حرارة 170 لمدة 5 دقايق
- سيب التوابل تبرد واطحنها في الكبة لحد ما تبقى مسحوق ناعم ومتجانس
- خزنها في برطمان محكم الغلق
استخدامات السبع بهارات
- تتبيلة الشاورما: ضيف معلقة صغيرة على شرايح اللحم أو الفراخ مع باقي التتبيلة (الزبادي والزيت والخل)
- الكفتة: لكل نص كيلو لحمة مفرومة معلقة صغيرة من السبع بهارات
- تتبيلة الفراخ المشوية: ضيف معلقة كبيرة لتتبيلة الفرخة الكاملة، مع بصلة متوسطة وثمرة طماطم ونص معلقة صغيرة سماق والملح حسب الرغبة، سيبيها في التتبيلة ليلة كاملة
- الكبسة: لكل نص كيلو أرز، ضيف معلقة صغيرة من السبع بهارات
- ممكن كمان تضيفها لخلطة المحشي، أو الأرز بالكبد
- تجنب الإفراط في استخدامها لأن ريحتها ونكهتها قوية وممكن تغير طعم الوصفة
