المحتويات
المشويات السخنة من الأكلات المفضلة لأشخاص كتير بسبب نكتها اللذيذة والشهية، لكن تحضيرها في البيت في أحيان كتير نتيجته مش زي ما بنتوقعها، هنقولك نصايح لقبل وأثناء شواء اللحمة أو الفراخ، وبعض التتبيلات للحصول على أفضل مذاق.
نصايح لإعداد المشويات قبل الشواء
- اتأكد إن اللحمة أو الفراخ دابت خالص من التجميد
- تجنب تسييح اللحوم في الميكروويف عشان متفقدش نكهتها
- مهم تتبل اللحوم قبل الشوي على الأقل بـ8 ساعات
- سيب اللحمة أو الفراخ بره التلاجة 30 -45 دقيقة قبل الشوي
- جهز أدوات الشوي.. زي الأسياخ وشبكة الشواء والمعلقة بإيد طويلة وملقاط الشوي والهواية والفحم
- انقع الأسياخ في مياه دافية لمدة 30 -60 دقيقة عشان تتجنب احتراقها
- مهم تكون عارف كل المعلومات عن الشواية وطريقة استخدامها (خاصة الكهربائية)
- لو هتشوي لحمة مهم تختار القطعة المناسبة
اختيار أفضل قطعة لحم
- مهم تختار أفضل جزء سواء لحم بقري (البتلو هو الأفضل) أو ضاني
- يكون طري وقليل الدهون عشان يستوي بسهولة
- بيت الكلاوي من أطرى وأفضل أجزاء اللحمة الصالحة للشوي (موجودة في ضهر الحيوان وقريبة من الريش)
- لحمة الكتف بتتميز بتشابك الأنسجة مع العظام والكولاجين وبتكون خشنة ومطاطية لكنها مناسبة جدا للشوي، والأفضل تتبيلها بخل وبصل لمدة ليلة كاملة عشان تطرى أكتر
- الريش بتتميز بالطعم اللذيذ ولحمها اللين
- الريب أي من القطع الطولية الظهرية في جسم البقرة وبتتميز بإنها دسمة وقوامها طري
أفضل طرق لشوي الفراخ
-
قطع الفرخة لقطع صغيرة عشان متخدش وقت أطول في السوى
-
اشوي الصدور الأول لأنها بتاخد وقت أطول أو قلل سمكها
-
استخدم درجة حرارة متوسطة عشان تستوي صح (وتتجنب إنها تكون محروقة من بره ونية من جوه)
-
لو بتستخدم شواية كهربائية.. غطي الفراخ خلال مرحلة النضج
نصائح أثناء تحضير المشويات
- ادهن شبكة الشواية بالزيت عشان تمنع الأطعمة تلتصق
- لو هستخدم شواية الفحم.. اتأكد من تسخين الفحم كويس والأفضل تختار سريع الاشتعال
- كدس الفحم بشكل هرمي وسط الشواية وتجنب توزيعه على كل أجزاء الشواية، لأن تكديسه هيساعدك توصل للحرارة المطلوبة
- حط اللحوم أو الفراخ في النص لأن الحرارة هتكون عالية
- انقلها للأطراف الخارجية للشواية عشان تكمل سوى من غير ما تتحرق
- تجنب وخز وضغط اللحمة بشكل متكرر عشان ما تفقدش عصارتها وتبقى طرية
- استخدم ماسك اللحوم لتقليب اللحم أو الفراخ من وجه للتاني بدل الشوكة
- ضيف أعواد الريحان أو الزعتر أو النعناع على اللحمة أثناء الشواء لإضافة نكهة وريحة مميزة
تتبيلات مختلفة للمشويات
للحمة
- الكباب: (بصل مبشور/ عصير ليمون/ ملح/ فلفل أسود/ بهارات لحمة/ قرفة/ خل/ زيت/ ورق لورا)
- كفتة الحاتي: (بصلة مبشورة/طماطم مفرومة/ خل/ بقسماط ناعم/ بهارات كفتة/ ملح/ فلفل أسود/ دهن)
- بالمايونيز: (بصل مفروم ناعم/ توم مفروم/ كزبرة فريش مفرومة ناعم/ عصير ليمون/ زبادي/ مايونيز/خل/زيت زيتون/ ملح/فلفل أسود/ كمون/بهارات لحمة)
- بالصويا صوص: (خل/ صوص الصويا/ مستردة/ جنزبيل/ ملح/ فلفل أسود/ بهارات لحمة)
- تتبيلة البحر الأبيض المتوسط: (عصير ليمون/ خل/زبادي/زعتر فريش مفروم/روزماري فريش مفروم/كمون/ ملح/ فلفل أسود)
- الباربيكيو: (صوص باربيكيو/ توم مفروم/ عصير ليمون/ صلصة طماطم/ كاتشب/ صوص حار/ ملح/ فلفل أسود/ قرفة)
للفراخ
- بالزبادي: (زبادي+ صلصة طماطم+ توم+ بصل+ خل أو عصير ليمون+ فلفل أسود+ ملح+ بابريكا+ كركم+ جنزبيل)
- بالمسطردة: (مسطردة+ كاتشاب+ بابريكا+ ملح+ فلفل أسود+ بودرة توم+ جنزبيل+ كركم)
- تتبيلة حارة: (صلصة طماطم+ هوت صوص+ مايونيز+ خل أو ليمون+ ملح+ فلفل أسود+ كركم+ جنزبيل+ حبهان مطحون+ زيت)
- بالأعشاب: (ملح+ فلفل أسود+ بابريكا+ بودرة توم+ بودرة بصل+ زعتر+ ريحان+ روزماري+ بقدونس)
- بالصويا صوص: (صويا صوص+ زبادي+ كاتشاب+ ملح+ فلفل أسود+ جنزبيل+ بودرة بصل+ بودرة توم+ زيت+ عصير ليمون)
- بدبس الرمان: (دبس رمان+ عصير ليمون+ زيت+ ملح+ فلفل أسود+ توم)
