مراحل تكوين الجنين داخل رحم الأم خلال 40 أسبوع

مراحل تكوين الجنين بتبدأ وتنتهي خلال 40 أسبوع (فترة الحمل)، من اليوم الأول من آخر دورة شهرية للمرأة، أي حوالي أسبوعين قبل حدوث الحمل فعلياً، بتنقسم الأسابيع لـ3 فترات كل فترة منها بتستمر ما بين 12 و13 أسبوع، بيحصل خلالهم تغييرات في نمو الجنين لحد ما يكتمل.

مراحل تكوين الجنين: الـ3 شهور الأولى

بيمتد الجزء الأول من أول يوم حمل للأسبوع الـ 12

الشهر الأول (الأسبوع الأول للـ4)

• بعد 14 يوم من انتهاء أو بدء الدورة الشهرية، بتحصل الإباضة من المبيضين، وبتنتقل البويضة لقناة فالوب، وبعد ما بيحصل إخصاب بتنتقل للرحم ليحدث الحمل 
• في الأسبوع الأول من الحمل عادة بيكون في الفترة ما بين اليوم الـ 14 والـ 17 من اليوم الأول لآخر دورة شهرية، وبيجتمع الحيوان المنوي مع البويضة في قناة فالوب، وده معناه إن تاريخ الجماع مش شرط يكون أول يوم حمل
• مع نمو البويضة المخصبة، بيتشكل حولها كيس ضيق للمياه، وبيتملي تدريجياً بالسوايل، واسمه (الكيس الأمنيوسي)، ودوره بيساعد في حماية نمو الجنين
• بتتطور المشيمة كمان، وهي عبارة عن عضو دائري مسطح بينقل العناصر الغذائية من الأم للجنين وبينقل الفضلات من الجنين
• في الأسابيع الأولى دي، بيتشكل الوجه البدائي بهالات سوداء كبيرة للعيون، وبيتطور الفم والفك السفلي والحلق، وبتتشكل خلايا الدم وتبدأ الدورة الدموية للجنين
• أنبوب (القلب) هينبض 65 مرة في الدقيقة بنهاية الأسبوع الرابع، يعني مع نهاية الشهر الأول، بيكون طول طفلك حوالي 1/4 بوصة (أصغر من حبة الأرز)

الشهر التاني (من الأسبوع الـ5 لـ8)

• بتستمر ملامح وجه الجنين في التطور، بتتشكل الأذن على شكل طية صغيرة من الجلد على جانب الرأس
• بتظهر براعم صغيرة تنمو في النهاية عشان تكون الذراعين والساقين، وبتتشكل أصابع اليدين والقدمين والعينين
• بيتشكل الأنبوب العصبي (المخ والحبل الشوكي والأنسجة العصبية الأخرى للجهاز العصبي المركزي)، وبيبدأ الجهاز الهضمي والأعضاء الحسية في التطور 
• في الأسابيع دي بتكون رأس الجنين كبيرة نسبيا عن بقية جسمه
• مع نهاية الشهر التاني بيكون طول الجنين حوالي بوصة (11 إلى 14 ملليمتر) في حجم حبة التوت

الشهر التالت (من الأسبوع الـ9 للـ12)

• بيكمل شكل أطراف الجنين (الذراعين والأصابع والساقين والقدمين)
• وبيبدأ مرحلة الاستشكاف بحركات بسيطة زي إنه يفتح ويقفل قبضة إيده أو فمه
• بتطور أظافر اليدين والقدمين، وبيظهر شكل الأذنين الخارجية
• مع تطور الأسنان وتشكلها تحت اللثة وبتتطور الأعضاء التناسلية لكن بيكون صعب تحديد جنس الجنين بالأشعة فوق الصوتية
• مع نهاية الشهر التالت بيكون الطفل اكتمل تشكيله (جميع الأعضاء والأطراف)، وكمان الدورة الدموية والجهاز البولي بيبدأ وظفيته، وبينتج الكبد الصفراء
• بيكون طول الجنين 4 بوصة في حجم حبة البرقوق

مراحل تكوين الجنين: التلت التاني من الحمل

أغلب الحوامل بيعتبروا إن الجزء التاني (الوسط) من الحمل هي الأفضل، لأنه بتنتهي أو بتقل أعراض الوحم المزعجة زي الغثيان والقيء، وكمان هتبدأ تحس بحركة الجنين لأول مرة.

الشهر الرابع (من الأسبوع الـ13 للـ16)

• دلوقتي هتقدر تسمع نبضات قلب الجنين، وهيكون جهازه العصبي بدأ في العمل بشكل كامل، وهتشوف أصابع اليدين والقدمين واضحة وتقدر تحدد جنسه
• بيتم تشكيل الجفون والحواجب والرموش والأظافر والشعر، وبتزيد كثافة الأسنان والعظام
• هيقوم الجنين بحركات زي مص إبهامه، والتثاؤب والتمدد 
• مع نهاية الشهر الرابع طوله بيكون حوالي 6 بوصات ووزنه حوالي 125 جرام في حجم تفاحة

الشهر الخامس (من الأسبوع الـ17 للـ20)

• بتبدأ تحس الأم بحركة الجنين، وبتبدأ تنمو عضلاته ويبدأ يستخدمها بحركات سريعة
• بينمو الشعر على رأس الجنين، وعلى أكتافه وظهره وبيكون شعر ناعم اسمه الزغب، ودوره حماية الجنين، وعادة بيتساقط في نهاية الأسبوع الأول بعد الولادة
• بيغطي جلد الجنين طبقة بيضاء اسمها (vernix caseosa)، ودورها حمايته من التعرض الطويل للسائل الأمنيوسي
• مع نهاية الشهر الخامس، بيكون طوله 25 سم ووزنه 289 جرام في حجم ثمرة الموز

الشهر السادس (من الأسبوع الـ21 للـ24)

• بتظهر عروقه وبصمات أصابع الإيد والقدم، كمان بتبدأ الجفون بالانفصال وعينه تفتح
• بيستجيب الجنين للأصوات عن طريق النبض والحركة
• بتنمو الأكياس التنفسية في الرئة، وبيكون قادر يتبادل الأكسجين وثاني أكسيد الكربون بعد الولادة مباشرة
• مع نهاية الشهر السادس، بيكون طوله حوالي 30 سم ووزنه 900 جرام

مراحل تكوين الجنين: التلت الأخير من الحمل

 في المرحلة دي بيكون الجنين اكتمل نموه ما عدا الرئتين، وبيزيد وزنه بسرعة، وتبدأ الأم في مراقبة ومتابعة أوضاعه مع الدكتور لحد يوم الولادة، بعض الحالات ممكن تتجاوز  الأم الأسبوع الـ41 و42 بدون أي علامات للولادة وبتحتاج تدخل جراحي

الشهر السابع (من الأسبوع الـ25 للـ28)

• بيستمر تطور  الطفل وبيتغير وضعه بشكل متكرر ويستجيب للمنبهات زي الأصوات والضوء، ويبدأ السائل الأمنيوسي في التقلص استعدادا للولادة 
• في حالة الولادة قبل اكتمال الشهر التاسع، بيعيش الطفل لكن تحت رعاية في الحضانة لحد اكتمال نموه
•  وفي نهاية الشهر السابع يبلغ طول الجنين حوالي 30 سم، ووزنه كيلو أو أكتر في حجم رأس كرنب

الشهر التامن (من الأسبوع الـ29 للـ32)

• بيستمر الجنين في النمو و بتزيد نسبة دهون الجسم، وهتلاحظ الأم زيادة حركة وركله لبطنها
• وبيقدر يشوف ويسمع، ومع نهاية الشهر التامن بيكون طوله حوالي حوالي 1.5 كيلو، وطوله 41.1 سم  في حجم ثمرة أناناس

الشهر التاسع (من الأسبوع الـ33 للـ36)

• بتقترب الرئتين من التطور الكامل
• بيكون في تنسيق لردود أفعال الجنين، وبيكون قادر يرمش ويغمض عينيه ويدور رأسه ويمسك بقوة وبيستجيب للأصوات والضوء واللمس
• مع نهاية الشهر بيكون وزنه حوالي 2.6 كيلو، وطوله حوالي 47.7 سم في حجم

الشهر الأخير (شهر الولادة – من الأسبوع الـ37 لل40) 

• الأم معرضة للولادة في أي وقت، وبيتغير وضع الجنين وبيكون رأسه ناحية نهاية الرحم في منطقة الحوض