شغلصحة نفسية

إزاي تحقق النجاح في الحياة وتقاوم تأثير الفشل

إزاي تبقى شخص ناجح؟

النجاح هو تحقيق الهدف أو الغاية اللي الشخص بيسعى إليه وبتختلف أهداف الناس من شخص للتاني حسب طريقة تفكيره ومبادئه وتعليمه وبيئته والمجتمع المحيط بيه، وبالتالي ضروري تعرف تعريف النجاح وطريقة تحقيقه عن طريق الثقة بالنفس وكيفية مقاومة تأثير الفشل عليك.

النجاح

تعريف النجاح

  • النجاح هو تحقيق الهدف والغاية اللي سعى إليها الشخص من فترة، ولكن النجاح في الحقيقة قيمة متغيرة من شخص للتاني
  • بتختلف حسب ثقافة وبيئة كل الشخص اللي من خلالهم بيقدر يرسم صورة كاملة عن أهدافه وطريقة تحقيقها
  • مثلًا تربية بعض الأسر بتشجع على إن التعليم هو الهدف الأسمى وبيكتسب الشخص الثقافة دي من وقت الطفولة
  • وبالتالي معيار النجاح بالنسبة له هو تحقيق أعلى الشهادات الأكاديمية
  • عكس أشخاص تانيين شايفين إن النجاح هو تحقيق أكبر قدر من الفلوس في أسرع وقت
  • وبالتالي بتختلف الأهداف وفقًا للثقافة والمجتمع والتربية من الطفولة
  • عشان تحقق النجاح لازم تمر بخطوات كتير تأهلك لتحقيق هدفك وطموحاتك

تحديد الأولويات 

  •  تحديد هدفك في المستقبل بيبدأ من التركيز على أولويات تساعدك في الوصول لتغييرات وقرارات بتتماشى مع حياتك
  •   كل شخص مختلف في اهتماماته و أحلامه وأهدافه ولكن في بعض الخيوط المشتركة بتربط الناس ببعضها 
  • بعض الخيوط المشتركة تقدر تساعدك على اكتشاف الأهداف والسعي لتحقيقها
  • مهمات حياتك هي أولويات تمنحك المعنى والسعادة وهتساعك تكون ناجح وبالتالي ضروري تحدد المهمات اللي بتسعى لتحقيقها
  • لازم تكون قائمة المهمات معبرة عن أهدافك الشخصية والمهنية واللي ممكن تحددها مبدأيًا عن طريق الحاجات اللي بتستمع بالقيام بيها 
  • ضروري تخلي صحتك في أهم أولوياتك لأن التعب الجسدي بيأثر على إنتاجك وقدرتك على الإبداع والابتكار وتحقيق الأهداف
  • وابحث عن عمل يساعدك على تأمين دخل يوفرلك حياة كريمة عشان تحقق هدفك الأكبر في الحياة
  • لازم تحدد أهداف صعب الوصول إليها ومحتاجة جهد وعناء منّك لأن طموحاتك البسيطة بدون نظرة بعيدة المدى ممكن تدمر حياتك
  • هتقلل إحساسك بالرغبة في تحقيق المزيد وهتحس إنك اكتفيت بمجرد وظيفة ثابتة بدخل مناسب
  • رغم إن الطموح سواء العلمي أو العملي بيساعدك توصل لأعلى المراتب وبيشجعك تكون شخصية ليها ثقل بين المحيطين

معرفة نقاط القوة والضعف

  •  حدد الحاجات اللي بتحس بالسعادة وإنت بتعملها
  •  اعرف إن احساسك بالسعادة سببه نجاحك فيها ونظرات الإعجاب من المحيطين
  •  لو بتحس بالسعادة بسبب نشاط مش شاطر فيه هيتحول مع الوقت لإحباط
  •  دراسة بتأكد إن كتابتك ليومياتك هتسهل فهمك لشخصيتك وتحديد نقاط قوتك وضعفك
  •  ركز على استجابتك للمواقف المختلفة عشان تفهم نفسك أكتر عن طريق مراقبة ردود أفعالك العفوية سواء الكلام أو التصرفات أو حتى المشاعر
  •  زي مواجهة المشاكل عن طريق حلها ومقاومة تأثيرها أو مجرد الاستسلام وقتها هتعرف تقيم قدراتك صح وتضيف لنفسك مهارات مختلفة
  •  اطلب تقييم من شخص بتثق فيه وقارن بينه وبين صورتك عن نفسك وبلاش تحس بالإحباط واعرف إن البشر مختلفين في قدراتهم واستجابتهم للأمور وإن نقاط الضعف دي غالبًا بتبقى العقبات اللي بتأخر وصولك لهدفك في الحياة
  •  اعتبر إن اكتشافها خطوة لتحقيق النجاح بس بلاش تركز فيها طول الوقت لأنها ممكن تعطلك ووازن بين تنميتك لنقاط القوة وتحسينك لنقاط الضعف

 مواجهة الإحباط 

  • بتختلف استجابة الأشخاص لمشاعر الإحباط باختلاف الدافع اللي بيحركهم للنجاح وإصرارهم عليها
  • لو معندكش إصرار ودوافع كفاية عشان تتحرك تاني اعرف إنك هتتأثر نفسيًا وجسديًا
  •  الإحباط بيزود خطر الإصابة بأمراض نفسية كتير زي القلق المزمن والاكتئاب وأمراض جسدية كمان
  •  بيضعف المناعة وبيزوّد فرص الإصابة باضطرابات النوم والهضم
  •  بس لو إصرارك قوي وعندك دافع هتزيد ثقتك في نفسك وهتحقق النجاح اللي بيديك الأمل
  •  لازم تتصالح مع الشعور نفسه وتعرف إن طبيعي تحس بيه بس المهم إنك تستغله كدافع أو نقطة انطلاق جديدة من غير ما يستهلك طاقتك ووقتك
  • فرّق قبل أي موقف بين النتيجة اللي نفسك تحققها وبين القدرات والإمكانيات المتاحة
  •  عبر عن مشاعرك السلبية مع حد بتثق فيه لأن ده هيسهل حلها ولأن الكبت ممكن يسببلك مشاكل صحية
  •  استفيد من أخطاء الماضي من غير ما تسيطر عليك مشاعر الندم وركز في اللحظة الحالية بس
  •  ابذل مجهود كبير عشان تخرجه من تفكيرك واتعامل على إنك بتبدأ من جديد وحدد معاد تحقق فيه نتيجة معينة عشان تحس بالإنجاز

استخدم نظرية باريتو 

  • تطبيق نظريات العمل للوصول لتحقيق الأهداف في العمل بيحتاج للإطلاع على نظريات كتير ومن أهمها نظرية أو قاعدة باريتو
  • سنة ١٨٩٥ كان عالم الاجتماع الإيطالي فيلفريدو باريتو vilfredo pareto قاعد في جنينة بيته
  • كان بيتأمل حبوب البسلة اللي بتنمو فيها  واكتشف إن ٢٠٪ من القرون بتنتج حوالي 80% من البسلة الناضجة الصالحة للأكل
  • الملحوظة دي كانت ملهمة لباريتو ده بجانب معرفته إن 80% من الثروة في إيطاليا بيملكها حوالي 20% من الإيطاليين
  • وده اللي خلاه يفكر في قانون أو قاعدة اتعرفت باسمه بعد كده قاعدة pareto  أو قاعدة عشرين تمانين
  • وفقا للقاعدة فأي موارد أو مجهود مبذول لتحقيق هدف معين أو نجاح أو استثمار بيتقسم لجزئين وهما الأقلية المهمة جدا أو الأكثرية التافهة
  • وده معناه إن ٢٠٪ من المجهود والموارد بتمثل الأقلية المهمة جدا أو vital few
  • وهي المسؤولة عن تحقيق ٨٠٪ من النتايج والإنجازات
  • وإن الـ 80% الباقية من المجهود والموارد بتبقى سبب في تحقيق ٢٠٪ بس من النتايج واللي بتمثل الأغلبية التافهة trivial many
  • المبدأ ده بيفتح قدامنا الباب لإننا نبذل مجهود كبير عشان نفهم الموارد والأنشطة اللي ممكن نعملها وتوصلنا للنتيجة دي
  • الفهم اللي هيخلينا نبذل ٢٠% مجهود عشان نحقق ٨٠٪ نتايج والموارد ممكن تكون فلوس أو جهد أو وقت أو سلع معينة بتتباع أكتر غيرها
  • اليوم فيه نفس عدد الساعات بيقضيها الناس كلها زي بعض وفيه اعتقاد إن كل ما عدد ساعات شغلك زاد كل ما هتحقق نتايج أحسن وده مش صح
  • لأن الحكمة من تحسين نتايجك هي طريقة استغلالك للوقت وتركيزك على الحاجات اللي هتطلعلك أحسن نتيجة مش عدد ساعات شغلك
  • تحديد الـ20% المهمين أساسي في ترتيب أولوياتك وتخطيطك ليومك عشان تحقق أكبر استفادة منه
  • وهتساعدك خصوصًا لو إنت مدير أو عندك خطط وطموحات كبيرة مهم تحدد أهم الحاجات اللي تعملها بنفسك والمهام اللي تكلف بيها موظفينك
  • تدريبك على قاعدة عشرين تمانين هيخليك تحدد المخاطر بشكل أكتر دقة وهيقلل نسب الفشل
  • وإدراكك لنقاط القوة فيك حتى لو قليلة هيخليك تركز عليها وتستغلها بشكل أحسن

استخدم الذكاء العاطفي 

  • مستوى الذكاء والقدرة على حل المشكلات الدقيقة مش هو مفتاح النجاح
  •  بعض الأذكياء بيفشلوا في تكوين علاقات اجتماعية
  •  القدرة على إدارة المشاعر وإظهارها بأحسن شكل بيتسمى الذكاء العاطفي وهو القدرة على التحكم في المشاعر لتقليل الضغوط سواء خوف من شيء أو ضيق من شخص
  • بيظهر الذكاء العاطفي في بعض السمات الشخصية زي التكيف مع البيئة المحيطة
  •  وتحمل المسؤولية والتحكم في السلوكيات المندفعة وإدارة الأزمات
  •  التواصل بوضوح مع الآخرين وبناء علاقات قوية أساسي في اكتساب الذكاء العاطفي
  •  دراسة بتقول إنه بيزود فهمك لطبيعة الشخصيات المحيطة بيك
  •  بيساعدك تكسب محبة اللي حواليك
  •  بيحققلك إشباع نفسي واجتماعي دوره مهم في ترتيب أولوياتك وتحديد أهدافك
  • بيحسن مستواك في العمل أو الدراسة أو في التعاملات مع زمايلك أو مع مديريك اللي محبتهم ليك بتنعكس على أدائك وتطورك
  •  الذكاء العاطفي بيحسن صحتك وبيحميك من الأمراض
  •  دراسة في جامعة تكساس بتقول إنه بيقوي جهاز المناعة وبيظبط مستويات ضغط الدم
  •  بيقلل فرص النوبات القلبية والسكتات الدماغية
  •  بيحميك من التأثير المدمر للاكتئاب اللي بيمنعك من مواصلة الحياة بطبيعية
  •  وكلها عوامل بتشجعك تطور من نفسك وتحقق النجاح اللي بتتمناه
  •  دراسة في جامعة اليكانتي الإسبانية بتقترح تدريس الذكاء الاجتماعي في الجامعات
  •  بتقول الدراسة إنه عامل أساسي في نجاح الطالب في حياته العملية
  •  طرق كتير هستاعدك تحقق الذكاء العاطفي
  •  راقب تصرفاتك مع الناس وحط نفسك في مكانهم وشوف رد فعلك
  •  خليك متواضع ومبتسم مع كل الناس
  •  شاركهم في أفراحهم وأحزانهم باللي تقدر عليه واختار ألفاظك بعناية وقت كلامك مع شخص غريب
  •  اتحكم في عصبيتك أو إظهار أي مشاعر سلبية
  •  اتحمل مسؤولية تصرفاتك واعتذر عن أي خطأ غير مقصود
  •  خليك متكلم وتفاعل مع الناس في المواضيع اللي تهمهم وشاركهم ولو بجزء بسيط من تفاصيل حياتك
  •  عبر عن رأيك وقت اللزوم واظهر حماسك لأي شيء بتعمله
  •  محاولتك لفهم إللي حواليك من خلال تعبيرات الوجه ولغة الجسد أساسية في اكتساب الذكاء العاطفي

مقاومة تأثير الفشل

  •  الفشل مش بيعبر عن قيمتك كشخص.. ولو استسلمت لتأثيره هتتأذي على جميع المستويات
  •  دراسة بتقول إن الاستسلام للفشل بيوهمك إن تحقيق أهدافك صعب وبيقلل ثقتك في نفسك وبيضعف الأمل في تحقيق النجاح
  •  بيخلق عندك خوف وبيخليك عاجز عن استعادة طاقتك للمحاولة من جديد وبيزود فرص إصابتك بالاكتئاب
  •  دراسة في جامعة إنديانا بتأكد إن الفشل في البداية هو عامل أساسي في طريقك للنجاح
  •  وإن أول طريق لمقاومة تأثير الفشل هو معرفة أسبابه الحقيقية
  •  امسك ورقة وقلم وحدد نقاط القوة والضعف في شخصيتك
  •  اشتغل على تقوية نقاط ضعفك واتعامل مع الفشل كأنه شيء مؤقت مش هيستمر طول العمر
  •  ابعد عن الأشخاص السلبيين وقرب أكتر من الناس اللي بتثق فيهم لأن دعمهم أساس تخطي أي إحساس بالفشل
  •  خلي التجربة الفاشلة نموذج تتجنب تكراره في المستقبل وافتكر التحديات اللي نجحت في تحقيقها
  •  دور على قصص ملهمة لناس حواليك حققوا النجاح بعد مرات من الفشل
  •  دراسة بتقول إن الأحسن تركز على النتيجة اللي عايز توصلها مش إنك تتجنب الفشل
  •  ده مش معناه إنك تهمل الدروس المستفادة من أخطائك
  •  لكن سيطرة الخوف على تفكيرك هيقلل تركيزك وهيزود فرص الفشل
  •  دراسة بريطانية بتأكد إن رواد الأعمال المتفائلين فرص نجاحهم أكتر من غيرهم
  •  حتى لو فشلوا في بعض المرات بس الأمل بيزود حماسهم
  •  مارس نشاط تاني بتحبه جنب هدفك الأساسي لأنه  هيحسسك بالتحقق وهيدفعك تبذل أقصى مجهود لتخطي الفشل

مقالات ذات صلة

زر الذهاب إلى الأعلى