المحتويات
المراهقة من المراحل الأساسية في تكوين الشخصية وتحديدًا من سن 10 لـ 19 سنة وبتحتاج معاملة خاصة من الآباء والأمهات تجاه الابناء، نظرًا للتغيرات البيولوجية والنفسية والانتقال من مرحلة الطفولة للشباب اللي بتحتاج معاملة خاصة للحفاظ على التوزان النفسي للابناء، وتدريبهم على سلوكيات معينة تؤهلهم للنضوج والتعامل مع المجتمع بسلاسة.
نصائح للتعامل مع الابن أو الابنة في فترة المراهقة
- احتويهم وناقش أفكارهم ووجهة نظرهم وبين لهم حبك باستمرار عشان تقوي علاقتك بيهم وتعزز ثقتهم وتقديرهم لنفسهم
- اسمعهم باهتمام وتجنب أي مشتتات واحترم مشاعرهم سواء الفرح أو الحزن
- تجنب اقتصار معاملتك معاهم على التوجيه والتأنيب
- وضْح الحدود والقواعد عشان تتجنب أي سوء فهم أو إيجاد طريقة للخروج عنها
- امنحهم حرية واستقلالية لكن مع المتابعة والمراقبة بشكل إيجابي لأن الطريقة السلبية هتعكس إحساس بالتسلط ممكن يسبب الكدب والعند
- شجعهم على تحمل المسؤولية المناسبة لسنهم واسألهم عنها لكن بطريقة إيجابية
- اهتم بالأمان الإلكتروني وطرق الرقابة الأبوية على المواقع
- اتفق معاهم على قواعد لاستخدام الإنترنت بأمان زي عدم مشاركة المعلومات الشخصية أو التعرف على أشخاص غرباء
- أكد على ضرورة اللجوء ليك في أي مشكلة أو موقف متعلق بعدم ارتياحهم
- خلي تصرفاتك بتعكس إنك أكتر شخص هيفهمهم ويقدر يساعدهم
- خليك قدوة لأبنائك في تصرفاتك زي احترام الآخرين وتحمل المسؤولية وتقديم المساعدة لما يطلبوا منك نصيحة أو مساعدة
- اعرض وجهة نظرك وسيبهم ياخدوا القرار بنفسهم
فهم تقلبات المراهق النفسية
- دراسات بحثت في سبب تغيرات المراهقين المزاجية على مدار فترات قصيرة
- بيزيد نشاط قشرة الفص الجبهي بالدماغ المسؤولة عن اتخاذ القرارات وتفاعلات الشخص الاجتماعية
- بالإضافة لزيادة نشاط الخلايا العصبية في المخ وقت المراهقة أكتر من أي مرحلة عمرية تانية
- بتنمو مناطق زي الفص الجبهي والفص الجداري والمادة البيضاء في المخ اللي بيساعدوا على التحكم في الانفعالات
- اكتمال نموهم بيساعدك تتحكم في مشاعر الغضب والعصبية حتى ولو بنسبة محدودة وده بيفسر سبب إظهار المراهقين لمشاعرهم بشكل واضح وقلة تحكمهم في الانفعالات العاطفية
- دراسة بتأكد إن وقت التوتر بتنطلق هرمونات في جسمنا زي هرمون ( allopregnanolone )
- الهرمون ده مهديء للأعصاب عند البالغين لكن عند المراهقين تأثيره العكس تمامًا
- بتزيد حساسية المراهق للمواقف المختلفة وبيدخل بسهولة في دوامات الضيق والاكتئاب وبالتالي ضروري تقرّب منّه عشان تشجعه يحكيلك عن مشاكله وتبحث معاه عن حل ليها
- اعرف إن ممكن يبقى التقلبات سببها إصابة ابنك المراهق بمرض اكتئاب المراهقين
- وهو مشكلة صحية /عقلية بتسبب شعور بالحزن وفقدان الاهتمام والرغبة في أي شيء
- مركز السيطرة على الأمراض والوقاية منها الأمريكي قال إن 3.2٪ من الأطفال بين 3 لـ17 سنة (حوالي 1.9 مليون) بيتم تشخيصهم بالاكتئاب كل سنة
- آباء كتير بيتجاهلوا أعراض الاكتئاب وبيتفرضوا إنها تقلبات مزاجية بسبب قلق البلوغ والتغييرات الفسيولوجية للمراهقين وده بيأدي لتفاقم الأعراض اللي ممكن توصل للانتحار
- بيظهر في أعراض كتير منها:
- الغضب والتهيج
- التعب المستمر
- صعوبة التركيز
- انخفاض الدرجات التعليمية
- النوم لساعات طويلة
- شكوى من آلام جسدية
- التقليل من الذات
- عدم التفاعل مع الأصدقاء والأسرة
- خطوات كتير تقدر تعملها عشان تخفف حدة الاكتئاب أو التقلبات المزاجية غير المبررة ومنها:
- اتكلم معاه وحاول تساعده في حل مشاكله
- أمن له جو أسري هادي وتجنب مشاركته في المشاكل الأسرية زي الطلاق
- شجعه يتعلم هواية أو مهارة بيحبها وتجنب تقلل من مشاكله أو شعوره سواء بالحزن أو القلق
- استعين بدكتور نفسي في أسرع وقت عشان تقدر توجهه صح
مساعدة المراهق في البعد عن التدخين
- اعرف إن صوتك العالي ورد فعلك العنيف هيسبب نتيجة عكسية
- خليك هادي واتكلم معاه عشان تفهم السبب اللي دفعه للتدخين
- مثلًا ممكن يبقى عايز يحس بالنضوج والاندماج في مجموعة معينة أو حتى بدافع التجربة
- اشرحله أضرار التدخين على صحته ونفسيته مع الوقت ودلل على كلامك بنماذج لأشخاص مقربين تأثرت حياتهم وصحتهم بسبب التدخين
- خليك قدوة ووقف تدخين فورًا على الأقل قدامه إذا كنت مدخن
- خلي الخطة فيها مشاركة بينكم في شكل تحدي للاستمرار لأطول مدة بدون تدخين
- شجعه على الاندماج في أنشطة جديدة تبعده عن دواير المدخنين
- فكّره إن مقاومته لتأثير انسحاب النيكوتين في جسمه حاليًا هتقلل رغبته في التدخين بعد مدة قصيرة
- استشيره في الأمور اللي تخصك وعرّفه قيمة رأيه عشان تزيد ثقته في نفسه
- وفّرله مساحة للرفض وتقبل وجهة نظره في الأمور العائلية بعدها انصحه بضرورة رفض عروض التدخين من الأصدقاء
- افتكر إن السيطرة المبالغ فيها والرغبة في الطاعة المستمرة بتخلق شخص بينقاد وراء الآخرين بسهولة
- ابدأ معاه ممارسة الرياضة وشجعه عليها ونظم أنشطة مختلفة في الأجازات تعمق فيها ترابط الأسرة
تربية المراهق على الحفاظ على النظافة الشخصية
- زيادة التعرق عملية طبيعية في سن المراهقة لأن الغدد العرقية بتكون نشيطة أكتر من مرحلة الطفولة
- عود ابنك من مرحلة الطفولة على الاستحمام خلال فترات متقاربة
- مهم تعلمه تجفيف الإبطين بشكل جيد بعد الاستحمام لمنع تكاثر الجراثيم والبكتيريا المسببة لرائحة العرق
- اختارله ملابس داخلية قطن لأنها بتساعد الجلد يتنفس ويمتص العرق
- خليه يختار بنفسه مزيل عرق وبرفيوم
- اشتري له أدواته الشخصية زي كريم وشفرة الحلاقة وقصافة اﻷظافر وفرشاة الشعر واﻷسنان
- بيفرز الجسم بصفة مستمرة الهرمونات الجنسية اللي بتحفز الغدد الدهنية وبتسبب انسداد مسام الجلد وظهور حب الشباب
- ضروري يستخدم غسول مناسب لنوع بشرته وممكن تستشير دكتور عشان تتجنب إن الحبوب تسيب علامات
- اهتم بنظامه الغذائية يكون صحي وخاصة الفاكهة والخضروات وتجنب التوابل للتخفيف من التعرق والأطعمة الدسمة لأنها بتسبب رائحة كريهة للجسم
نصائح للأم لتدريب ابنتها المراهقة على قواعد النظافة الشخصية
- النظافة الشخصية كروتين يومي في وقت مبكر بتوفر صحة آمنة للبنت خلال فترة المراهقة
- بيميل الأطفال لتقليد الكبار لو بتهتمي بنفسك هيكون ده شيء عادي وطبيعي بالنسبة لها
- مهم تعليمها الاستحمام كل يوم وغسل الشعر مرتين أو 3 في الأسبوع
- علميها تغير الملابس الداخلية والشرابات مرة أو مرتين في اليوم
- اشتري لها مزيل عرق طبيعي وانصحيها بضرورة غسل الأسنان بالفرشة والمعجون مرتين يوميًا واستخدام الخيط الطبي
- إزالة الشعر تقدير شخصي للأم لكن مهم التخلص من شعر الإبطين وتقليله في منطقة العانة عشان تتجنب الروايح الكريهة
- مهم تتأكدي من قدرتها على استخدام أي وسيلة لإزالة الشعر بدون جرح أو تهيج لبشرتها
- استخدام منظف مناسب لنوع بشرتها عشان تتجنب ظهور البثور والحبوب خاصة في فترة التغييرات الهرمونية
- شاركيها وقت العناية بالبشرة زي الماسك الأسبوعي والسكراب واشتري لها كريم مرطب مناسب لبشرتها
- شجعيها على قص الضوافر وبردها بشكل منتظم بأدواتها الخاصة
- الأطعمة الصحية زي الخضار والفاكهة هتمد جسم الابنة بالفيتامينات والمعادن المهمة
