بيج رامي البطل المصري الدولي حقق إنجاز جديد وفاز ببطولة مستر أولمبيا 2021 للمرة التانية على التوالي بعد فوزه بها السنة اللي فاتت، وهي بتعتبر البطولة الأهم والأقوى للاعبي كمال الأجسام في العالم، وبتعتبر قصة صعوده لتحقيق هدفه من أقوى القصص المشجعة على تحقيق الأهداف والوصول للنجاح مهما كانت الصعوبات.
نشأته
- اسمه الحقيقه ( ممدوح محمد حسن السبيعي) واتولد في قرية السبايعة بمدينة برج البرلس في محافظة كفر الشيخ وعمره 37 سنة
- اسم شهرته من الصغر هو رامي اللي اتعرف بيه بين أصدقائه وأهل قريته واتخرج من معهد الخدمة الاجتماعية
- في تصريحات صحفية رامي قال إن لعب كمال الأجسام مشابه للصيد اللي كان بيمارسه زي أغلب سكان قريته
- الصبر هو العامل المشترك بين النشاطين لأنهم بيحتاجوا قدرة على التحمل والانتظار مع السعي للوصول للهدف اللي الشخص عايزه
- كان بيحب لعبة كمال الأجسام من صغره والتزم بالتدريبات لمدة طويلة وحصل على بطولات محلية كتير
- سافر للكويت للعمل في الصيد سنة 2008 ووقته كان عمره 24 سنة ولكنه من هناك اتجه للعب كمال الأجسام
فوزه ببطولة مستر أولمبيا
- بتعتبر من أصعب وأكبر بطولات العالم في كمال الأجسام لأن المشاركة فيها بتطلب المشاركة في بطولات كتير مؤهلة ليها وبدأ مشواره فيها سنة 2013 واستمر يلعب فيها 7 مرات وتدرج في فوزه بداية من المركز الثامن حتى المركز الثاني
- قبل الفوز بيها لأول مرة سنة 2020 حكى عن تحديات واجهته ومنها إنه لم يوفق في بطولة اشترك فيها في مارس 2020
- بعدها بدأت جائحة كورونا وانقطعت حركة الطيران بين الدول لأكتر من 5 شهور وتوقّفت كل البطولات
- وبعدها بـ5 شهور قدر يرجع القاهرة بس قبل السفر لمشاركة في بطولة استرالية مؤهلة لبطولة مستر أولمبيا اكتشف بالصدفة إصابته بفيروس كورونا
- غاب عن المشاركة في البطولة المؤهلة ولكن لحسن الحظن إدارة بطولة مستر أولمبيا ارسلت إليه دعوة للمشاركة واستثنائه من شرط المشاركة في البطولة الاسترالية لأنه شارك في مستر أولمبيا أكتر من مرة وفاز بالبطولة سنة 2020
مراحل كفاح بيج رامي الرياضي
- حكى بيج رامي في لقاءات صحفية كتير عن قصة كفاحه والتعب والمجهود اللي بذله عشان يوصل لهدفه
- صرح قبل كده إنه كان ساكن مع 15 شخص في الكويت داخل غرفة واحد وكان أكتر من 300 شخص في حمام واحد
- قدم في نوادي كتير داخل الكويت وكان مشواره مش سهل خصوصًا إن الإمكانيات المادية مش متوفرة لتحقيق أعلى مستوى له وتحقيق الطموح
- كان دايمًا بيحدد وقت معين كحد أقصى عشان يوصل لشيء بيتمناه
- مثلًا قال إنه في نهاية 2008 قال إنه بعد سنة ونصف هيبدأ الاشتراك في البطولات وتحقيق أرقام قياسية عالية وبالفعل في 2011 كان بدأ طريقه للمشاركة في البطولات الدولية منها بطولة الكويت
- فوزه ببطولة أولمبيا الكويت 2012 كان بداية طريق الاشتراك في بطولات عالمية والفوز على رياضيين سابقينه في سنين الخبرة
- تفكير بيج رامي دائمًا إنه بيحقق هدفه وكان مؤمن إنه هيوصل لأعلى مرتبة وبيقول في كل تصريحاته إن إيمانه بهدفه وصبره لتحقيقه والمثابرة هي العامل الأساسي في نجاحه وتفوقه ووصوله للفوز ببطولة مستر أولمبيا مرتين سنة 2020 وسنة 2021 في سابقة هي الأولى من نوعها
- مدربينه صرحّوا في تقارير تليفزيونية عنه بيقولوا إنه كان مركّز في كل العوامل اللي هتساعده تحقق هدفه
- التزامه بكل تعليمات المتدربين وبحثه المستمر للوصول لأدق معلومة سواء في التمرين أو في عناصر التغذية المناسبة له عامل أساسي في تحقيقه للنجاح
- الاشتراك في بطولات عالمية والاطلاع على أحدث طرق التدريب في العالم ومحاولة البحث عن مدرب يهتم به أكتر ساعده على تحقيق الهدف
