فيروس كورونا هو فصيلة من الفيروسات واسعة الانتشار معروفة بأنها بتسبب أمراض قليلة التأثير زي نزلات البرد الشائعة أو أمراض أخطر زي متلازمة الشرق الأوسط التنفسية (MERS) ومتلازمة الالتهاب الرئوي الحاد (السارس)

بيستهدف الجهاز التنفسي وبيسبب التهابات تنفسية حادة، واسمه العلمي فيروس المتلازمة التنفسية الحادة الوخيمة كورونا 2 (سارز كوف 2)، لكن المرض الناتج عنه اسمه ( كوفيد 19)، ومنظمة الصحة العالمية أعلنت إنه وباء عالمي في مارس 2020

اكتشفت منظمة الصحة العالمية مرض (كوفيد 19) لأول مرة في مقاطعة يوهان بالصين، بعد الإبلاغ عن مجموعة حالات مصابة بالتهاب رئوي فيروسي، وبعدها انتشر لدول العالم كلّه، وظهرت منّه سلالات جديدة بيحاول العلماء اكتشاف تركيبها وأصلها للوصول لدواء فعّال ليها. 

تأثير فيروس كورونا على الصحة

 – الخبراء بيأكدوا إن فيروس كورونا بيستهدف خلايا الأهداب الموجودة في الرئة حوالين المخاط المسؤول عن طرد المواد الضارة زي ثاني أكسيد الكربون، اللي تراكمه في الرئة مع الوقت بسبب الالتهاب الرئوي ممكن يسبب اختناق يؤدي للوفاة، بجانب إن الفيروس بيستهدف الخلايا البطانية في الأوعية الدموية وبيحمل جزء من بروتين اسمه ( ACE2 ) موجود هو نفسه في الأوعية الدموية وبالتالي بيسبب جلطات داخل الأوعية الدموية بتمنع الدم من الوصول لباقي أعضاء الجسم، ومع النشاط القوي للخلايا المناعية اللي بيخليها تدمر كل الخلايا والأنسجة في طريقها وده بيدمر الجهاز التنفسي، ولو ده محصلش الالتهاب القوي أحيانًا بيخلي الأوعية الدموية تنفذ على الحصيلات الهوائية وده بيخلي الرئة تتملي بالسوايل وبيؤدي لفشل التنفس، وبعض الحالات بتصاب بأزمات قلبية وسكتتات دماغية. 

– معظم المصابين بتتحسن حالتهم بعد مرور 4 أسابيع لكن في بعض الحالات بتتحسن ببطء شديد، وحتى بعد تخلص الجسم من الفيروس بتتراكم بعض الأعراض الجانبية طويلة الأمد زي: 

– فقدان حاسة الشم والتذوق

– آلام المفاصل 

– صعوبة التنفس 

– قلة التركيز وضعف الذاكرة

– اضطرابات النوم 

– الحمى 

– العجز عن بذل أي مجهود بدني لمدة طويلة (متلازمة الإرهاق المزمن) 

– ضربات القلب السريعة

أعراض الإصابة بفيروس كورونا

– ضيق التنفس وألم الصدر

– آلام العضلات واحتقان الحلق 

– الشعور بالتعب والوهن في كل أعضاء الجسم

– ارتفاع درجة الحرارة والقشعريرة

– سيلان الأنف والسعال

– القيء والإسهال والشعور بالغثيان 

– الطفح الجلدي

– شحوب البشرة وميل الأظافر والشفتين للون الأزرق

– أحيانًا بيصاب الشخص بالفيروس بدون ظهور أي أعراض عليه

طرق العدوى بفيروس كورونا

بينتقل عن طريق الرذاذ المتساقط من الفم سواء من خلال الكلام المباشر مع الشخص المصاب أو عن طريق لمس الأسطح اللي عليها الرذاذ ده، وبتزيد فرص العدوى مع الاختلاط بشخص مصاب والمسافة بينكم متر واحد فقط، لأن ده بيعرض الأنف والعين والفم لاستقبال قطرات الرذاذ اللي بتنقل العدوى، وبيزيد الخطر لو الشخص بيعاني من أعراض حادة، وأحيانًا بتزيد مع لمس الأسطح المحيطة ببيئة الشخص سواء مقبض الباب أو لمس أدواته الشخصية. 

عوامل الخطورة 

– بتزيد الخطور على بعض الأشخاص وبتزيد حدة الأعراض عليهم زي: 

– كبار السن

– مرضى القلب والضغط والسكر والكلى والكبد

– المصابين بأمراض الانسداد الرئوي المزمن والربو والجهاز العصبي

– الأشخاص المصابين بالسمنة 

– الحوامل 

– المدخنين

– أحيانًا المضاعفات بتبقى أسوأ رغم عدم وجود أي تاريخ مرضي مُسبق

الوقاية من فيروس كورونا

– البس الكمامة صح، واغسل إيدك قبل ما تلبسها، وخلي الجزء المعدني أو اللي بيتني مغطي المناخير كويس وباقي الكمامة تغطي الفم والدقن، والجانب الأبيض في اتجاه وجهك والجزء الملون بيكون بره، ولو بحلقات للودن لفها عليها كويس، لكن  لو بتتربط.. اربطها من فوق وبعدين اربط الجزء اللي تحت ورا الرقبة.

– لازم تغسل إيدك بالمياه والصابون قبل ما تخلعها، وتجنب لمس الجزء الخارجي وأنت بتقلعها عشان هتكون مليانة جراثيم، وامسك الحلقات من على الأذن أو الشرايط واخلعها من غير ما تلمسها، ولف الكمامة بكيس قبل ما ترميها واغسل إيدك بالمياه والصابون بعدها، وافتكر إن الكمامة تستخدم مرة واحدة بس لمدة من 2-8 ساعات.

–  استخدم الجوانتي الطبي لتجنب ملامسة أي سطح ملوث، بس مهم يكون مقاسه مظبوط، واغسل إيدك كويس قبل ما تلبسه وبعد ما تقلعه، واحتفظ بيه في علبته الأصلية. امسك طرفه من برا وأنت بتلبسه، وتجنب لمس الجزء الخارجي بإيدك وإنت بتقلعه، وارميه في كيس في باسكت مقفول. 

– اهتم بتعقيم وتنضيف البيت باستمرار وتناول أكل صحي زي الخضار والفاكهة والمشويات، وقلل المقليات والوجبات السريعة.

– اشرب 8 أكواب مياه يوميا على الأقل وسوايل سخنة زي الينسون والنعناع.

– تجنب الأحضان والقبلات، وامنع الزيارات والتجمعات، واغسل إيدك كويس أو طهرها بالكحول، وتجنب السجاير في البيت، وتجنب مشاركة أدواتك الشخصية مع الآخرين أو استعمال أدواتهم. 

– خبراء الصحة نصحوا بتعقيم الموبايل مرتين في اليوم، اقفله وامسحه بقماشة قطن ناعمة عليها كحول، وممكن تستخدم مناديل مبللة مطهرة، واتأكد إن الموبايل ناشف قبل ما تفتحه.

– عقّم بيتك باستمرار، واستخدم قماشة ومطهر وامسح الأسطح اللي بتستخدمها باستمرار زي مقابض الباب ورخامة المطبخ وأزرار النور والريموت، اعمل قايمة بالأماكن دي عشان ماتنساش تنضفها، واخلط (5 معالق كبار كلور + 4 لتر مياه) لتنضيف الأرضيات، استخدم مياه الأكسحين لتعقيم الأسطح (زي الترابيزات)، والبس جوانتي أثناء التنضيف وارميه بعدها، واغسل الملابس بعد الخروج في مياه سخنة أو بمطهر مناسب للملابس.

– عقّم الفلوس وامسحها بقطن ومحلول خل مخفف (1/4 كوباية خل + لتر مياه) وسيبها تنشف، واغسل إيدك على طول بعد لمسها، ولو هتسحب من الـATM.. البس جوانتي طبي، ولو بتاخد باقي فلوس بعد الدفع.. طهر إيدك بالكحول بعد ما تتعامل بيها. 

 أكلات بتقوّي المناعة

البروكلي الني، والجنزبيل، والسبانخ، واللوز، والبرتقال، والكركم، والفلفل الأحمر، والكيوي، اللب السوري، والفراخ. 

مشروبات بتقوي المناعة 

التوم والعسل: (فصين توم مفرومين + معلقة صغيرة عسل + نص معلقة صغيرة كركم + كوباية مياه دافية)

– السبانخ ولبن اللوز: (كوباية أوراق سبانخ + كوباية لبن اللوز + كوباية ونص أي نوع فاكهة فريش + نص معلقة صغيرة جنزبيل مفروم+ عصير نص ليمونة)

– خل التفاح والعسل: (نص كوباية مياه دافية + معلقتين كبار عسل + نص معلقة صغيرة جنزبيل + نص معلقة خل تفاح + نص معلقة كركم)

– الجزر وجنزبيل: (3 جزرات + معلقة صغيرة جنزبيل مفروم + نص معلقة صغيرة كركم + نص كوباية مياه)

– البنجر والتفاح: (حبة بنجر + حبة تفاح+ عصير ليمونة)

لقاح كورونا

–اللقاح هو مستحضر بيولوجي بيتصنع من الميكروب أو الفيروس اللي عايز تحمي الجسم منه، عن طريق نسخة ضعيفة من الفيروس أو من بروتيناته، وبيتحقن بيه الجسم عشان يحفزه على إنتاج الأجسام المضادة اللي بتقاوم الفيروس في صوره الأقوى اللي بتسبب المرض. 

– 8 أنواع من اللقاحات ظهرت في العالم كله وهم: 

– فايزر-بيونتك 

– مودرنا 

– أسترازينيكا-أكسفور 

– سينوفاك

– سبوتنيك في

– كانسينو بيولوجيكس

– سينوفارم 

– جونسون آند جونسون 

– وكلهم بيكمل مفعولهم من خلال جرعتين معادا لقاح جونسون آند جونسون اللي بيكمل مفعوله بجرعة واحدة فقط

– منظمة الصحة العالمية بتنصح بضرورة أخذ اللقاح المتوفر ليك في أسرع وقت لتجنب مضاعفات الفيروس

– بعد تلقي اللقاح بيمر بعض الأشخاص بأعراض جانبية زي ألم العضلات والقشعريرة وحمّى وخفقان القلب ولكن لمدة محدودة

– الخبراء بينصحوا بضرورة تناول وجبة خفيفة قبل تلقي اللقاح خالية من السكر والملح لأنهم بيزودوا الإلتهابات، وبعد اللقاح لازم تاخد وجبة خفيفة فيها أرز مسلوق وبطاطس مهروسة وشوربة وتجنب البروتين الحيواني واستبدله بالنباتي زي الفول والعدس