فوائد القرنفل: تقليل الانتفاخ وعسر الهضم وتقوية المناعة

فوائد القرنفل أو Cloves متعددة، لأن ليه خصائص طبية ونكهة عطرية مميزة وليه فوائد صحية كتير بسبب المركبات اللي فيه، فهو بيساعد على تحسين صحة الكبد وتثبيت مستوى السكر في الدم ومصدر غني بمضادات الأكسدة. 

ما هو القرنفل؟

هو شجرة دائمة الخضرة ليها شكل مخروطي ورباعية الأجزاء ومتوسط ارتفاعها من 10 لـ12 متر وبتوصل لـ20 متر، وهي واحدة من أقدم التوابل وبذورها شبه المسامير وهي أكتر الأجزاء استخداما منها في المشروبات زي القهوة العربي والأطعمة المختلفة. 

العناصر الغذائية للقرنفل 

القرنفل غني بالفيتامينات والمعادن المختلفة والألياف، فالمعلقة الصغيرة (2 جم) من القرنفل المطحون فيها:

• 6 سعرات حرارية
• 1 جرام ألياف
• 1 جرام كربوهيدرات 
• 55% من احتياجك اليومي من المنجنيز 
• 2% من احتياجك اليومي من فيتامين ك 
• كمية من فيتامين سي
•  كمية صغيرة من الكالسيوم والماغنيسيوم وفيتامين هـ

فوائد القرنفل كمصدر لمضادات الأكسدة

هو غني بمضادات الأكسدة اللي بتقلل خطر الإصابة بالأمراض المزمنة وبتقلل آثارها في حالة الإصابة بيها، وفيه مركب اسمه الأوجينول اللي الدراسات أثبتت إنه مضاد طبيعي للأكسدة، وكمية فيتامين سي اللي فيه بتساعد على حماية الجسم من الأمراض

فوائد القرنفل في الحماية من السرطان

الدراسات أثبتت إن مركب الأوجينول الموجود في القرنفل ليه دور في الحماية من الإصابة بالسرطان زي سرطان الرحم 

فوائد القرنفل للمصابين بداء السكري

الدراسات أثبتت إنه بيقلل مستوى السكر في الدم وإن مستخلصات القرنفل والنيجريسين (مركب موجود في القرنفل) بيساعد على زيادة إفراز الأنسولين في الجسم

فوائد القرنفل كمضاد للبكتيريا

ليه خصائص مضادة للميكروبات، فهو بيضعف نمو البكتيريا في الجسم زي جرثومة المعدة 

فوائد القرنفل للأسنان

الخصائص المضادة للبكتيريا اللي فيه بتساعد في تحسين صحة الفم وتقليل خطر الإصابة بأمراض اللثة والتخلص من روايح الفم الكريهة

فوائد القرنفل للجهاز الهضمي

• بيساعد في علاج قرحة المعدة أو تجنب الإصابة بيها
• بيقلل الانتفاخ وعسر الهضم والإمساك وبيساعد في تنشيط حركة الأمعاء في المعدة
• بيحسن استرخاء عضلات الجهاز الهضمي وبالتالي قلة الإصابة بالإمساك

فوائد القرنفل للكبد

مفيد لتعزيز صحة الكبد ووظايفه لأن المواد اللي فيه وخاصة مادة اليوجينول بتقلل علامات الإصابة بالكبد الدهني أو الإجهاد التأكسدي ولكن الدراسات في النقطة دي محدودة

 القرنفل وتقوية المناعة

استخدام القرنفل المجفف بيساعد على تقوية جهاز المناعة وبيزود عدد كرات الدم البيضاء، وبالتالي تحسين ردة فعل الجهاز المناعي التحسسية

فوائد القرنفل للجنس

• بيزود الرغبة الجنسية عند الرجال والسيدات 
• بيمنع سرعة القذف عند الرجال

فوائده للقلب والأوعية الدموية

ممكن يساعد في تقليل مستوى الكوليسترول الضار ونسبة الدهون الثلاثية في الجسم، خاصة في حالة مضغه على الريق

فوائده للشعر

• بيساعد في تحسين صحة الشعر وفروة الرأس وبيزود لمعانه
• ليه دور في علاج تساقط الشعر
• بيقلل عدوى والتهابات فروة الرأس

فوائده للنوم

• بيقلل مدة الدخول في النوم العميق
• بيطول فترة النوم
• فيه خصائص مهدئة لتقليل القلق بالليل

فوايد عامة للقرنفل

• زيت القرنفل بيحسن مظهر الشفايف وبيخليها نضرة أكتر
• وضعه أسفل اللسان بيقلل التهاب الحلق وآلامه
• مضغه على الريق بيقلل أعراض الغثيان والدوخة 
• بيساعد في مقاومة أمراض الجهاز التنفسي

طرق استخدام القرنفل 

ممكن تستخدمه بأكتر من طريقة زي:

• وضعه أسفل لسانك كمضاد بكتيري 
• مضغه على الريق للتخلص من رائحة الفم أو أعراض الغثيان والدوخة
• اغليه كحبوب كاملة من 5-10 دقايق وبعدين صفيه واشربه دافي 
• اغليه مطحون وبعدين صفيه واشرب منقوع القرنفل
• إضافة المسحوق المطحون للأطعمة والمخبوزات والمشروبات المختلفة