المحتويات
لقاح كورونا بيوفر درجة كبيرة من الحماية لأن ما زالت الأغلبية العظمى عرضة للإصابة بفيروس كورونا، والقيود المفروضة حاليا هي لمنع تفشي الوباء وإصابة عدد أكبر من الناس، واللقاحات دورها إنها تعلم الجسم إزاي يكافح العدوى عن طريق منعه من استقبال الفيروس أو إنه يكون حاضن ليه أو في أسوأ الحالات بتقلل حدته.
أنواع لقاحات كورونا
لقاح أسترازينيكا
بدأ طرحه للاستخدام في 5 يناير والموافقة على اعتماده كانت في أواخر سنة 2020 بعد ما التجارب أثبتت نجاحه بنسبة 70% في توفير حماية للناس، والبيانات أثبتت وجود استجابة مناعية قوية لدى كبار السن الي اتطعموا باللقاح وإن أخد جرعة تانية منه ممكن تزود الحماية لنسبة توصل لحد 90% لأن بيتم التطعيم بيه على جرعتين منفصلتين.
لقاح فايزر أو بيونتيك
شركة فايزر بيونتيك أعلنت عن نتائجها الأولى في شهر نوفمبر وقالت إن اللقاح فعال بنسبة تصل لـ95 % وبيتم أخده على جرعتين بفاصل 3 أسابيع بينهم، وبيحتاج يتخزن في حاويات مبردة بالتلج الجاف وكل واحدة فيهم فيها حوالي 5 آلاف جرعة أثناء الشحن للبلد المتلقي، ولازم يوصل في خلال 10 أيام ويتخزن في مزارع للمجمدات لفترة تصل لـ6 شهور، ولازم يوصل لمراكز التلقيح في خلال 10 أيام، وبيتم أخد الجرعة على جرعتين منفصلتين بينهم 28 يوم.
لقاح موديرنا
يوم 16 نوفمبر الشركة أصدرت بيانات أولية عن لقاح كورونا الخاص بيها اللي معدل نجاحه واصل لنسبة 94.5%، ويتم أخده على جرعتين بينهم شهر
لقاح سينو فارم
المتحدث باسم شركة سينوفاك التكنولوجيا الحيوية المحدودة قال إن لقاح فيروس كورونا الصيني خلق أجسم مضادة بين حوالي 97% من الأشخاص في المرحلة النهائية للتجربة، وإن تجارب المرحلة الأولى والتانية حققت فعالية بنسبة 90% وبيتم أخده على جرعتين بينهم 14 يوم.
اللقاح الروسي
المدير العام لمركز تشوماكوف العلمي الروسي لتطوير العقاقير المناعية الحيوية أيدار إيشموخاميتوف قال عن مدى فعالية المناعة بعد تلقي اللقاح الروسي التالت كوفيفاك إن المناعة ضد كورونا بتستمر حوالي 8 شهور، ونسبة فعالية اللقاح المناعية تقدر بحوالي 85% وهو تالت لقاح تنتجه المراكز الروسية بعد تسجيل أول لقاح لفيروس كورونا في العالم يوم 11 أغسطس وهو سوتنيك V.
طريقة عمل لقاحات كورونا
العلماء بيستلخصوا جينات البروتين الشوكي الموجود على سطح فيروس كورونا وبينتجوها في شكل فيروس غير مضر لإنتاج لقاح، وبعد حقن الشخص بيه اللقاح بيدخل في خلايا بتنتج البروتين الشوكي، وبيبدأ الجهاز المناعي بالرد عن طريق إنتاج أجسام مضادة وتفعيل خلايا T عشان تهاجم الخلايا اللي فيها البروتين الشوكي وتدمرها، وبالتالي لو الشخص أصيب بفيروس كورونا بعد كده يتم تفعيل الأجسام المضادة وخلايا T لمواجهة الفيروس.
الإجراءات المطلوبة قبل التطعيم
- تجنب شرب الكحول أو التبغ ومهم تنام عدد ساعات كافي عشان تزود فعالية اللقاح
- توقف عن تناول أدوية غير الستيرويدية المضادة للالتهابات زي الإيبوبروفين والأسيتامينوفين قبل تلقي اللقاح
- عدم تلقي اللقاح لو كنت مصاب بالفيروس أو اتعرضت لشخص تاني مصاب بيه
أسباب تجنب الأدوية قبل اللقاح
الأدوية ممكن تعيق نظام المناعة في الجسم وبالتالي ممكن تأثر سلبا على فعالية اللقاح، لأن جسمك بياخد وقت عشان يبني حماية بعد أخد اللقاح، وبالتالي لما بتاخد أدوية مضادة للالتهاب قبله فإنت بتقلل فعالية اللقاح على إنتاج العدد المطلوب من الأجسام المضادة اللي هتساعدك في حماية جسمك من الإصابة.
إجراءات ما بعد التطعيم
- الاستمرار في لبس الكمامات والتباعد الاجتماعي
- مركز السيطرة على الأمراض والوقاية منها قال إن حتى بعد التطعيم الكامل ممكن تكون حامل للفيروس
- الحصول على الجرعة التانية في المعاد المخصص ليها
- لأن التجارب أثبتت إن بعض الأشخاص بيتكون عندهم مستويات عالية من الأجسام المضادة بعد المرحلة الأولى
- البعض التاني لا يستجيبوا وبالتالي مهم تلتزم بالجرعة التانية في معادها عشان توصل للحماية بنسبة كبيرة
- مركز السيطرة على الأمراض أوصى بعدم القيادة لمدة 15-30 دقيقة بعد التطعيم عشان تتأكد إنك كويس
- قول للطاقم الطبي لو بتعاني من أي حساسية أو ردود فعل تحسسية سابقة ليك
طريقة التسجيل
- ادخل على (https://egcovac.mohp.gov.eg/#/registration)
- اختار (التسجيل لطلب لقاح كورونا)
- هيظهر لك 3 اختيارات (العاملين في القطاع الطبي- أصحاب الأمراض المزمنة من جميع الفئات العمرية- فئات أخرى) دوس على الاختيار المناسب
- دخل المعلومات الأساسية واكتب رقم موبايلك ودوس إرسال
- هيوصلك رقم تحقق اكتبه
- بعد ملء البيانات دوس (استكمال)
- اختار حالتك الصحية في الاختيارات المتاحة ودوس (استكمال)
- حمل صور بطاقتك الشخصية (إجباري) وتقدر تحمل أي تقرير طبي عن حالتك الصحية
- في الخطوة الأخيرة.. علم على مربعات (الإقرارات) ودوس على (استكمال)
