فوائد الصبار للبشرة والشعر واستخداماته المختلفة

فوائد الصبار متعددة للبشرة والشعر والصحة الجلدية ومعروف بإسم جل الألوفيرا، لأنه غني بالفيتامينات والمعادن اللي بتساعد على نمو الشعر والتخلص من القشرة وتوازن درجة حموضة الجلد.

فوائد الصبار للجلد

النبات فيه مادة في شكل جل بيتم استخراجها في البيت أو ممكن تشتريه جاهز، وليه فوائد كتير متعلقة بالبشرة زي:

مضادات الأكسدة 

فيه كمية كبيرة من الأحماض الأمينية ومضادات الأكسدة المهمة للبشرة، وبالتالي استخدامه بانتظام بيحافظ على شكلها النضر وبيأخر ظهور التجاعيد والخطوط الرفيعة

الصبار مضاد للبكتيريا

• مضادات الأكسدة اللي فيه معظمها من نوع (Polyphenols) اللي بتتحد مع المركبات التانية لتقليل نمو البكتيريا اللي بتسبب العدوى للإنسان
• غني بالخصائص المضادة للبكتيريا والفطرية وبالتالي بيقلل فرص الإصابة بيهم وبيساعد على علاجهم في حالة الجروح والإصابات
• استخدامه مفيد في حالة الإصابة بحب الشباب لأنه بيمنع تراكم الالتهاب وتكون البثور، وبيساعد على التخلص من التصبغات وعلامات الحبوب

ترطيب البشرة وعلاج الجفاف

الانتظام على وضعه يوميا بيساعد في علاج البشرة الجافة بشكل واضح

الصبار للتخلص من الهالات السوداء

استخدامه حوالين العين بحذر مفيد لأنه غني بمضادات أكسدة وفيتامين هـ اللي بيساعدوا على تقليل أي انتفاخ والتخلص من الهالات السوداء مع الوقت

تقليل أعراض الإكزيما والمشاكل الجلدية

بعض الدراسات أثبتت إن وضعه على مكان الإصابة بيقلل حدة أعراضها زي الحرقة والرغبة في الحكة، لكن لازم تستشير دكتور الأول

علاج قرح البرد والتئام الجروح

استخدامه يوميا على قرح البرد بيسرع التخلص منها، ده غير إنه بيساعد على تسريع التئام الجروح الطفيفة وتعقيمها عند وضعه عليها

فوائد الصبار للشعر

لأنه غني بالفيتامينات والمعادن المختلفة، فهو بيساعد على تحسين صحة الشعر والتخلص من مشاكل مختلفة زي القشرة

تطويل الشعر

بعض الدراسات أثبتت إن استخدامه بشكل منتظم ممكن يساعد على نمو الشعر لأنه غني بمكونات زي:

• الأحماض الدهنية
• الفيتامينات
• الأحماض الأمينية المهمة
• المعادن زي الزنك والنحاس

الصبار والتهاب الجلد الدهني (المثي)

• بيصيب فروة الرأس وبيسبب احمرار الجلد وتقشره والشعور بالحكة، وممكن يأثر على المناطق الدهنية في الجسم زي الوجه وجوانب الأنف والحاجبين والأذنين والجفون والصدر
• دراسة أثبتت إن الصبار بيساعد على علاج تقليل أعراض الحكة واحمرار الجلد اللي بيسببها الالتهاب وتقليل تساقط الشعر المحتمل
• لأنه بيحفز الدورة الدموية والقدرة على نقل الأكسجين والفوائد لبصيلات الشعر

الصبار وعلاج قشرة الشعر

استخدامه بانتظام سواء بشكل منفصل أو عن طريق خلطه مع مواد تانية زي زيت جوز الهند بيساعد على التخلص من أي رواسب على فروة الرأس والوقاية من القشرة

نصائح عامة لاستخدام الصبار 

• الأنواع الطبيعية المستخلصة من أوراق النبات هي أفضل نوع
• جربه على منطقة صغيرة وخفية من جلدك الأول عشان تتأكد من عدم إصابتك من أي رد فعل تحسسي منه
• لو بتعاني من مشاكل جلدية مزمنة أو حروق حادة أو جروح عميقة لازم تستشير دكتور قبل استخدامه

محاذير استخدام الصبار

بالرغم من فوائده للبشرة والشعر، إلا إنه ليه أعراض جانبية محتملة زي:

• حرقان أو تهيج وظهور بثور وطفح جلدي في حالة استخدامه على البشرة
• حكة مزعجة
• ممكن يزود أعراض بعض الالتهابات، فيفضل تجنب تطبيقه على المناطق الملتهبة من الجلد إلا بعد استشارة دكتور
• تجنب استخدامه مع الأطفال

طريقة استخدام الصبار على البشرة

ممكن تستخدمه بطرق مختلفة، سواء عن طريق وضعه على الوجه قبل النوم كمرطب أو عن طريق خلطه مع مكونات تانية واستخدام الخليط كماسك للبشرة

ماسك الشوفان والصبار

اخلط معلقة صغيرة من:

• دقيق الشوفان
• جل الصبار
• مع نص معلقة صغيرة زيت زيتون
• سيب الخليط على الوجه والرقبة نص ساعة وبعدين اغسله برفق بمياه باردة
• استخدمه مرة أسبوعيا

طرق استخدام الصبار للشعر

ممكن تستخدمه بشكل موضعي على فروة الرأس عن طريق التدليك برفق وبعدين غسله أو ممكن تستخدمه في وصفات ماسك الشعر

ماسك زيت الزيتون

• اخلط 2-4 معالق صغيرة من جل الصبار مع معلقة صغيرة زيت زيتون
• ضيف كوب من اللبن الرايب
• وزع الخليط على شعرك وفروة رأسك وسيبه من 30-40 دقيقة
• اغسل الشعر بالمياه والشامبو