المحتويات
ديرما رولر هي واحدة من أدوات التجميل اللي بتستخدم حاليا لعلاج مشاكل البشرة والشعر، لكن في طرق ومحاذير لاستخدامها وفوائدها لازم تعرفيها قبل ما تجربيها.
ما هي الديرما رولر؟
ديرما رولر (Derma Roller) عبارة عن أداة شبه الفرشاة وليها رأس صغيرة فيها مجموعة من الإبر الصغيرة المرصصة جنب بعض، وبيختلف طولها وسمكها من أداة للتانية.
الرأس اللي فيها الإبر بتتميز بقدرته على الدوران وتمريره على المنطقة اللي عايز تعالجها أو تعتني بيها، وعدد الإبر بيكون ما بين 100-1000 إبرة دقيقة.
فوائد الديرما رولر
عند تمرير الإبر على البشرة، بتخترقها وبتوصل لعمق معين لتفتيت النسيج المكون للندوب وبتساعد على تجديده، وليها فوائد تانية زي:
- بتحفز البشرة على التجدد وإنتاج خلايا جديدة وإنتاج كمية أكبر من الكولاجين والإيلاستين في المكان اللي تم تمرير الإبر عليه
- بتساعد في تقليل آثار الحبوب وتصبغات البشرة
- بتحسن امتصاص منتجات التجميل المستخدمة زي كريم النهار والليل
- بتساعد في تأخير ظهور علامات التجاعيد والتمدد في الجسم
- بتخفف مظهر تشققات الجلد في حالة استخدام طرق تانية لعلاجه
طول إبر ديرما رولر والاستخدام المناسب ليها
- 0.2 مم و0.3 مم: مناسب لتعزيز امتصاص منتجات البشرة وزيادة كثافتها
- 0.5 مم: مناسب لعلاج تصبغات البشرة والتجاعيد البسيطة والندبات الخفيفة وأضرار أشعة الشمس وتستخدم أسبوعيا أو مرتين في الشهر حسب حساسية الجلد ليها
- 1.0 مم: مناسبة لإنتاج الكولاجين وعلاج التجاعيد وتصبغات البشرة وآثار الحبوب البسيطة وعلامات التمدد
- 1.5 لـ2.0 مم: مناسبة لعلاج علامات التمدد والندوب في مناطق البطن والفخدين وغير مناسبة للاستخدام الشخصي
طريقة استخدام الديرما رولر
- اتأكدي إنها سليمة وخالية من أي عيوب ولو حسيتي بأي صعوبة في تمريرها على الوجه تجنبيها تماما
- انقعيها في محلول فيه كحول بنسبة 70% لمدة ربع ساعة
- اغسلي وشك بغسول الوجه درجة الـ(pH) فيه متوازنة
- لو هتستخدمي إبر أطول من (0.5) مم.. امسحي وشك بمناديل فيها كحول بنسبة 70%
- استخدمي كريم تخدير على حسب درجة تحملك للألم ولازم تمسحيه تماما قبل استخدام الديرما رولر
- تجنبي استخدامها لو بشرتك ملتهبة أو متهيجة
- قسمي وجهك لأربع أجزاء.. الجبهة لجزئين والخدين
- اعمليها في اتجاه واحد لفوق.. ارفعيها لفوق وبعدين شيليها وارفعيها تاني من 6-8 مرات في كل جزء
- بعد ما تخلصي كل جزء امشي عليه في الاتجاه العمودي ليه.. يعني لو مشيتي عليه بشكل أفقي كرريها بشكل عمودي
- لما تخلصي.. المفروض إن كل جزء من وشك مشيتي عليه من 12-16 مرة..6-8 مرات عمودي و6-8 مرات أفقي
- اغسلي وشك بمياه وانقعي الديرما رولر في خليط مياه وصابون عشان تعقميها من المواد اللي خرجت من بشرتك
- نشفيها من بواقي المياه وبعدين انقعيها في محلول كحولي بنسبة 70% لمدة 10 دقايق وشيليها في علبتها
استعدادات بعد استخدامها
- تجنبي التعرض للشمس لمدة يوم بعدها واستخدمي واقي الشمس عند التعرض الشمس بعد كده
- مشاركتها مع شخص تاني شيء خطير لأنها ممكن تسبب انتقال الأمراض
- تجنبي استخدامها بقوة لتجنب انتفاخ البشرة وتهيجها
- ابعدي عن استخدام مستحضرات التجميل بعد استخدامها
- ليها آثار جانبية زي الألم والاحمرار والجفاف
- الإبر الأطول من (0.5) مم لازم تستخدم تحت إشراف دكتور متخصص
المنتجات المناسبة للاستخدام بعدها
- فيتامين C
- حمض الهيالورونيك
- كريم ترطيب البشرة
- كريمات وجه مضادة للبكتيريا
- سيروم وجه مضاد للتجاعيد
- لوشن تجديد بشرة الوجه
- ماسكات لترطيب البشرة
حالات تجنب استخدام ديرما رولر
تجنبي استخدامها تماما لو بتعاني من:
- الأمراض الجلدية زي الصدفية وقروح البرد والفطريات والهربس
- تجنبي استخدامها على الأماكن اللي فيها وحمة والندوب المرتفعة وحروق الشمس والجروح
- لو منتظمة على أدوية زي أدوية الاكتئاب والمضادات الحيوية ومميعات الدم
- في حالة الحمل
أضرار استخدام ديرما رولر
استخدامها مع الالتزام بالقواعد العامة آمن، لكن ليها بعض السلبيات زي:
- ممكن تسبب تهيج واحمرار البشرة المؤقت أو الدائم خاصة في حالة استخدامها بشكل خاطيء
- في حالات ممكن تسبب لها زيادة حب الشباب
- عند استخدامها مع الإصابة بحب الشباب النشط أو أي مرض جلدي معدي ممكن تسبب انتقال العدوى
