المحتويات
طريقة عمل التين من أسهل أنواع المربى في خطوات تحضيرها، وكمان بتدخل في وصفات تانية زي البسكويت وبعض أنواع الكيك، وممكن تعملها ساندوتشات خاصة للأطفال، لأنها مغذية وبتوفر لهم فيتامينات مهمة وبتمد جسمهم بالطاقة.
نصايح صحية لتحضيرها
المربى لها فوايد صحية كتير بسبب العناصر الغذائية الموجودة في التين، لكن مهم تتبع خطوات عشان تخليها صحية أكتر زي:
- ممكن تستغنى عن السكر تماما وتعتمد على نسبة السكريات في التين نفسه
- ممكن تضيف لها مكسرات زي عين الجمل أو اللوز عشان تعلى قيمتها الغذائية
- استخدام معلقة خشبية بدل معدنية، عشان تتجنب تفاعلها مع السكر والحصول على مذاق أفضل
- اغسل البرطمانات وجففها كويس قبل الاستخدام، لأن وجود المياه ممكن يسبب تعفن المربى
- مربى التين أو أي نوع مربى تاني.. مهم تتناوله بحرص وكميات قليلة خاصة مرضى السكري، وكمان عشان تتجنب زيادة الوزن
طريقة عمل مربى التين التقليدية
المكونات
- كيلو تين مقطع مكعبات
- كوباية ونص سكر
- نص كوباية مياه
- ربع كوباية عصير ليمون
الطريقة
- على نار متوسطة.. اخلط التين مع السكر وقلب لمدة 15 دقيقة أو لحد ما السكر يدوب
- ضيف المياه مع عصير الليمون وسيب الخليط يغلي لمدة 5 دقايق
- سيب المربى على نار هادية لمدة 20 دقيقة، مع التقليب كل 5 دقايق
- ارفعها من على النار وبعد ما تبرد تماما.. احفطها في برطمانات معقمة في التلاجة
طريقة عمل مربى التين الخالية من السكر
المكونات
- كيلو تين برشومي
- 400 مللي مياه
- عصير ليمونة
الطريقة
- اغسل التين كويس وقطعه لأربع قطع
- على نار متوسطة.. حط التين مع المياه لحد ما يغلي
- قلل الحرارة وسيبه يغلي لمدة 45 دقيقة وقلب كل 10 أو 15 دقيقة عشان تتجنب احتراقه من الجناب أو قعر الحلة
- ضيف عصير الليمون وارفع المربى من على النار
- بعد ما تبرد تماما.. احفظها في برطمانات معقمة في التلاجة
مربى التين بعين الجمل
المكونات
- كيلو تين مجفف
- نص كيلو سكر
- لتر وربع مياه
- نص كيلو عين جمل
- نص كوباية سمسم محمص
- معلقة كبيرة يانسون
- نص معلقة صغيرة مستكة
- نص معلقة صغيرة عصير ليمون
الطريقة
- اغلي المياه والسكر على نار عالية
- قطع التين لقطع متوسطة وضيفه للمياه والسكر وقلب كل شوية
- بعد ما الخليط يتقل ضيف عصير الليمون واليانسون والمستكة وعين الجمل (قطعه بالحجم اللي تحبه) والسمسم المحمص
- قلب خليط المربى كويس وارفعه من على النار
- بعد ما المربى تبرد تماما.. وزعها في برطمانات معقمة في التلاجة
