طريقة عمل المخبوزات السريعة للفطار واللانش بوكس

المخبوزات السريعة تحضيرها سهل ومش بيحتاج وقت للتخمر، ممكن تكون حادقة أو حلوة، وبتكون مناسبة لوجبة فطار مختلفة أو في العشاء أو مع الشاي أو القهوة، كمان هتوفر على الأمهات اختيارات إضافية للانش بوكس، لأنها مغذية بسبب احتوائها على أطعمة غنية بالفيتامينات والمعادي زي الجبن والمشروم أو السبانخ وغيرها.

مخبوزات سريعة بالباف باستري

الكرواسون السريع

المكونات

• باكيت عجينة بف باستري
  
• صفار بيضة
  
• نص كوباية شوكولاتة سايحة أو جبنة فيتا/ رومي مبشورة + معلقة صغيرة زعتر

الطريقة

• قطع عجينة البف باستري لمثلثات بنفس الحجم
• ادهن قاعدة كل مثلث بكمية الشوكولاتة أو الجبنة
• لف المثلث من القاعدة للطرف عشان العجينة تاخد شكل الكرواسون
• رص الكرواسون في صينية مدهونة بالزيت
• ادهن سطح كل قطعة بصفار البيض
• ممكن توزع على سطح الكرواسون الحادق بالجبنة الرومي أو حبة البركة 
• دخل الصينية الفرن لمدة 10 لـ15 دقيقة لحد ما الكرواسون يتضاعف حجمه وياخد لون دهبي

بالميه

المكونات

• باكيت عجينة بف باستري جاهزة
  
• نص كوباية سكر بودرة
• سكر خشن للتزيين

الطريقة

• افرد العجينة على رخامة مرشوشة بالدقيق على شكل مستطيل 
• رش العجينة بالسكر البودرة 
• لف طرف العجينة لحد النص والطرف التاني لحد النص واضغط على الجوانب
• قطع العجينة لقطع بسمك 1 سم
• رص قطع البالميه في صينية عليها ورق زبدة
• رش سكر خشن على السطح ودخل الصينية الفرن لمدة 15 دقيقة
• ممكن تبدل السكر على الوش بشربات تقيل بعد ما تخرج من الفرن 

مخبوزات النوتيلا

المكونات

• نص كيلو عجينة الباف باستري الجاهزة
• كوباية شوكولاتة نوتيلا
• معلقتين صغيرين دقيق
• بيضة
• رشة فانيليا

الطريقة

• على رخامة نظيفة.. رش الدقيق وافرد الباف باستري لحد ما تبقى بسمك سم تقريبا 
• قطعها لمربعات متساوية 
• وزع كمية الشوكولاتة على نص العجينة 
• اقفلها بالنص التاني من كل الجهات 
• ادهن صينية بمعلقة صغيرة زبدة ورص عليها مربعات العجينة 
• اخفق البيضة مع الفانيليا وادهن بها سطح المربعات
• دخلها الفرن لحد ما يبقى لونها دهبي

الدانش بالمربى

المكونات

• 500 جرام عجينة باف باستري
• 4 معالق كبار كريمة
• بيضة
• 4 معالق كبار مربى فراولة أو توت
• رشة فانيليا

الطريقة

• رش كمية من الدقيق على الرخامة وافرد العجينة بالنشابة 
• قطعها لـ8 مربعات متساوية 
• في 4 مربعات عجينة.. فرغ دايرة صغيرة في النص (بقطاعة البسكويت أو كوباية صغيرة)
• ادهن الـ4 مربعات الباقية بالكريمة وغطيها بالمربعات المفرغة 
• وزع المربى في الدواير المفرغة وسط العجينة 
• اخفق البيضة مع الفانيليا وادهن بها سطح المربعات 
• رص المربعات في صينية مدهونة زبدة ودخلها الفرن لمدة 25 دقيقة أو لحد ما وش الدانش يحمر 

رولز القرفة والسكر

المكونات

• 500 جرام عجينة باف باستري
  
• معلقة كبيرة قرفة
  
• 3 معالق كبار سكر بني
  
• نص كوباية جبنة كريمي 
  
• معلقتين كبار سكر
  
• نص كوباية لبن
  
• معلقة كبيرة زبدة 

الطريقة

• اخلط السكر البني مع القرفة والزبدة 
• افرد العجينة على رخامة نظيفة مرشوشة بالدقيق 
• افرد خليط الزبدة والقرفة ولف العجينة في شكل رول
• قطع رول العجينة بسكينة حادة لقطع أصغر 
• رص الرولز في صينية مدهونة زبدة أو عليها ورق زبدة 
• اخلط السكر مع الجبنة الكريمي واللبن لحد ما يبقى صوص بقوام خفيف
• وزع الصوص على رولز القرفة

مخبوزات الباف باستري بالجبنة

المكونات

• 225 جرام عجينة باف باسترى
•  تلتين كوباية جبنة شيدر مبشورة
• ربع كوباية جبنة رومي مبشورة
• معلقة صغيرة بذور الكمون
• نص معلقة صغيرة بابريكا

الطريقة

• افرد العجينة على رخامة مرشوشة بالدقيق على شكل مستطيل
• اخفق البيضة مع رشة فلفل أسود وادهن سطح العجينة 
• اقطع العجينة نصين 
• وزع الجبن مع بذور الكمون والبابريكا على جزء من العجينة 
• غطيها بالجزء التاني من العجنية واضغط كويس عشان تتأكد إنها اتقفلت 
• بسكينة حادة قسم العجينة لـ8 شرايح 
• ابرم أو لف كل شريحة 
• رص أصابع الباف باستري في صينية مدهونة زيت 
• ادهنها بباقي البيض وسيبها في التلاجة 15 دقيقة 
• دخلها الفرن لمدة 15 دقيقة لحد ما يبقى لونها دهبي

مخبوزات بعجينة العشر دقايق

عجينة العشر دقايق

المكونات

• 5 كوبايات دقيق
  
• ربع كوباية لبن بودرة
  
• نص كوباية زيت
  
• كوبايتين مياه دافية
  
• 3 معالق كبار سكر
  
• نص معلقة صغيرة ملح
  
• معلقتين كبار خميرة فورية
  

الطريقة

• اخلط الخميرة مع السكر و3 كوبايات دقيق مع المياه الدافية 
• سيب الخليط لمدة 10 دقايق في مكان دافي 
• ضيف الزيت وباقي الدقيق واللبن البودرة 
• اعجن المكونات لحد ما تبقى عجينة طرية 
  
• ممكن تحشيها بالمربى أو النوتيلا أو الجبن 

مخبوزات السبانخ 

المكونات

• ربع كيلو سبانخ
  
• معلقة صغيرة زيت
• ملح وفلفل أسود 
• معلقة كبيرة مايونيز
• فص توم
• بيضة مخفوقة

الطريقة

• شوح التوم مع الزيت لمدة 3 دقايق وضيف ورق السبانخ 
• قلب السبانخ لحد ما تدبل وارفعها من على النار 
• ضيف معلقة المايونيز على السبانخ وقلب كويس 
• افرد عجينة الـ10 دقايق (في الوصفة السابقة) على رخامة عليها كمية دقيق
• افرد حشوة السبانخ ولف العجينة في شكل أسطوانة 
• بسكينة حادة.. قطع العجينة لدواير بنفس السمك
• رص الفطاير في صينية وادهن سطحها بالبيض 
• دخل الصينية الفرن لمدة 15 دقيقة لحد ما لونها يبقى دهبي