مطبخ

اكلات باللحمة المفرومة بطرق مختلفة وسهلة التحضير

إزاي تعمل أكلات مختلفة باللحمة المفرومة؟

اكلات باللحمة المفرومة هي وصفات سهلة ونكهات لذيذة بسبب مكوناتها المختلفة زي الخضار والمكرونة، مع مكونها الأساسي وهو اللحمة المفرومة سريعة النضج، بالإضافة لقيمتها الغذائية العالية، لأنها بتحتوي على الحديد والبروتينات والألياف والزنك، وبتساعد في تحسين صحة القلب وقوة عظام.

اكلات باللحمة المفرومة مع المكرونة

إسباجيتي مع كرات اللحم

المكونات

 لكرات اللحمة

  • نص كيلو لحمة مفرومة
  • تلت كوباية بقسماط
  • ربع كوباية بقدونس مفروم
  • فصين توم مفروم
  • ربع كوباية جبنة رومي مبشورة
  • بيضة
للمكرونة
  • كيس مكرونة اسباجيتي
  • نص  كوباية بصل مفروم
  • معلقتين كبار زيت زيتون
  • كوبايتين عصير طماطم
  • ملح وفلفل أسود

 الطريقة

  • اسلق المكرونة في مياه مغلية بالملح
  • اخلط اللحمة مع البقسماط والبقدونس والجبنة الرومي والتوم والبيضة
  • قسم اللحمة لكرات صغيرة بنفس الحجم تقريبا
  • شوح كرات اللحمة في زيت زيتون لحد ما لونها يبقى بني
  • شيل اللحمة وشوح البصلة وبعدين ضيف عصير الطماطم
  • تبل الصلصة بالملح والفلفل الأسود
  • بعد ما الصلصة تتسبك حط كرات اللحمة وبعد كده المكرونة
  •  قدمها مع جبنة رومي على السطح

اكلات باللحمة المفرومة

تاكو باستا

المكونات

  • نص كيلو لحمة مفرومة
  • كيس مكرونة ماكروني صغيرة
  • نص بصلة كبيرة مفرومة
  • معلقة كبيرة فلفل هالبينو مفروم
  • كوباية ونص جبنة شيدر مبشورة
  • معلقة كبيرة زيت
  • معلقتين كبار صلصة طماطم
  • ملح وفلفل أسود (حسب الرغبة)
  • معلقتين كبار توابل التاكو (زعتر+ بابريكا+ كمون+ شطة+ بودرة توم+ بودرة بصل)

الطريقة

  • اسلق المكرونة في مياه مملحة لمدة 8 دقايق وصفيها
  • احتفظ بكوباية من مياه السلق 
  • شوح البصل لمدة 5 دقايق وضيف الهاليبينو واللحمة المفرومة 
  • تبل بالملح والفلفل الأسود وتوابل التاكو 
  • ضيف صلصة الطماطم ومياه سلق المكرونة وقلب كويس عشان تتجانس كل المكونات
  • بعد ما الخليط يغلي.. ضيف المكرونة والجبنة الشيدر وقلب لحد ما الجبنة تسيح


اكلات باللحمة المفرومة

اكلات باللحمة المفرومة مع الخضار

كرات اللحمة مع الخضار المشوي

المكونات 

  • ثمرة كوسة
  • بصلة صغيرة + ربع بصلة مفرومة  
  • 400 جرام لحمة مفرومة
  • ثمرة فلفل أحمر
  • ثمرة فلفل أصفر
  • فصين توم مفروم
  • معلقتين كبار زيت زيتون
  • ثمرة طماطم
  • ربع معلقة صغيرة بودرة توم
  • معلقة صغيرة زعتر مجفف
  • ملح وفلفل أسود
  • معلقتين كبار بقدونس مفروم
  • ربع معلقة صغيرة كمون
  • رشة قرفة
  • معلقتين كبيرة زيت

الطريقة

  • قطع الخضار مربعات كبيرة وتبلها بالملح والفلفل الأسود وبودرة التوم والزعتر
  • دخل الخضار الفرن على ورق زبدة لحد ما يتشوي
  • اخلط اللحمة المفرومة مع البقدونس والبصلة المفرومة والتوم وتبلها بالملح والفلفل الأسود والكمون والقرفة
  • شكل اللحمة لكرات بحجم متوسط وشوحها في الزيت
  • قدم الخضار وكرات اللحمة مع رز أبيض

كرات اللحمة مع الخضار المشوي

رول البتنجان باللحمة المفرومة

المكونات

  • 2 ثمرة بتنجان رومي
  • ربع كيلو لحمة مفرومة
  • كوباية عصير طماطم
  • معلقة كبيرة صلصة طماطم
  • بصلة صغيرة مفرومة
  • معلقة صغيرة بابريكا
  • ملح وفلفل أسود 
  • معلقة صغيرة بهارات لحمة

الطريقة

  • تبل اللحمة بالملح والفلفل الأسود والبابريكا وبهارات اللحمة 
  • شكل اللحمة لكرات صغيرة 
  • قشر البتنجان وقطعه شرايح رفيعة واقليه في زيت غزير
  • لف كرات اللحمة بشرايح البتنجان واقفلها بخِل أسنان 
  • رص رولز البتنجان في صينية 
  • اخلط عصير الطماطم والصلصة ووزعها على البتنجان
  • ممكن تزود زعتر مجفف أو بهارات على الصلصة وكمية من الموتزاريلا لو عايز
  • دخل البتنجان الفرن لمدة 25 دقيقة

رول البتنجان باللحمة المفرومة

مقالات ذات صلة

زر الذهاب إلى الأعلى