المحتويات
الحواوشي رغيف محشي باللحمة المفرومة بخلطة مميزة، أكلة مصرية أصيلة، اتعرفت من على عربية صغيرة في منطقة سوق التوفيقية بقلب القاهرة سنة 1971 على يد جزار اسمه محمد الحواوش، خلد المصريين اسمه على اختراعه هذا، انتقلت الخلطة لمناطق ومحافظات تانية، واتنوعت طريقة عمل الحواوشي، بنقدم لك وصفات مختلفة ولذيذة تقدر تعملها بسهولة.
طريقة عمل الحواوشي البلدي
المكونات
- 5 أرغفة بلدي
- نص كيلو لحمة مفرومة
- بصلتين مفرومين
- معلقتين كبار خل
- معلقتين كبار زيت (وكمية زيادة لدهن الأرغفة)
- ملح وفلفل أسود
- معلقة صغيرة ونص بهارات لحمة
الطريقة
- اخلط اللحمة المفرومة والبصل والخل والملح والفلفل الأسود والبهارات
- شكها لكرات متساوية الحجم لعدد الأرغفة
- افتح جنب من كل رغيف وافرد جواه واحدة من كرات اللحمة
- كرر مع باقي الأرغفة
- ادهن كل رغيف بكمية مناسبة من الزيت ولفه بورق زبدة
- رص الأرغفة في صينية ودخلهم الفرن على درجة حرارة 180 لمدة 30 دقيقة
طريقة عمل الحواوشي الإسكندراني
المكونات
- 3 كوبايات دقيق
- كوباية مياه دافية
- 3 معالق كبار لبن بودرة
- معلقة كبيرة سكر
- معلقة كبيرة خميرة فورية
- ربع كوباية زيت
- نص كيلو لحمة مفرومة
- نص كيلو بصل مفروم ناعم
- 3 حبات فلفل أخضر مفروم
- معلقة صغيرة بهارات (أو بهارات حواوشي)
- ملح وفلفل أسود
الطريقة
- اخلط الخميرة والسكر وربع كوباية مياه وقلب كويس وسيبهم في مكان دافي لمدة 15 دقيقة
- في بولة.. اخلط الدقيق واللبن البودرة والزيت واعجن كل المكونات مع بعض
- ضيف الخميرة وكمل عجن وبعد كده ضيف المياه بالتدريج
- كمل عجن لحد ما يبقى عندك عجينة متماسكة
- سيب العجينة تخمر في مكان دافي لمدة ساعة
- اخلط اللحمة مع البصل والفلفل الأخضر والبهارات والملح والفلفل الأسود
- قسم اللحمة والعجينة لكرات متساوية
- افرد كرة من العجينة وعليها كرة من اللحمة
- افرد كرة تانية من العجينة واقفل بيها اللحمة واتأكد إن الأطراف مقفولة كويس
- كرر مع باقي كمية العجينة واللحمة
- ادهن كل رغيف من الحواوشي بالزبدة أو الزيت
- رصه في صينية مدهونة زيت ودخله الفرن لمدة 30 دقيقة
طريقة عمل الحواوشي بالسجق
المكونات
- نص كيلو سجق
- 2 حبة طماطم مفرومة
- 2 حبة فلفل أخضر مفروم
- قرن فلفل حار مفروم
- نص كوباية جبنة شيدر مبشورة
- ملح وفلفل أسود
- رشة جوزة الطيب
- 3 كوبايات دقيق
- كوباية مياه دافية
- 3 معالق كبار لبن بودرة
- معلقة كبيرة سكر
- معلقة كبيرة خميرة فورية
- ربع كوباية زيت
الطريقة
- حضر العجينة بنفس طريقة الحواوشي الإسكندراني
- افرم السجق في الكبة
- اخلط السجق مع الطماطم والفلفل الرومي والحار والملح والفلفل الأسود وجوزة الطيب
- ضيف الجبنة الشيدر واخلط بإيدك المكونات كويس عشان تتجانس مع بعض
- قسم العجينة لكرات متوسطة وافرد كل كرة بالنشابة وضيف معلقتين كبار من خليط السجق
- حط طبقة من العجينة واقفل الطبقتين كويس
- كرر الخطوتين مع باقي كمية العجينة والسجق
- ادهن كل رغيف حواوشي بالزبدة أو الزيت ورصهم في صينية مدهونة زيت
- دخل الحواوشي الفرن لمدة 30 دقيقة
- ممكن تستبدل العجينة بعيش بلدي
طريقة عمل الحواوشي بالفراخ
المكونات
- 6 أرغفة عيش بلدي
- كيلو فراخ بانيه مفروم ناعم
- بصلتين كبار مفرومين
- حبة فلفل أخضر مفروم
- 2 حبة طماطم مفرومة
- حزمة بقدونس مفرومة
- قرن فلفل حار مفروم
- 3 فصوص توم مفروم
- نص كوباية سمنة
- معلقة صغيرة بهارات
- نص معلقة صغيرة بابريكا
- ملح وفلفل أسود
الطريقة
- اخلط الفراخ مع البصل والفلفل الأخضر والحار والبقدونس والتوم والبهارات والبابريكا والملح والفلفل الأسود
- ممكن تضيف جبنة شيدر أو موتزاريلا لخليط الفراخ
- احشي كل رغيف بكمية مناسبة من خليط الفراخ
- ادهن كل رغيف بالسمنة ولفه في ورق زبدة وعليه فويل
- رص الأرغفة في صينية
- دخل الحواوشي الفرن لمدة 30 دقيقة
