المحتويات
طريقة عمل التوست سهلة ومكوناته موجودة في كل بيت ولأنه من الأشياء الأساسية للفطار ممكن تعمله في البيت بخطوات سريعة لضمان جودة مكوناته بطرق مختلفة.
طريفة عمل التوست الأبيض
المكونات
- 4 كوب دقيق
- معلقتين كبار لبن بودرة
- معلقتين كبار خميرة
- معلقتين كبار سكر
- نص كوب زيت
- رشة ملح
- مياه للعجن
الطريقة
- اخلط الدقيق واللبن البودرة والسكر والخميرة ورشة الملح كويس
- ضيف المياه تدريجيا لحد ما العجينة تبقى طرية
- اعجنها لمدة 10-15 دقيقة
- سيبها تخمر في بولة تلت أضعاف حجمها
- بعد ما تخمر.. قسمها على شكل التوست ولمها من الأطراف عشان تتجنب التشقق
- ادهن قالب التوست أو الكيك برشة دقيق وحط العجينة فيه
- غطيها ببلاستيك حفظ الطعام عشان تخمر تاني
- لما تخمر.. دخليها الفرن على درجة حرارة 180- 200
طريقة عمل التوست البني
المكونات
- كيلو دقيق (نص أبيض ونص أسمر)
- 20 جم خميرة
- معلقة صغيرة ممسوحة من الملح
- 5 جم محسن خبز (اختياري)
- 100 جم زبدة
- معلقة كبيرة سكر
- 3 كوبايات مياه دافية
الطريقة
- ضيف المياه الدافية والخميرة عشان تتأكد من فعاليتها
- زود نص كمية الدقيق وبعدين اخلطه لمدة 10 دقايق
- ضيف باقي المكونات واخلطهم كويس
- غطيه وسيبه يخمر لمدة ساعتين على الأقل
- رش دقيق بسيط في قالب التوست عشان مايلزقش
- شكل العجينة على شكل التوست وحطها في القالب وغطيها وسيبها ساعة
- سخن الفرن على درجة حرارة 220 وبعدين دخل التوست وسيبه 40 دقيقة
- آخر 5 دقايق قلل درجة حرارة الفرن من 220 لـ180
- الأفضل تدخل حلة/ صينية فيها مياه في الفرن معاه عشان العجينة تبقى هشة
طريقة عمل التوست من الشوفان
المكونات
- كوباية ونص مياه دافية (300 مل)
- معلقة صغيرة عسل أبيض
- معلقة صغيرة ممسوحة ملح
- معلقة صغيرة مليانة خميرة (6 جم)
- كوبايتين وربع دقيق شوفان
- نص باكيت بيكنج باودر عليه محسن خبز (12 جم)
الطريقة
- اخلط المياه والعسل والخميرة كويس في بولة كبيرة
- ضيف نص كوباية دقيق وغطيها ببلاستيك حفظ الطعام تلت ساعة عشان الخميرة تتفاعل
- ضيف باقي الدقيق تدريجيا والبيكنج باودر والملح
- القوام بيكون أقرب للكيكة مش للعجين
- ادهن قالب التوست بزيت أو سمنة وبعدين رشه بدقيق شوفان وضيف الخليط
- خلي سطح الخليط غير عالي عشان يستوي من جوه كويس والأحسن تستخدم قالب كبير
- غطيه وسيبه ساعة لحد ما يخمر
- سخن الفرن على درجة حرارة 220 ودخله
- سيبه 45 دقيقة وطلعه لما يبقى لونه غامق مش دهبي عشان يبقى استوى من جوه كويس
