المحتويات
الشوفان من الحبوب الكاملة الخالية من الجلوتين ومصدر للفيتامينات والمعادن والألياف ومضادات الأكسدة المهمة، ودراسات كتير تناولت فوايده ومن ضمنها إنه بيساعد على فقدان الوزن وانخفاض مستويات السكر في الدم وتقليل مخاطر الإصابة بأمراض القلب، وأكدت دراسة تانية نشرتها مجلة التغذية الأمريكية، إنه من خلال التجربة، استمر شعور الشبع بعد تناول الشوفان لمدة 4 ساعات، على عكس الأشخاص اللي تناولوا حبوب الفطار (كروس فليكس).
نصائح لاستخدام الشوفان لإنقاص الوزن
- اطحنه واستخدمه بديل للدقيق القمح خاصة في الحلويات زي الكيك والمافن والبسكويت (مناسب للأشخاص اللي بيعانوا من حساسية الجلوتين كمان)
- مقدار دقيق الشوفان بتلتين كمية الدقيق العادي الموجود في أي وصفة
- ممكن تضيف مقدار منه مطحون على لحمة البرجر مع التوابل واعجنه كويس.. هيساعد على تماسك كل قطعة ويمنع تقلص حجمها بدل البقسماط
- ضيفه للشوربة زي العدس والطماطم عشان تزود سمكها مع قيمة غذائية أعلى وإحساس بالشبع أكتر
- ضيف معلقة كبيرة على أي سموزي عشان يكون وجبة سناك صحية وتحسسك بالشبع لوقت أكبر
وصفات مختلفة للدايت
- مناسبة لوجبات الفطار أو السناك
ميدتيرنين
- اخلط نص كوباية شوفان وكوباية شوربة فراخ منزوعة الدسم على نار متوسطة لمدة 5 دقايق
- ضيف ربع معلقة صغيرة زعتر مع ملح وفلفل أسود
- سخن نص معلقة كبيرة زيت زيتون وشوح فص توم وربع كوباية طماطم (مجففة أو مكعبات) وزيتون أسود حلقات لمدة 5 دقايق
- في بولة.. ضيف خليط الشوفان وعليه نص كوباية جبنة فيتا لايت مكعبات
- وزع عليهم خليط التوم والطماطم
بالخضار والبيض
- اخلط معلقة كبيرة دقيق الشوفان ومع الملح والفلفل الأسود وربع معلقة صغيرة بابريكا
- اخفق 4 بيضات كويس مع 3 معالق كبار لبن وضيف عليها الخليط السابق بالتدريج مع التقليب المستمر عشان تتجنب التكتل
- ضيف مكعبات صغيرة من (بصلة صغيرة/ حبة طماطم/ حبة فلفل أخضر/ حبة فلفل أحمر)
- سخن معلقتين كبار زيت زيتون وضيف خليط البيض في طاسة غير لاصقة
- سيبه على نار متوسطة لحد ما يحمر واقلبه على الناحية التانية
Overnight Oats
- اهرس موزة وضيف عليها نص كوباية لبن عادي/ لوز/ جوز هند ورشة قرفة ونص معلقة صغيرة فانيليا
- ضيف معلقتين كبار بذور شيا و3 معالق كبار شوفان
- غطيها وسيبها في التلاجة لمدة 6 ساعات
- ممكن تضيف عليه معلقتين كبار زبادي خالي الدسم/ معلقة صغيرة جرانولا/ ثمرة فاكهتك المفضلة
بودينج
- اخلط نص كوباية لبن ومياه وشوفان وحطهم على نار هادية لحد لما القوام يتقل
- ضيف عليهم معلقة صغيرة عسل ونص معلقة صغيرة قرفة وقطع موزة واحدة
- ممكن تضيف 7 حبات مكسرات زي اللوز
الشوفان مع الجزر
- ضيف 3 معالق كبار شوفان مع نص جزرة مبشورة ومعلقة صغيرة سكر جوز الهند/ سكر بني في حلة صغيرة ورشة قرفة وزبيب وملح وجنزبيل بودرة
- ضيف كوباية لبن.. لو حليب جوز هند زود كمية مياه بسيطة لأنه تقيل لكن لو نوع تاني مش ضروري
- قلبهم على نار هادية من 10 دقايق لربع ساعة لحد ما القوام يتقل
- حط نوع المكسرات المفضل عندك زي اللوز أو عين الجمل
الشوفان بالتمر
- اخلط تلت كوباية شوفان مع كوباية لبن وأربع حبات تمر مقطع أجزاء صغيرة
- ضيف معلقة زبدة فول سوداني صغيرة ورشة قرفة وسيبهم على النار لحد لما القوام يتقل
- زين الوش بنوع مكسرات مبشور أو سليم
الشوفان بالشوكولاتة
- ضيف تلت كوباية شوفان مع شرايح موزة مستوية ولوز مبشور (اختياري)
- في وعاء منفصل.. اخلط كوباية لبن مع معلقة صغيرة زبدة فول سوداني وعسل ومعلقة متوسطة كاكاو خام
- قلبهم كويس وضيفهم على خليط الموز
- حط الخليط في وعاء صالح لدخول الفرن ورش معلقة سكر جوز هند/ بني على الوش
- دخله الفرن لحد ما يتماسك ولونه يغمق
