المحتويات
طريقة تخزين ورق العنب بيبحث عنها أغلب الناس خصوصًا للاستفادة منّه وطبخه في المواسم اللي مش بيظهر فيها، بس أحيانًا ممكن يتلف مع سوء التخزين أو يتغير لون وشكله وملمسه وبالتالي تخزينه بالطريقة السليمة سواء قبل الحشو أو بعد الحشو أساسي في الاستمتاع بطعمه المميز بعد التسوية.
تخزين ورق العنب قبل الحشو
- في برطمان زجاج محكم الغلق جمّع كل 15 من ورق العنب لو حجمه صغير أو 10 لو حجمه كبير ولفهم مع بعض
- املا البرطمان لأقصى طاقة استيعابية بس ضروري تبقى عارف خزّنت قد إيه ورق عنب
- جهز كوباية مياه مغلية كبيرة وعليها 3 معالق ملح كبار ومعلقة سكر لو مخزن كيلو ورق عنب (وقلل الكمية لو ورقة العنب وزنه أقل)
- ضيف المياه المغلية على ورق العنب في البرطمان ولو حسيت إن فيه فراغ فاضي كمّله بمياه مغلية للنهاية
- اقلبه بالعكس وخلي قاعدة البرطمان لفوق وكل يومين غيّر وضعيته لمدة 6 أيام وبعدها خزّنه في التلاجة
- لو مش عايز تضيف عليه أي حاجة الأفضل تقص أي زوائد ملتصقة بيه (العنقود) ورص ورق العنب فوق بعضه
- اوزن كل 1/4 كيلو ورق عنب مع بعض ولفهم بورق زبدة وحطهم في كيس بلاستيك ودخلهم الفريزر
- في الطريقة دي بلاش تغسل الورق قبل تخزينه لأنه ممكن يضعف لو استخدمته مرة تانية
- لازم تتأكد إن الكيس البلاستيك فارغ تمامًا من الهواء قبل تخزينه في الفريزر
طريقه تخزين ورق العنب بعد الحشو
- اتأكد إن الأرز في الخلطة مستوي نصف سواء (بلاش تخليه يبقى مستوي خالص أو ني) لأنه في الحالتين الأرز هيتكسّر
- رص ورق العنب بعد الحشو في علبة محكمة الغلق وخزّنها في الفريزر لحين استخدامها مرة تانية
- لما تطبخ ورق العنب المخزن ضروري تنزله من الفريزر قبلها بيوم عشان تسوّيه وهو في درجة حرارة الجو
الفرق بين ورق العنب وورق التوت
- رغم إنهم متشابهين بس فيه فروق كتير بين ورق العنب وورق التوت لازم تعرفها
ورق العنب
- طري وخفيف ولونه أخضر فاتح
- ريحته مميزة تشبه ريحة العنب الطازة
- الورقة بيبقى فيها تقسيمات ثلاثية وجوه كل تقسيمة فيه فروع صغيرة
- ليه تفريعات وحواف مدببة وبيحافظ على لونه الزاهي في الحلة
ورق التوت
- بيكون على شكل قلب ولونه داكن ومفيش تفريعات عكس ورق العنب
- الشبه بينهم في الريحة بس ورق التوت بيسود في الحلة عكس ورق العنب
