زيت جوز الهند: فوائده للشعر والبشرة والصحة وطرق استخدامه

زيت جوز الهند مفيد للصحة لأنه غني بالعناصر الغذائية الهامة، فهو بيساعد في تحسين صحة العقل والقلب وإنقاص الوزن، ومفيد لصحة البشرة والشعر.

العناصر الغذائية لزيت جوز الهند

كل معلقة كبيرة منه فيها:

• 121 سعر حراري
• 0 جم بروتين
• 13.5 جم دهون
• 0 مجم كوليسترول
• كمية بسيطة من فيتامين هـ

فوائد زيت جوز الهند الصحية

بيحتوي على أحماض دهنية

• الأبحاث أثبتت دور الأحماض الدهنية في حرق الدهون وبتوفر طاقة للجسم والعقل
• بتعلي الكوليسترول الجيد في الجسم وبتقلل خطر الإصابة بأمراض القلب
• نوع من أنواع الأحماض الدهنية في زيت جوز الهند اسمه MCTs، الجسم بيستخدمهم كمصدر للطاقة أو بيحولهم لكيتونات
• الكيتونات Ketones ليها تأثير إيجابي قوي على صحة العقل

فوائده لصحة القلب

الأبحاث على المجتمعات اللي بتاكل جوز الهند بشكل منتظم أثبتت تمتعهم بصحة قلب جيدة

زيت جوز الهند كمضاد للبكتيريا

بيتكون من 50% من حمض اللوريك اللي بيتحول لمادة اسمها Monolaurin عند امتصاص الجسم ليه، والاتنين بيساعدوا على قتل البكتيريا ومسببات الأمراض في الجسم زي الفيروسات والفطريات

فوائده لتقليل الجوع

الأبحاث أثبتت إن الـMCTs والكيتونات بتساعد على سد الشهية وتناول سعرات حرارية أقل على مدار اليوم

بيزود الكوليسترول الجيد في الجسم

• بعض الأبحاث أثبتت دوره في تقليل الكوليسترول الضار وزيادة معدل الكوليسترول الجيد في الجسم
• ده بيساعد على الوقاية من أمراض القلب والشرايين

مفيد لصحة العقل

• الباحثين توصلوا لفايدة الكيتونات كمصدر للطاقة لخلايا المخ التالفة نتيجة للإصابة بالزهايمر
• بيساعد في تحسين أعراض الزهايمر في أولى مراحله

زيت جوز الهند لتخسيس دهون البطن

• دراسات محدودة أثبتت إن تناول معلقتين صغيرين منه يوميا بيساعد على تنزيل محيط البطن وتقليل دهون الجسم الكلية
• بالرغم من دوره في إنقاص الوزن، إلا إنه غني بالسعرات الحرارية ولازم تستخدمه بحذر

فوائده للكبد

• دراسات قليلة أثبتت إن الأشخاص المصابة بأمراض الكبد اللي انتظمت على تناوله يوميا ظهرت عندهم أعراض تحسن بعد 4 أسابيع
• الدراسات محدودة في النقطة دي

فوائد صحية تانية لزيت جوز الهند

• بيساعد على إمداد الجسم بالطاقة بشكل كبير
• بديل للزيوت النباتية في وصفات الطبخ
• إضافته للشاي بتساعد على التخلص من احتقان الأنف أو الحلق
• استخدامه بانتظام بيحسن الهضم وتنظيم دخول الحمام

فوائد زيت جوز الهند للبشرة

• بيعزز صحة البشرة والجلد وبيرطبها
• مرطب ليلي مفيد للبشرة بيساعد في تنعيمها والتخلص من خطوط التعبير الرفيعة
• ممكن تستخدمي نقطتين منه على قطعة قطن كمزيل طبيعي للمكياج
• استخدامه على الأماكن الغامقة بيساعد على تفتيحها
• مناسب لعلاج تشقق الشفايف في حالة استخدامه عليها قبل النوم
• بيساعد في رجوع الجلد لشكله الطبيعي بعد الشفاء من جرح أو إصابة
• استخدمه كمزيل للعرق طبيعي لأنه فيه خصائص مضادة للبكتيريا
• وضعه على إيدك بعد غسل المواعين بيحميها من الجفاف أو التشقق

فوائد زيت جوز الهند للشعر

• ممكن تستخدمه كبلسم عن طريق فرك كمية بسيطة منه على فروة رأسك واغسله بعد 20 دقيقة
• بيقلل هيشان الشعر وبيساعد في تسهيل تسريحه
• مناسب لعلاج قشرة الشعر عن طريق تسخين كمية بسيطة.. ادعك بيه فروة رأسك بعد ما يدفى تماما واغسله بعد 30 دقيقة
• بيساعد على الترطيب العميق للشعر لأنه بيعوضه عن الزيوت والبروتينات اللي بيفقدها
• بيضيف لمعة للشعر عن طريق دعك أطراف الشعر بكميات بسيطة منه

فوائد زيت جوز الهند لبشرة الجسم

• بيساعد على ترطيب الأماكن الجافة والغامقة زي الركبتين والكوعين
• بيقلل جفاف الجلد المحيط للضوافر
• مقشر طبيعي للجسم، فممكن تستخدمه مع الليفة للتخلص من الجلد الميت عن طريق مزجه مع السكر البني أو القهوة

نصائح شراء زيت جوز الهند

• في منه أنواع كتير بتختلف حسب السعر وطريقة التصنيع وبالتالي فوائده بتختلف
• اختار النوع الطبيعي Organic اللي نوعه بكر ممتاز
• اقرأ مكوناته واتأكد إنه خالي من زيت جوز الهند المهدرج Hydrogenated coconut oil
• خزنه في مكان جاف وبارد ومظلم لأنه في الحرارة قوامه بيكون سايل ولونه شفاف ومع انخفاض درجة الحرارة قوامه بيتقل وبيكون مايل للكريم ولونه بيكون أبيض

استخدامات مختلفة لزيت جوز الهند

• استخدمه على بشرتك مع واقي الشمس لأن الدراسات أثبتت إن فيه نسبة 20% للحماية منها وبالتالي بيحمي البشرة من آثارها على البشرة زي تغير لونها وخطوط التجاعيد الناتجة عن التعرض ليها
• ضيفه للقهوة أو الشاي لزيادة حرق الدهون في الجسم وإمداده بالطاقة
• استخدمه في الطبخ أو التشويح أو الطبخ على درجة حرارة عالية لأنه لا يتحول لمواد سامة عند التعرض لدرجة حرارة عالية
• ضيفه على الأماكن اللي فيها اضطرابات جلدية زي الإكزيما لأنه بيساعد في تقليل أعراضها
• استبدلي كريم الجسم بيه لأنه فيه درجة عالية من الترطيب
• استخدمه في وصفات الخبز كبديل للزبدة لأنه أكتر صحية وبيضيف طعم مختلف
• اخلط جزء منه مع جزء من البيكنج صودا للتخلص من البقع على السجاد عن طريق تركه 5 دقايق وبعدين امسح الخليط
• لمع بيه الأثاث لأنه بيمنع الأتربة من عليه
• مزيل لمكياج الوجه والعين طبيعي ومناسب للحفاظ على ترطيب البشرة
• مناسب لمكونات دريسنج السلطة لأنه أفيد من الدريسنج الجاهز
• وضعه على الشفايف قبل النوم أو التعرض للشمس بيعالج تشققها وبيرطبها وبيحميها من آثار الشمس